Maanɔ ang'a nangi-kanisà
5
Onkáleaga-i mɛnɔ nkpɛga, onhanɛ gɔɛ nde bía abhaɔ†. Na ìbo yɛu ɔɔkɔlɛ baluana bía bana-amáɔ. 2 Na bakpɛga la bake ɔɔkɔlɛ bía bamáɔ, na banyike n'ibɔ ɔɔkɔlɛ bía baalɔɔ makanga maakɔ ajede ang'abɔ.Sikisa la bamekusa
3 Oolengɛ na sikisa la bamekusa, bande nnda bá na mosá na mbusa. 4 Mpa nabana angal'abɔ a be mmbe a na bani aɔ banyi-etata, atɔlɛli bandɔ yɛu bagolɛ mbɛɛ sikisa la Mokonga na baelanga bato nde ba mba nd'abɔ hɛlɛ. Na ìbo yɛu baesisila babɔti abɔ na batata abɔ bonja nde n'ibɔ ai baɛkɔlɛli. Indɔ yɛu abɔngi ang'a Mokonga. 5 Amekusa niina mmbe nnd'a na nto nde antabela, aki aesobela Mokonga, kiia n'etonge iyɛ aki aikila mɛma la Mokonga nga antabelɛ. 6 Mpa amekusa nde akóndi lɛɛngɔ, mmbɔ aiki n'aku nangɛ abɛ n'aha aɔnɛa. 7 Indɔ yɛu oososiɛ bamekusa niina nga abá-i na nto nde aekumiaga. 8 Nabana nto nndaga aelangi batobaɛ, kpɛɛ mbɛɛ bande ba asub'endu aɛ, mmbɔ angani boosobela nd'aɛ, na a majede nyɛna la mmbe akɔ́mi lebea la Mokonga.
9 A mɔlɔndɔ a bamekusa, oandekɛ masa ina a mmbe aye akidisi elemɔ ekomi motoba aɔ ati l'indɔ, na abɛ mmbe nnd'aanga am'bɛsa moo matɔɔ, masa munyaɛa. 10 Abɛ mmbe a na ntɔndɔlisɔ a yɔnga la ɛkɔli anja nd'aɛ, a mɔtisa la baan'aɛ hɛlɛ, a pikila la bagɛndɔ, a sosa l'ego la bato nde ba Mokonga†, a tabela la banobɔ, na boengbamisa a kɔla la éma anja-nja ntuantua.
11 Mpa, a mbinɔ a bamekusa nde banuni-mbɛ oandeka-i ina abɔ, nga n'aye sei a baboo aejulua, indɔ aanga aekatanisa na Kilisitɔ, aba go bakónda ɔmana, 12 na ìbo yɛu baebhìsila mande mokpata nga ai badu nsaeɔ nde ai basaeani mosá na Kilisitɔ. 13 Ago, nndaga bá na inde bakɔla, baosela ngianaga a mɔtɛ ntuantua, kanga masa gbɔka la bosa, mpa go, baikila tɔndɔbɔka na yɔngaga la yɔnga nde nnd'atɔlɛli. 14 Ang'a indɔ, nekóndi bende bamekusa nde banuni-mbɛ baɔmanɛ go, baɛbɔtɛgɛ bani na bamɛlɛɛ endu abɔ. N'aye bakɔli ìbo, masanib asu abóla inde asosolea au. 15 Nɛyɔngi bo nga a na adha bamekusa nde aye babungigi a beléá la Sitani. 16 Nabana nke nde anebei Kilisitɔ a na bamekusa asub'a mba nd'aɛ, aetabelɛ nga adoa-i nkumba abɔ a njaga a kanisà. Indɔ nga kanisà aetabelɛ bande nde bamekusa niina.
Bakpɛga nde bamɛlɛi kanisà
17 Bakpɛga nde bamɛlɛi kanisà hɛlɛ, atɔlɛli sikisa l'abɔ nkobà ibale, kpɛɛ mbɛɛ bande baenobisa a labha na golisa la yɔnga nda Mokonga. 18 Nga, Ketabo nda Mokonga ayɔngi bende: «Ntɛ nde adɛtaga mbùac, onyanga-i nyɔɔ aɛ, on'doɛ aléɛ adh'au.» Ayɔngi go bende: «Nto a nkási atɔlɛli elèɔ nd'aɛ†.» 19 N'aye nto abhii anchɔɛla nkpɛga nde amɛlɛi kanisà yɔnga nɔngɔ aɔ, olebea-i. Atɔlɛli abɛ gɔɛ nde na batɔndɔlisi babale aɔ basalɔ†. 20 Bande bakɔla ilɔlɔ, oekáleɛgɛ mosá la bato, nga batɔɔ babɔgɔmanɛgɛ.
21 Neososii mosá la Mokonga na mosá la Kilisitɔ Yesu, na bamalaeka nde aɛsɔmbɔli bende, osikisɛ maanɔ ndɔ, na ɔsɔ̀a-i yɔnga dia-dia, nangɛ gàmela la nto. 22 Okamisaga-i mɛnɔ bhísa la njaga antata a nto, ago oogàmela-i mɛnɔ bato a ilɔlɔ nd'abɔ. Owɛ nganga, otambɛ hɛlɛ n'otea ilɔlɔ.
23 A yɔnga la kukua a sɔɔ aɔ na jegedaga la ngobho aɔ, abá-i onoa masa íbo, onoɛ go na-nyia-divai.