Tambela la balangi-kanisà
3
Yɔnga nde nenongodea ani nde yɛu a nde domi: nabana nto akóndi ja la nangi-kanisà, akóndi nkási anja. 2 Mpa, atɔlɛli nangi-kanisà abɛ nto nde bato batɔɔ nnd'aanga bankɔngɔniaga. Abɛ nto nde nnd'aanga am'bɛsa nke matɔɔ, masa nkaɛa, abɛ nto nde nnd'aguliaga éma, abɛ nto a lɔkɛkɛ, abɛ nto nde bato bansikisi, abɛ nsesei-bagɛndɔ na mmbe atɔa golisa la bato. 3 Abá-i mokundilia aɔ abha-emani. Abɛ gɔɛ nde makɔlɔ na mmbe nnd'a na nkɔlɔlɔ. Abá-i nkóndi-ntondɔ kpɛɛ. 4 Asɔndɔlisɛ endu aɛ hɛlɛ, nto nde baan'aɛ bansikisi na lebea la maanɔ nd'aɛ bhulibhu. 5 Nga, nabana nto nnd'aúbha sɔndɔlisa la endu aɛ hɛlɛ, boni yɛu aanga atɔisa langa la kanisà nda Mokonga? 6 Abá-i mokilisitɔ nde maa mbènɔ-mbènɔ, tea la bende abhia-i aebhebha, na mbusa-li, amɔnɛ mokpata bía ind'a Nketi. 7 Atɔlɛli go abɛ na ntɔndɔlisɔ anja mosá la bande nndaga bakilisitɔ nga, bankumbisa-i yɔnga na indɔ nga bende atɛ a bɔɔkì nda Nketi†.Tambela la badiakoni
8 Atɔlɛli na badiakoni n'ibɔ babɛ bato nde basiki, babá-i bato a man'diɛ. Babá-i bakundilia na bakaba-i ntondɔ a asii ajede. 9 Atɔlɛli balangɛ mɔkɔ̀ nde Mokonga angodi asu a yɔnga la boosobela-li na meema anja. 10 Mpa atɔlɛli mbɛɛ lengisana la tambela l'abɔ. N'aye yɔnga ajede nnd'aɔnɛani ang'abɔ, babɛ badiakoni. 11 A masa bo ang'a bakeb, babɛ bande bato batɔɔ baesikisi, babá-i bato a geanaga, babɛ bato nde nnda baguliaga éma na babɛ go bande bato batɔɔ aanga baɛkɛtɛla a éma-li bhulibhu. 12 Badiakoni babɛ na bake moti-moti sìa, na sɔndɔlisa la baan'abɔ na bato nde ba endu abɔ hɛlɛ. 13 Nga, badiakoni nde bakɔli mobili nd'abɔ hɛlɛ babá mande na boumu, na aanga bayɔngɛla boosobela nde ba nee asub'a Kilisitɔ Yesu makanga bɔɔ.
Éma ati-ti nde ai aɛsɔmɛni aúbhianani mpa
14 Neoandekei baloa nde, na neúbha bende asaki nebhiɛ nɔngɔ aɔ. 15 Mpa, nabana nnda nebhii dia, baloa nde aoúbhisa sinde atɔlɛli nee otambɛ a meeme a bato nde ba Mokonga. Indɔ yɛu a nde kanisà nda Mokonga mmbe alenda, indɔ a nde ndui a domi na tine-li. 16 Domi-domi, éma nde Mokonga ai angodi asu a yɔnga la sinde aanga belenda asub'a sikisa la Mokonga, na inde atɔlɛli belebeɛ besu bɔbhu, a ati kpɛɛ ye mɛnɔ:
Kilisitɔ
ai aóbeli n'a nde nto,
Meema a Bobhu† ai atɔndɔlisi bende a nde nto a domi.
Ai aɔnɛani ang'a bamalaeka.
Bato ai balabhi yɔnga l'aɛ ang'a bato bɔbhu nde ba na lɛɛngɔ.
Ai banebei asub'a lɛɛngɔ-li bhulibhu.
Mokonga ai antálisi a boumu na kobha.