Kamaꞌahiꞌna Pueꞌ Ala hai kamatuꞌana laluraꞌ toSáráeliꞌ
Pantepuꞌuána
106
Haleluia!Tatóiá PUEꞌ ánti kamaroꞌaNa!
Ia mopatongawaꞌ oaꞌ kamaꞌahiꞌNa.
2 Heáná paꞌi to nabuku
mopahaweꞌ kamakuasaꞌna PUEꞌ
hai motóiá PUEꞌ i katoꞌu-toꞌuána?
3 Morasiꞌ miꞌi tauna to mampeuláꞌi párentána PUEꞌ,
to mobábehi oaꞌ to hintotoꞌ hai peundeꞌáNa.
4 Ó PUEꞌ, ineeꞌaꞌ Nukáláliꞌá
tempóMu mopatongawaꞌ kamaroꞌaMu i taunáMuheꞌ.
Nutulungiaꞌ woꞌo tempóMu mampelaeheꞌ,
5 bona kuita kamaroꞌana tueꞌraꞌ taunáMu to Nupileꞌi,
bona góeꞌaꞌ woꞌo hai motóiáKoꞌ
hingkakani hai taunáMuheꞌ.
6 Madósámongkaiꞌ hibali hai toiorungkiꞌ,
mobábehimongkaiꞌ salaꞌ hai to kadake.
7 Tempóraꞌ toiorungkiꞌ i tampoꞌ Másiriꞌ,
tiꞌaraheꞌ moisá apa lempóna tandaꞌ-tandaꞌ kuasaꞌ to Nubábehi.a
Mokáláliꞌáheꞌ kamahilena ahiꞌMu
to Nupatongawaꞌámoheꞌ,
hai i wiwi tahiꞌ Teberau, meꞌewaꞌheꞌ i Hiob
Pueꞌ Ala to i Surugáꞌ.
8 Agáiáná Pueꞌ mampelaeheꞌ
bona hangaꞌNa rapomahile
hai upu-upu tauna moisá kamahilena kuasaꞌNa.
9 Ia mopárentái tahiꞌ Teberau, hai tahiꞌ iti mewaliꞌ bangi.
Ia moántiheꞌ toSáráeliꞌ molumao mengkalimba i tahiꞌ iti
nodo to molumao i pádá loriꞌ.
10 Noꞌonoꞌ miꞌi kaNapeámpáráiraꞌ hangko i tauna to mokáhihiꞌheꞌ.
Nakábáháheꞌ hangko i kuasaꞌraꞌ ewáliraꞌ.
11 Ewáliraꞌ iti nahálómpóheꞌ uwai hai mawaroheꞌ,
tiꞌara haweꞌ hadua to mentárá.
12 Hangko ionoꞌ, toSáráeliꞌ mampoináláiheꞌ upu-upu dándina Pueꞌ,
hai monani-naniheꞌ motóiá Pueꞌ.
13 Agáiáná tiꞌara marue hangko ionoꞌ,
rakáláliꞌá huleꞌ upu-upu to nabábehi Pueꞌ,
hai tiꞌaraheꞌ membiáꞌ paturoꞌ hangko i Hia
bona raisá apa to hangaa-ngaa rabábehi.
14 Raundeꞌ ntepuꞌu mandeꞌ pandeꞌ to matamaꞌ i pádá loriꞌ,
hai mampehukáꞌheꞌ Pueꞌ Ala.c
15 PUEꞌ mopabukeꞌi pembiáꞌraꞌ,d
agáiáná Ia mopaꞌara woꞌo hakiꞌ to morampeheꞌ.
16 Tempóraꞌ mobambaruꞌ i pádá loriꞌ, mahiniꞌheꞌ i Musa,
hai mahiniꞌheꞌ woꞌo i Haruni huoꞌána PUEꞌ.e
17 Onoꞌ miꞌi haneꞌi tampoꞌ mogááꞌ mohibuꞌ Data,
hai motámbungi Abira hingkakani hai upu-upu to meuláꞌ i hia.
18 Pueꞌ Ala mampopendáulu api
mopapumpuheꞌ tauna to kadake iti.f
19 I buluꞌ Sinai,g mobábehiheꞌ lenggeꞌ gapiꞌ hangko i buláwá,
haneꞌi menómbáheꞌ i lenggeꞌ to rabábehi iti.
20 Tiꞌarapoheꞌ menómbá i Pueꞌ Ala to meawaꞌ,
agáiáná menómbáraheꞌ i lenggeꞌ gapiꞌ,
binataꞌ to mandeꞌ peá rumpuꞌ.
21 Mokáláliꞌámoheꞌ Pueꞌ Ala to mampelaeheꞌ,
hai mopatongawaꞌ kamahilena kuasaꞌNa i tampoꞌ Másiriꞌ.
22 Ia mobábehi tandaꞌ-tandaꞌ kuasaꞌ i tampoꞌraꞌ pemuleꞌána Hama iti,h
hai tandaꞌ-tandaꞌ kuasaꞌ to metingkáráki i wiwi tahiꞌ Teberau.i
23 Pueꞌ Ala manguliꞌ ina mopatunaheꞌ toSáráeliꞌ,
agáiáná Musa, taunáNa to Napileꞌi miꞌi, motangaꞌ-tangaꞌiheꞌ.
Ia membiáꞌ bona Pueꞌ Ala tiꞌara mopatongawaꞌ kamabukoꞌNa,
onoꞌ miꞌi haneꞌi tiꞌarapoheꞌ napapate Pueꞌ.j
24 ToSáráeliꞌ, tiꞌara raundeꞌ mesuaꞌ i tampoꞌ Kánáꞌá to meawaꞌ iti,
láwiꞌ tiꞌaraheꞌ mampoinálái dándina Pueꞌ Ala.
25 Mohume-humeheꞌ i lalu bambaruꞌraꞌ,
hai tiꞌaraheꞌ mau mampehádingi párentána PUEꞌ.
26 Onoꞌ miꞌi haneꞌi PUEꞌ modándi
ina mopapateheꞌ i pádá loriꞌ.
27 Ia modándi ina mampopogááꞌ-gááꞌheꞌ pemuleꞌáraꞌ
i tampoꞌraꞌ tauna ntániꞌna.k
28 I buluꞌ Peo, menómbáheꞌ i ánitu Baꞌal,
hai mandeꞌheꞌ to rapopenómbá i tomate.
29 Bábehiáraꞌ iti mopaꞌara kamabukoꞌna PUEꞌ,
haneꞌi Ia mopaꞌara hakiꞌ to humalele hai meriringkuꞌi.
30 Agáiáná Pineha mohukuheꞌ tauna to masalaꞌ,
hai tempó onoꞌ woꞌo, Pueꞌ mampopengkaroo hakiꞌ iti.
31 Ánti bábehiána iti, Pineha rarekeꞌ tauna to manótó,
hai rabuhinao oaꞌ haweꞌ i rue-ruena.l
32 I uwai Meriba, toSáráeliꞌ mopaꞌara wopaheꞌ kamabukoꞌna PUEꞌ,
haneꞌi naposalaꞌ Musa i PUEꞌ ánti bábehiáraꞌ iti.
33 Bábehiáraꞌ iti mopaꞌara kamabukoꞌna Musa,
haneꞌi mohuwárá laluita to tiꞌara hintotoꞌ.m
34 ToSáráeliꞌ tiꞌaraheꞌ mopatuna tauna to ara i tampoꞌ Kánáꞌá,
kehapiꞌ iti to napárentáiámoheꞌ PUEꞌ.n
35 Ngkáliꞌna mohambokoraheꞌ hai tauna to ionoꞌ,
hai mampeuláꞌiheꞌ ádáraꞌ tauna to tiꞌara moisá Pueꞌ Ala.
36 Menómbáheꞌ i ánituraꞌ toKánáꞌá,
hai iti to mopakanawoꞌheꞌ.
37 Mampopenómbáheꞌ ánáꞌraꞌ tobaleilo hai towawine,
mohuhuꞌheꞌ ánáꞌraꞌ iti i ánitu bona raintu.
38 Mopapateheꞌ ánáꞌraꞌ to tiꞌara masalaꞌ iti,
pemuleꞌáraꞌ haduduáraꞌ mewaliꞌ popenómbáraꞌ i ánituraꞌ toKánáꞌá.
Ánti bábehiáraꞌ iti, tampoꞌraꞌ rapakedái,
39 mopakadakeheꞌ wátáraꞌ haduduáraꞌ,
hai nodoheꞌ to mebuálósi
láwiꞌ menómbáheꞌ i to tiꞌara Pueꞌ Ala.
40 Onoꞌ miꞌi haneꞌi PUEꞌ mabukoꞌ i taunáNaheꞌ iti,
hai mokáhihiꞌ ntepuꞌu taunáNa haduduáNa.
41-42 Ia mampehuhuꞌáheꞌ i kadatuá ntániꞌna,
hai Napatodáhi rapopeahiahiꞌ tauna to mokáhihiꞌheꞌ,
haneꞌi toSáráeliꞌ mengkoruꞌheꞌ i kuasaꞌraꞌ ewáliraꞌ.
43 Handaꞌ kánina Pueꞌ mokábáháheꞌ
hangko i karapopeahiahiꞌraꞌ iti,
agáiáná raundeꞌ peá oaꞌ meꞌewaꞌ
haneꞌi hurewuꞌheꞌ ánti dósáraꞌ.o
44 Kehapiꞌ noꞌonoꞌ, Pueꞌ mampehádingi peraruaꞌraꞌ,
hai mopailalu kamapáriraꞌ.
45 Ánti kahirana taunáNa,
Ia mambuhinao podándiNa ina motulungiheꞌ,p
hai ánti kamahilena ahiꞌNa,
tiꞌarapoheꞌ Nahuku.
46 Kahópóꞌána ewáliraꞌ to motawaniheꞌ toSáráeliꞌ
napopewaliꞌ Pueꞌ bona maꞌahiꞌheꞌ.q
47 Ó PUEꞌ, Pueꞌ Ala to kipenómbái,
kipembiáꞌ bona Nutulungiangkaiꞌ hai Nupahirámpuangkaiꞌ
hangko i oloꞌraꞌ tauna i duniáꞌ,
bona kiuliꞌ handaꞌ kamaroꞌana i Hio,
hai kipomahile hangaꞌMu to magasaꞌ.
48 Tetóiá miꞌi PUEꞌ, Pueꞌ Ala to rapenómbái toSáráeliꞌ,
hangko i rungu-runguna haweꞌ i rue-ruena,
hai upu-upu tauna ina manguliꞌ:
“Ami!”
Haleluia! Tatóiá PUEꞌ!