Boelengelelɛ na egolisi a mbéa
4
Mpa, Meema a Bobhu ayɔngi domi bende, a mbènɔ a sungia, bato moti-moti badoa lɛ boosobela, na belea la baketi† na egolisi nd'abɔ nda mbéa-mbéa. 2 Baedhemisisa lɛ na bato a ebhete-bhete, na bambembéa bande nnd'aye baúbha sɔmbɔla a meeme a éma anja na ind'ajede, nga meema abɔ asidi bía éma nde basumbii na ngɔa nde atoi asub'a nsa. 3 Bato ndɔ bakálelisa eyamani na eléa moti-moti nde Mokonga ai atɛlɛkisi nga bende, bande banebei na úbha la domi babɛsɛ yu na meema a boengɔ. 4 Nga éma bhulibhu nde Mokonga atɛlɛkisi a anja†. Nndag'a au inde atɔlɛli kɔ́ma-li nabana nto abɛsi yu na meema a boengɔ. 5 Nga, yɔnga nda Mokonga na ɛmɛmi yɛu abɔngisaga éma bhulibhu mosá l'aɛ.Ja la nkɔbɛ manja nde ma Kilisitɔ Yesu
6 Yɔnga ndɔ, nabana oeangelisa bande ba na kanisà hɛlɛ, obá mande nkɔbɛ manja nde ma Kilisitɔ Yesu. Indɔ yɛu aɔngiana bende okuta yɔnga la boosobela na egolisi anja nde ai ɔbhɛdɛli domi. 7 Mpa, ɔkɔ́mɛ egani la mbéa na ind'ebhobho inde a dhɔlɔ a egolisi a domi. Oengbamisɛ a lenda asub'a sikisa la Mokonga. 8 Boengbamisa a éma nde alengi ngobho a na ɛmbɔ ɛdɛ. Mpa gɔɛ, lenda asub'a sikisa la Mokonga yɛu a na ɛmbɔ a éma bhulibhu nga, a indɔ yɛu Mokonga ai asolàki lenda a elemɔ nde na a elemɔ nde abhia lɛ. 9 Indɔ a nde yɔnga la domi, inde atɔlɛli bato bɔbhu balebeɛ. 10 Domi-li ndɔ, nabana beenobisa na bemanisa, a nde nga bende, bebhísi boosobela lasu ang'a Mokonga mmbe aɔnɛa, mmbe a nde Namisi a bato bɔbhu, na kpɛɛ mbɛɛ mmbe ma bande banebei.
11 Indɔ yɛu oogolisɛ na oososiɛ bato.
12 Onebeela-i nto bende abhɔnisɛ koboluana aɔ. Obɛ gɔɛ nde nto nde bato nde banebei Mokonga aanga bankèngelaga a yɔnga l'aɛ, a tambela l'aɛ, a ekóndi, a boosobela, na a tea la ilɔlɔ. 13 N'aha bobondea bhia l'ami, osùililɛ sɔmaa la Ketabo nda Mokonga mosá la bato, na dhodeisa la meema abɔ, na golisa l'abɔ. 14 Ɔbhɔnisa-i edado nde Meema a Bobhu abhísi asub'aɔ, inde Mokonga ai aopi a mbènɔ nde baúbhilili babhòmeligi nee a yɔnga l'aɔ, na mbènɔ nde bakpɛga baobhísii na njaga. 15 Inde netoa yɔnga-li bhulibhu nde, obhísɛ meema aɔ au, oogabhɛ ngimana aɔ a nkási ndɔ, nga bato bɔbhu baɔnɛ bende oga mosá nee. 16 Olengɛ tambela na egolisi aɔ hɛlɛ, osuililɛ. Nga, n'aye ɔkɔla bo, oolamisa mande owɛ nganga nangɛ na bande baɔɔkanea.