Daritakáná toSáráeliꞌ
105
Nitóiá miꞌi PUEꞌ, hai mobámbárikou hangaꞌNa.Nipolaluita i oloꞌraꞌ tauna i duniáꞌ apa to Nabábehi.
2 Mamponanikou nani petóiá i Hia,
hai nipahaweꞌ upu-upu to Nabábehi láwiꞌ maroꞌa ntepuꞌu.
3 Nipomahile PUEꞌ, láwiꞌ Ia magasaꞌ.
Kómu tauna to moundeꞌ menómbá i PUEꞌ,
hangaa-ngaa góeꞌ lalumi.
4 Menómbámokou oaꞌ i PUEꞌ
hai membiáꞌkou róhó i Hia.
Pototowina Pueꞌ Ala hai Burahima
5-6 Ee pemuleꞌánakou Burahima huoꞌána Pueꞌ Ala!
Ee pemuleꞌánakou Iako to Napileꞌi!
Nibuhinao upu-upu to Nabábehi to maroꞌa ntepuꞌu,
hai tandaꞌ-tandaꞌ kuasaꞌ to nabábehi Pueꞌ.
Nibuhinao woꞌo noumbá kamohukuNa ewálimiheꞌ.
7 Ia miꞌi PUEꞌ, Pueꞌ Ala to tapenómbái.
PehukuNa mewaliꞌ i humalele duniáꞌ.
8 Ia mambuhinao oaꞌ pototowiNa.a
Dándi to Nahuwárá iti mewaliꞌ oaꞌ haweꞌ i rue-ruena,b
9 ia miꞌi pototowi to Napaꞌara hai Burahima,c
to Nadándi woꞌo i Isakiꞌ.d
10 Dándi iti Napakanótó i Iako,e
hai iti mewaliꞌ pototowi i toSáráeliꞌ haweꞌ i rue-ruena.
11 Nauliꞌ, “Ina Kupoweꞌikou tampoꞌ Kánáꞌá
mewaliꞌ tampoꞌ sosorami.”f
12 Hangkoia toSáráeliꞌ imbaꞌraꞌ hantódiꞌ peá,g
hai toroꞌheꞌ i tampoꞌ iti nodo peheꞌ torare.
13 Molilo peheꞌ hangko i hambuaꞌ ngamba
lao i ngamba ntániꞌna,
hai melimbá-limbáheꞌ hangko i hambuaꞌ kadatuá
lao i kadatuá ntániꞌna.
14 Heáná peá to ina mampopeahiahiꞌheꞌ,
tiꞌara napaliu Pueꞌ,
hai Ia mokámbáróá datu-datu
láwiꞌ toSáráliꞌheꞌ taunáNa.h
15 Nauliꞌ, “Ineeꞌheꞌ nipopoapa
tauna to Kupileꞌi miꞌi,
hai ineeꞌkou mobábehi to kadake
i nabiꞌ-nabiꞌKuꞌ to mopahaweꞌ laluitaNgkuꞌ.”i
Iusupu
16 Pueꞌ mopaꞌara rimi i tampoꞌ Kánáꞌá,
hai mopamarugiꞌ upu-upu to ina raꞌandeꞌ.
17 Agáiáná Ia mohuoꞌ hadua tauna moioru lao i tampoꞌ Másiriꞌ,
ia miꞌi Iusupu to rapobaluꞌ mewaliꞌ hawiꞌ.j
18 Ia ratarungku,k
bitina ratimpuku hai támbólóna rarante besiꞌ.
19 Kahópóꞌána apa to napahaweꞌ Iusupu ina mewaliꞌ,
napabukeꞌi PUEꞌ, hai tongawaꞌ katoꞌuna laluitana Iusupu iti.l
20 Daturaꞌ toMásiriꞌ to mokuasaꞌi handaꞌ tauna
mohuoꞌ tauna lao mampopesuwuꞌ Iusupu hangko i tarungku.m
21 Iusupu naꞌángkáꞌ datu mewaliꞌ topokádipurá támbi kadatuá,
hai ia raweꞌi woꞌo kuasaꞌ mokádipurá upu-upu párewána datu.
22 Iusupu rapoinálái woꞌo mopárentáiheꞌ topobágóꞌna datu,
hai mopatente totosae hai laluita to bukeꞌ timbá.n
ToSáráeliꞌ melimbá lao i tampoꞌ Másiriꞌ
23 Roo onoꞌ, Iako hai pemuleꞌánaheꞌ melimbá lao i tampoꞌ Másiriꞌ,o
tampoꞌ pemuleꞌána Hamap
hai toroꞌheꞌ ionoꞌ nodo torare.
24 PUEꞌ mampopemuleꞌheꞌ duuꞌna handaꞌ ntepuꞌuheꞌ,q
álána maróhó ntepuꞌuheꞌ hangko i ewáliraꞌ.
25 Ia mobáliki laluraꞌ toMásiriꞌ
haneꞌi mokáhihiꞌheꞌ taunáNa
hai mobábehiheꞌ to kadake i toSáráeliꞌ taunáNaheꞌ iti.
Musa
26 Ia mohuoꞌ Musa huoꞌáNa lao i tampoꞌ Másiriꞌ,
hingkakani hai Haruni taunáNa to Napileꞌi.
27 I tampoꞌ Másiriꞌ, tampoꞌraꞌ pemuleꞌána Hama,
mobábehiheꞌ handaꞌ tandaꞌ kuasaꞌ to metingkáráki.
28 Musa hai Haruni mampeuláꞌi mpuꞌuheꞌ párentána Pueꞌ Ala,r
onoꞌ miꞌi haneꞌi Ia mopaꞌara kamakáindi i tampoꞌ Másiriꞌ.s
29 Uwairaꞌ Nabáliki mewaliꞌ waheꞌ,
hai upu-upu bouꞌ mate.t
30 Handaꞌ ntepuꞌu seóꞌ mesupaꞌ i tampoꞌraꞌ
hai mesuaꞌheꞌ woꞌo i támbina datu.u
31 Ánti párentána Pueꞌ, haweꞌheꞌ támbóliꞌv
hai kárámuꞌ i humalele tampoꞌraꞌ.
32 Ia mampopendáulu udá watu,
hai kiláꞌ to mombehangke-hangke i tampoꞌraꞌ.w
33 Kau anggoroꞌ hai kau ara Nadungkáheꞌ,
hai upu-upu kau to ara i tampoꞌraꞌ madungká.
34 Ánti párentána Pueꞌ, haweꞌheꞌ katupeeꞌx to handaꞌ ntepuꞌu,
tiꞌara peisá raimbaꞌ.
35 Moandeꞌheꞌ upu-upu tudaꞌ-tudaꞌ i tampoꞌ iti,
hai moandeꞌheꞌ upu-upu wuaꞌ powiáꞌraꞌ toMásiriꞌ.
36 Roo onoꞌ, Ia mopapate upu-upu ánáꞌraꞌ tobaleilo to towutuꞌ
i tampoꞌ Másiriꞌ.y
ToSáráeliꞌ mesuwuꞌ hangko i tampoꞌ Másiriꞌ
37 Pueꞌ Ala moánti toSáráeliꞌ mesuwuꞌ hangko i tampoꞌ Másiriꞌ.
Moántiheꞌ handaꞌ buláwá hai peráꞌ,z
hai tauna to hampuloꞌ hai rontina iti,
upu-upuheꞌ mesuwuꞌ i kamaroꞌa-roꞌa.
38 ToMásiriꞌ góeꞌheꞌ i kapohuꞌraꞌ toSáráeliꞌ iti,
láwiꞌ malááꞌheꞌ i toSáráeliꞌ.
39 Pueꞌ mopaꞌara gawu bona mobóungángiheꞌ,
hai api mowantaꞌiheꞌ tempó káindi.a
40 Membiáꞌheꞌ pandeꞌraꞌ i Pueꞌ Ala,
haneꞌi Naweꞌiheꞌ tádáhi mpidioꞌ
hai rótiꞌ hangko i langiꞌ
bona raꞌandeꞌ duuꞌraꞌ mabuhu.
41 Ia mobikáꞌ buluꞌ watu haneꞌi mesuwuꞌ uwai
to moili i pádá to bangi.b
42 Upu-upuna iti nabábehi Pueꞌ
láwiꞌ Ia mambuhinao dándiNa i Burahima huoꞌáNa.
43 Ia moántiheꞌ taunáNa i kagóeꞌ-góeꞌ,
taunáNa to Napileꞌi iti mohoraꞌ-horaꞌheꞌ ánti kagóeꞌraꞌ.
44 Ia mampeweꞌi tampoꞌraꞌ tauna ntániꞌna i hira,
hai molámbiꞌheꞌ hinoe to tiꞌara rapowonggoꞌ.
45 Nabábehi noꞌonoꞌ bona mampeuláꞌiheꞌ párentáNa
hai motibaaꞌ oaꞌ áturáNa.
Haleluia! Tatóiá PUEꞌ.