Bakɔbɛ na bakama nde babɔ
6
Bande bá asub'a bɔkɔbɛ bɔbhu abɔngi baesikisɛ bakama nde babɔ kpɛɛ bía nde atɔlɛli nee, nga bende bato babhóma-i ina a Mokonga na ɔtisisa la egolisi ndasu. 2 Bakɔbɛ nde bakama nde babɔ banebei Kilisitɔ, baɛbhɔnisa-i a yɔnga la bende ba nde badhabɔ asub'a Kilisitɔ, iisi. Atɔlɛli gɔɛ baɛkɔlɛlɛ nde bakama nde babɔ nkási hɛlɛ kpɛɛ, nga ibɔ yɛu ba nde badhabɔ na bakóndaga asub'a Kilisitɔ, na baɔna ɛmbɔ nde atoa a nkási nd'abɔ.Yɔnga ndɔ yɛu atɔlɛli ogolisɛ na sosia la bato.
Egolisi a mbéa na lua niina
3 Nabana nto agolisi yɔnga atɔɔ, na nnd'alebei yɔnga la domi nda Mokama nde masu Yesu Kilisitɔ, na egolisi nde ansikisa Mokonga, 4 mmbɔ a na ekumbekumbe kpɛɛ na nnd'aúbha go naa éma imoti. A nde nto nde moo aɛ aujuani a ikilaga la bóaka la yɔnga. Indɔ abhìsa kɛnɛa, esani, ɛɔti na bateaga ajede, 5 kakatana nde nnd'a na sungia a nsɔlɔ a bato nde ba na maɛnɛkɔ ajede, bande bataloka úbha la domi. Ibɔ baaka bende lenda asub'a sikisa la Mokonga a nde asii la boetondisa la na lua.
6 A bo, lenda asub'a sikisa la Mokonga a nde botondi mati, n'aye nto ajangei inde a nee. 7 Nga nnd'ai bebhii na lɛɛngɔ oni na éma, beja go mande masa bosa†. 8 Nabana be na eléa na ngɔmbɛ, indɔ atɔlɛli ang'asu. 9 Mpa, bande bakaba ja la batondi, baedhemisisa dia. Ago baengisa ibɔ nganga asub'a bɔɔkì nde abhìsa kɛnɛa ntuantua. Kɛnɛa ndɔ a nde ind'ebhobho, ago ind'ajede kpɛɛ mambala inde aebòla bato asub'a bojiji na bungaga. 10 Nga, ekóndi a ntondɔ a nde tine a bujede-li bhuu. A yɔnga la kɛnɛa la ntondɔ ndɔ yɛu aangisi bato batɔɔ babungisa boosobela l'abɔ, na boenobisa la ibɔ bamɛnɛ kpɛɛ.
Pɔlɔ anhana Timɔtɛɔ
11 Mpa owɛ, nto nde ma Mokonga, oteɛ éma ndɔ bhulibhu. Oengbamisɛ a kaba la lenda l'asuba a domi, asub'a sikisa la Mokonga, asub'a boosobela, asub'a ekóndi, asub'a bubila, na asub'a bɔkɔlɔ. 12 Omanɛ emani anja nda boosobela, okpatuɛ lenda la mɛyɔ nde Mokonga ai aokogei mbènɔ nde oosengi nee hɛlɛ boosobela l'aɔ mosá la batɔndɔlisi bati. 13 Neososii mosá la Mokonga, mmbe alendisa éma bhulibhu, na mosá la Kilisitɔ Yesu, mmbe ai aesengi hɛlɛ boosobela l'aɛ mosá la Pɔntiɔ Pilatɔ† bende, 14 ɔkɔlɛ éma bhulibhu nde Mokonga aososii kɔla-li, makanga boalia na inde nnd'aanga basolea kida la esa nde Yesu Kilisitɔ aóbela lɛ nee. 15 Mokonga yɛu amóbelisa mande a mbènɔ nde iyɛ nganga ai asɔmbɔli nee. Iyɛ a nde Abha-Bujɛmɛ, Abh'Elingi n'Ekalɔ, Mɔamɛ antat'a baamɛ na Mokama antat'a bakama†. 16 Iyɛ nganga yɛu a nde mɛyɔ. Aiki asub'a bobhu nde nto nnd'aanga atɔisa n'akidi a mpiti. Nnd'a na nto nde aye mɛnɔ amɔni na nnd'a na nto nde aanga atɔa n'amɔni†. Boumu na ekanda la mɛyɔ na mɛyɔ abɛ ind'aɛ. Abɛ bo!
17 Ang'a batondi nde ba lɛɛngɔ nda ndiende, oososiɛ bende babá-i na ekumbekumbe. Baesobela-i lua nde nnd'alɛbha ujuana†. Mpa baesobelɛ gɔɛ nde Mokonga mmbe asopa éma bhulibhu a mɛkɛnɛ nga bende bebɛ na bujɛmɛ a yɔnga-li. 18 Oososiɛ go bende bakɔlɛ enjambi, babɛ batondi a kɔla la éma anja-nja, batabelanɛ na meema anja, na babuɛ lua nd'abɔ na bato batɔɔ. 19 Ang'a indɔ yɛu, baebhísila mande lua anja na inde asiki a esa nde abhia mande, nga badɔ̀ɛ lenda niina.
Pɔlɔ amɔkɔa Timɔtɛɔ
20 Abhɔai Timɔtɛɔ, obhísɛ hɛlɛ inde Mokonga ai aobhísisi. Oteɛ tɛtɛmbaga l'ebhobho, inde angoisani na egolisi a domi. Yɔngaga ndɔ yɛu bato bimoti bakumia bate a nde maɛnɛkɔ, mpa n'a nde mbɛlabɔ. 21 Bato batɔɔ baaka bate ba na maɛnɛkɔ ndɔ, mpa indɔ aangisi na bakpangbi asii la boosobela.
Boangɔ nda Mokonga abɛ na benu.