Petóiá hai pekakae
108
Nani to nakáráhi Daudiꞌ.
2 Ó Pueꞌ Ala, maróhó pehárungángkuꞌ i Hio.
Ina monaniaꞌ nani petóiá i Hio.
3 Hangko tiꞌara mani membeto alo,
ina mearóaꞌ hai monani,
hai ina mokáwiꞌaꞌ gambusuꞌ hai kasapi.
4 Ó PUEꞌ, ina kutóiáKoꞌ i oloꞌraꞌ tauna i duniáꞌ,
ina monaniaꞌ nani petóiá i oloꞌraꞌ tina-tina,
5 láwiꞌ kamahilena ahiꞌMu
melumbuꞌ kamapángkáꞌna hangko i langiꞌ,
hai katetidaꞌMu haweꞌ i gawu.
6 Ó Pueꞌ Ala, kipembiáꞌ bona Nupatongawaꞌ kamakuasaꞌMu i langiꞌ,
hai peawaꞌMu i humalele duniáꞌ.
7 Kipembiáꞌ bona Nupopenangiangkaiꞌ ánti kamakuasaꞌMu.
Nupehádingi pekakaengkiꞌ bona tauna to Nupokaꞌahiꞌ tepelae.
8 Pueꞌ Ala mongkóráꞌ miꞌi hangko i katoroꞌáNa to magasaꞌ,
Nauliꞌ, “Ina góeꞌ ntepuꞌuAꞌ mogáláꞌ-gáláꞌ tampoꞌ Sikeꞌ,
hai lembo Sukoꞌ ina Kuhukáꞌ
bona Kugáláꞌ-gáláꞌáheꞌ taunáNgkuꞌ.
9 Kódóꞌ miꞌi to mampopueꞌ tampoꞌ Gileaꞌ hai Manase.a
Tampoꞌ Eparai nodo sóngkó wájá to mokámpái wuáꞌKuꞌ,b
hai tampoꞌ Iudá nodo laiꞌ kadatuáNgkuꞌ.c
10 Agáiáná tampoꞌ Moabiꞌ nodo pobahoꞌiá bitiNgkuꞌ.d
MotelángaꞌAꞌ sandaleNgkuꞌ i tampoꞌ Edo,
tandaꞌna kaKódóꞌna pueꞌna.
Góeꞌ ntepuꞌuAꞌ láwiꞌ monangiMoꞌ toPelisitiꞌ.”
11 Heáná to ina moántiaꞌ lao i tampoꞌ Edo?
Heáná to ina moteteꞌaꞌ lao i kótá to rabente iti?
12 Tiꞌara paꞌi Io Pueꞌ Ala? Agáiáná Nupálehimongkaiꞌ,
hai tiꞌarapoKoꞌ mau hingkakani hai surudadoꞌkiꞌ
mampombealaꞌá ewálingkiꞌ.
13 Kipembiáꞌ bona Nupelaeangkaiꞌ hangko i ewálingkiꞌ,
láwiꞌ petulungi hangko i tauna mbero-mbero peá.
14 Ane naporángákeꞌ Pueꞌ Ala, ina maróhó ntepuꞌukeꞌ,
láwiꞌ Ia haduduáNa to ina monangiheꞌ ewálintaꞌ.