Ɔnɛana la mosinja na siana la Mokama
2
Mpa badhasu, a yɔnga la siana la Mokama nde masu Yesu Kilisitɔ, na sinde betulanaga mande n'iyɛ, bɛnɔmɛmi bende, 2 meema anu abá-i na maamaa na boima-i a gela bende, a nde bía esa nda Mokama aye akidi. Aɔ bɔɔkɛli yu a yɔnga nda baúbhilili, aɔ a bolabhɛ, aɔ a aka la bende baloa atoi nɔngɔ asu. 3 Abá-i beli nto nde anodhemi a éma-li bhulibhu. Nga, mbènɔ nde nnd'aanga akida bato-li bɔbhu na bamɔ́tigi-mbɛ Mokonga, na ago a mbènɔ nde mosinja ndɔ n'aye aɔnɛani, mmbe sungia l'aɛ a nde bungaga. 4 Mosinja ndɔ aebhebha mande antat'a éma-li bhulibhu, na aekalelisa mande bato éma bhulibhu nde baɔna bìa esomba, aɔ inde babhebha. Na ngia la asub'a endu a Mokonga, na boebhebha la bende iyɛ yɛu a nde Mokonga. 5 Mpa, boboseli kala yɔnga nde ai nenongodea na neha na benu? 6 Mpa, boúbha inde andhungilaga mosinja ndɔ kida a mbènɔ nde. Ang'a indɔ, iyɛ aóbela mande a mbènɔ nde Mokonga abhísi. 7 A nde bende, bokpɛ l'aɛ aye akɔla nkási a bɔsɔmbi. N'aye mande mmbe andhungilaga a mbènɔ nde na nnd'aye be, mpa mosinja ndɔ ab'aɔnɛana hɛlɛ. 8 Mpa, mosinja nde aɔnɛana mande. A mbènɔ nde Mokama Yesu abhia nee, ammòa na maɛhu nde atoa asub'a nyɔɔ aɛ, na agɔbɛlaga mande a ekanda la bhia l'aɛ. 9 Mbènɔ a bhia la mosinja nde, abá mande nde a ekanda la Sitani na akɔla mande mambala éma bhulibhu la bangisana, mbunde na ekesɔ a mbéa. 10 Akɔla mande mambala bujede bhulibhu a dhema la bande babungaga nga, nnd'ai bálebei na kónda la domi nde atɔa lamisa l'abɔ. 11 Indɔ yɛu aangisi, Mokonga n'atei abɔ ekanda la bhobhoa nga bende, balebeɛ yɔnga la mbéa. 12 Nga, Mokonga aɛsɔ̀a mande bɔbhu nde nndaga bàlebei domi, mpa na bajangea nde bujede.Mokonga ai asɔsɔmbɔli a lamisa l'asu
13 Badhasu, atɔlɛli bensìmɛ Mokonga esa-li bhulibhu a yɔnga l'anu, benu nde Mokama anokóndi ndɔ. A nde bende, Mokonga anɔsɔmbɔli toa la kala nga, bobɛ na bolamisi, a ekanda la Meema Mbhumani mmbe anolendisa a bobhu nga, bolebei domi. 14 Mokonga ai anokogi a bolamisi ndɔ nde, nyɛnɛla l'a Mbinɔ Anja nde ai benolabheli nga bende, bobɛ na boumu nda Mokama nde masu Yesu Kilisitɔ. 15 Mpa badhasu, bomɛ hɛlɛ na bodhungililɛ egolisi nde ai benogolisi ndɔ, abɛ a bolabhɛ nangɛ inde a a baloa nd'asu.