SURA KA-V
SURA PETÓIÁ 107–150
Nani kagóeꞌ hangko i tauna ánti kamaroꞌana Pueꞌ
107
“Tatóiá PUEꞌ ánti kamaroꞌaNa!Ia mopatongawaꞌ oaꞌ kamaꞌahiꞌNa.”
2 Ee tauna to napelae PUEꞌ,
nihuwárá laluita iti,
láwiꞌ Nakábáhámokou hangko i kuasaꞌraꞌ ewálimi.
3 Napahirámpumokou hangko i tampoꞌ ntániꞌna,
hangko i pembetoá alo hai hangko i katámpuána,
hangko tándáꞌ i wongko hai tándáꞌ i wóiꞌ.a
4 Araheꞌ tauna to molalaio i pádá loriꞌ,
tiꞌaraheꞌ moisá rárá lao i kótá to ina rakatoroꞌi.
5 Marimiheꞌ hai mangkadoꞌuheꞌ,
tiꞌara piꞌi ara pehárungáraꞌ.
6 Mewaliꞌ meraruaꞌheꞌ i PUEꞌ hangko i kamapáriraꞌ,
hai Ia mampelaeheꞌ.
7 Naꞌántiheꞌ molumao i rárá to manoroꞌ,
haneꞌi haweꞌheꞌ i kótá to peisá rakatoroꞌi.
8 Hintotoꞌheꞌ manguliꞌ handaꞌ kamaroꞌana i PUEꞌ
ánti kamaꞌahiꞌNa to tiꞌara mokahópóꞌá,
hai apa to Nabábehi i tauna to maroꞌa ntepuꞌu,
9 láwiꞌ Ia mampeweꞌi uwai i tauna to mangkadoꞌu,
hai pandeꞌ i tauna to marimi.
10 Araheꞌ tauna i petarungkuá to makáindi ntepuꞌu,
tueꞌraꞌ mapári, hai ratimpukuheꞌ hai rante besiꞌ,
11 láwiꞌ moewaꞌheꞌ párentána Pueꞌ Ala to i Surugáꞌ,
hai motitibeiheꞌ paturoꞌNa.
12 Onoꞌ miꞌi haneꞌi Napakapáriheꞌ hai bágóꞌ to matimi,
álána manawoꞌheꞌ, agáiáná tiꞌara ara to metulungi.
13 Mewaliꞌ meraruaꞌheꞌ i PUEꞌ hangko i kamapáriraꞌ,
hai Ia mampelaeheꞌ.
14 Napopesuwuꞌheꞌ hangko i petarungkuá to makáindi ntepuꞌu,
hai modepuꞌ rante popetimpukuraꞌ.
15 Hintotoꞌheꞌ manguliꞌ handaꞌ kamaroꞌana i PUEꞌ
ánti kamaꞌahiꞌNa to tiꞌara mokahópóꞌá,
hai apa to Nabábehi i tauna to maroꞌa ntepuꞌu,
16 láwiꞌ Ia morupuꞌ babaꞌ to rabábehi hangko i tambaga,
hai motepóꞌ popeholana to rabábehi hangko i besiꞌ.
17 Araheꞌ tauna to matuꞌa laluraꞌ
molámbiꞌheꞌ kapári ánti kamasalaꞌraꞌ.
18 Tiꞌarapoheꞌ mau mandeꞌ ba apa peá,
láwiꞌ hungkuꞌmoheꞌ ina mate.
19 Mewaliꞌ meraruaꞌheꞌ i PUEꞌ hangko i kamapáriraꞌ,
hai Ia mampelaeheꞌ.
20 Ia molaluita hai mopakauriꞌheꞌ,
Napelaeheꞌ hangko i kapate.
21 Hintotoꞌheꞌ manguliꞌ handaꞌ kamaroꞌana i PUEꞌ
ánti kamaꞌahiꞌNa to tiꞌara mokahópóꞌá,
hai apa to Nabábehi i tauna to maroꞌa ntepuꞌu.
22 Hintotoꞌheꞌ mohuhuꞌ popenómbá kagóeꞌ-góeꞌ,
hai mampodarita kamaroꞌana bábehiána Pueꞌ
moliu nani kagóeꞌ.
23 Araheꞌ tauna to mobágóꞌ i duanga tahiꞌ,
moántiheꞌ párewá to ina rapobaluꞌ.
24 Moitaheꞌ apa to nabábehi PUEꞌ,
to metingkáráhi i tahiꞌ to kaladu.
25 Ia mopárentá, haneꞌi mewui angi to rumihi
to mopaꞌara bálumbá to mahile.
26 Duangaraꞌ naꞌánti bálumbá, teángkáꞌ hai mendáulu.
Mewaliꞌheꞌ malááꞌ hai maledeꞌ.
27 Matáliliheꞌ hai moduá-duáheꞌ nodo to malangu,
tiꞌara raisá apa to ina rabábehi.
28 Mewaliꞌ meraruaꞌheꞌ i PUEꞌ hangko i kamapáriraꞌ,
hai Ia mampelaeheꞌ.
29 Ia mampopengkaroo angi to rumihi iti,
hai bálumbá menggoli tinda.
30 Góeꞌheꞌ láwiꞌ angi to rumihi mengkaroo miꞌi,
hai Pueꞌ moántiheꞌ lao i pehupeꞌá kapalaꞌ tahiꞌ to ratunggái.
31 Hintotoꞌheꞌ manguliꞌ handaꞌ kamaroꞌana i PUEꞌ
ánti kamaꞌahiꞌNa to tiꞌara mokahópóꞌá,
hai apa to Nabábehi i tauna to maroꞌa ntepuꞌu.
32 Hintotoꞌheꞌ mampomahile PUEꞌ i oloꞌraꞌ taunáNa,
hai motóiá kamaroꞌana bábehiáNa i kahirámpuáraꞌ totosae.
Petóiá i PUEꞌ láwiꞌ Ia mobábehi oaꞌ to maroꞌa i taunáNa
33 Ia mobáliki uwai to moili mewaliꞌ pádá loriꞌ,
hai katumbuꞌá uwai mewaliꞌ tampoꞌ to maduhuꞌ.
34 Ia mobáliki tampoꞌ to maruduꞌ mewaliꞌ pádá to mabure,
ánti kakadakeraꞌ tauna to toroꞌ ionoꞌ.
35 Ia mobáliki pádá loriꞌ mewaliꞌ wuhuꞌ,
hai tampoꞌ to bangi mewaliꞌ katumbuꞌá uwai.
36 Ia mopatoroꞌheꞌ tauna to marimi ionoꞌ,
hai moaróheꞌ kótá bona rakatoroꞌi.
37 Mohawuꞌheꞌ tinudaꞌ i hinoeraꞌ,
hai mantudaꞌheꞌ anggoroꞌ,
haneꞌi handaꞌ wuaꞌna powiáꞌraꞌ.
38 Ia mowátiꞌheꞌ álána handaꞌ ntepuꞌu pemuleꞌáraꞌ,
hai binataꞌraꞌ woꞌo memuleꞌheꞌ oaꞌ.
39 Agáiáná ewáliraꞌ monangiheꞌ taunána Pueꞌ Ala,
hai mampopeahiahiꞌheꞌ, haneꞌi makuraꞌ imbaꞌraꞌ.
Mapári ntepuꞌu katueꞌraꞌ.
40 Tadulako-tadulakoraꞌ napaiwóiꞌheꞌ Pueꞌ
hai Nahuoꞌheꞌ molulumao i pádá loriꞌ
to tiꞌara ara rárá.
41 Agáiáná tauna to meahiahiꞌ iti
nakámpáiheꞌ PUEꞌ hangko i kapári,
hai Napopemuleꞌheꞌ álána handaꞌheꞌ.
42 Tauna to manótó moisá apa to pewaliꞌ iti,
hai góeꞌheꞌ,
agáiáná tauna to kadake maniiꞌ peheꞌ.
43 Heáná peá tauna to bukeꞌ pekiri
mopailalu upu-upuna iti,
hai mampekiri oaꞌ kamaꞌahiꞌna PUEꞌ
to tiꞌara mokahópóꞌá.