Baloa nda ibale nda Pɔlɔ aeandekei
BaTɛsalɔnika
Nseseɔ
1
Eme Pɔlɔ, Sila na Timɔtɛɔ, ayunde beandeka baloa nde ang'a bato nde ba kanisà nda Tɛsalɔnika, bande ba nde bato nde ba Abhasu Mokonga na Mokama nde masu Yesu Kilisitɔ.2 Boangɔ na bɔkɔlɔ nde atoa nɔngɔ a Mokonga na Mokama nde masu Yesu Kilisitɔ, abɛ na benu.
Mokonga aɛsɔ̀a mande bato a esa la siana la Yesu
3 Badhasu, atɔlɛli bensìmɛ Mokonga mbènɔ-li bhulibhu a yɔnga l'anu. Abɔngi bɛkɔlɛ bo nga, boosobela nd'anu amɔti kpɛɛ, ago ekóndani anu, nto na nto ang'a dhaɛ, aga n'amɔta nde. 4 Ìbo yɛu beebhebha a yɔnga l'anu mosá la Kanisà-li bhulibhu nda Mokonga a yɔnga la bubila na boosobela nde bo nee, a nyɛnɛla la enobɔ mati nde anokidia.
5 Benu bobubila asub'a enobɔ nd'anu a yɔnga la ɛbɔamɛ nda Mokonga. Indɔ aangelisi bende mokpata nda Mokonga a nde domi. A yɔnga la indɔ, alamoli bende benu, bɔtɔlɛli asub'a ɛbɔamɛ nd'aɛ. 6 A nde bende, Mokonga a nde nto a domi, aenobisa mande bande banonobisa, 7 na pa l'anu bujɛmɛ áma imoti na besu benu nde bonoba. Akɔla mande indɔ mbènɔ nde Mokama Yesu abhia mande nee toa la na kobha áma imoti na bamalaeka nde baɛ, bande ba na ekanda. 8 Abhia mande na nsa nde agoga a ɔnisa la mokpata bande nndaga bamúbha Mokonga na bande bakɔ́ma lebea la Mbinɔ Anja nda Mokama nde masu Yesu. 9 Mokpata nd'abɔ abá mande nde bungisa l'abɔ a mɛyɔ na bhísa l'abɔ dhɔlɔ a iso Mokama na dhɔlɔ a boumu a ekanda nd'aɛ. 10 Mokpata ndɔ abá mande nde esa nde Mokama Yesu abhia mande nee nga, bato nde baɛ bɔbhu bande banebei bantukumisɛ na sikisa l'aɛ. Na benu bobá mande angal'abɔ nga, bolebei bɔtɔndɔlisi asu.
11 Ang'a indɔ, bɛmɛma anu makanga loa, nga bende Mokonga nde masu atɔisɛ lendisa l'anu bía nde atɔlɛli a nkogɔ nd'anu. Ago bɛmɛma bende, a ekanda l'aɛ anɔtɔisisɛ kɔla la bonja bhulibhu nde bokóndi, na nkási bhulibhu nde atoa boosobela nd'anu. 12 Bɛmɛma ìbo nde nga bende, ina a Mokama nde masu Yesu abhebheanɛ a yɔnga l'anu na benu a yɔnga l'aɛ. Indɔ bhulibhu atɔisana nde a boangɔ nda Mokonga nde masu na Mokama Yesu Kilisitɔ.