Pɔlɔ akóndi bende baTɛsalɔnika bamɛmɛ abɔ
3
Mpa, badh'asu, a sungia, bɔmmɛmɛ Mokonga a yɔnga l'asu nga bende, yɔnga nda Mokama akamisɛgɛ ndanda, na batukumisɛ yu áma atɔɔ sinde a nee nɔngɔ anu. 2 Bɔmmɛmɛi go bende, asotosɛ a njaga a bato bajede na bajiji. A nde bende, bato bɔbhu nnda ba na boosobela.3 Mpa Mokama akɔla mande inde ai ayɔngi. Akándisaga mande meema anu, anolanga mande toa la ang'a Nketi†. 4 Ang'a indɔ yɛu bebhísi meema asu ang'a Mokama bende, bɔkɔla na bɔkɔla go mande inde benososii.
5 Mokama asɔndɔlisɛ meema anu a ekóndi nde atoa nɔngɔ a Mokonga na a bubila nde Kilisitɔ asopa.
Maanɔ nda Pɔlɔ a yɔnga la ekusi
6 Baaya, benososii a ina a Mokama nde masu Yesu Kilisitɔ bende, bokatanɛ na badh'anu bàlebei bɔbhu, bàkusi na bande nnda basikisi maanɔ nde ai beegolisi. 7 Benu nganga boúbha sinde atɔlɛli bobeleɛ nee ànga asu. Nga, mbènɔ nde bei nee a nsɔlɔ anu, nndag'ai be nde bàkusi. 8 Nnd'ai beli eléa nda nto bosa. Mpa, ai bɛkɔla nkási kiia n'etonge asub'a enobɔ na eloɔ, nga bende bebá-i nkumba ang'a nto moti angal'anu†. 9 Nndag'a nde bende nnd'ai be na bokama la yɔnga la bende bosotabelɛ, angisɛ ai bɛkɔla bo. Ai bekóndi gɔɛ nde ɔngia l'anu asii nde atɔlɛli bobeleɛ. 10 A nde bende, mbènɔ nde bei nee nɔngɔ anu, ai benososii bende: «Mmbe akɔ́mi kɔla la nkási, nangɛ eléa, aléa-i ye†.»
11 Bɛyɔngi bo nga, bɛɔki bende, bato bimoti a nsɔlɔ anu ba nde bàkusi, nnda babhɛda nkási, mpa baikili masa boengisa l'a yɔnga nda bato batɔɔ. 12 Mpa, beesosii bato ndɔ, na bɛɛmɛmi a ina a Mokama Yesu Kilisitɔ bende: babhɛdɛ nkási sinde atɔlɛli nee, nga badɔ̀ɛ eléa nd'abɔ ibɔ nganga.
13 Mpa na benu, badh'asu, boloa-i a kɔla la bonja. 14 Nabana nto akɔ́mi sikisa la yɔnga l'asu nde beandeki asub'a baloa nde, bonengɛ nto ndɔ kpɛɛ, na abá-i bontambela nga, akuɛ soni. 15 Mpa, bɔm'bɛsa-i bía njiu, bonhanɛ gɔɛ nde bía nebei dhanu.
Pɔlɔ aɔkɔanaga
16 Mokama Amɛnɛ a bɔkɔlɔ, iyɛ nganga anopɛ bɔkɔlɔ esa-li bhulibhu na a asii-li bhulibhu. Mokama abɛ na benu bɔbhu.
17 Mɔkɔ̀ nde, a nde nseseɔ nde neandeki na njaga ami, eme Pɔlɔ. Na ibende yɛu aki nesaea baloa namɔ bhulibhu nde neandeki.
18 Boangɔ nda Mokama nde masu Yesu Kilisitɔ abɛ na benu bɔbhu.