Pueꞌ Ala to mampopewaliꞌ duniáꞌ hai upu-upu óntóꞌna
104
KutóiáKoꞌ PUEꞌ hangko i lalungkuꞌ ntepuꞌu.Ó Pueꞌ Ala PUEꞌkuꞌ, mahile ntepuꞌu tueꞌMu,
peawaꞌ hai peádái ara oaꞌ i Hio.
2 NatolelingiKoꞌ pewangkaꞌ,
Nuwálá langiꞌ nodo to mowálá tenda,
3 hai Nuaró támbiMu
i wongko uwai to i langiꞌ.
Gawu nodo keretaMu,
hai membaraKoꞌ i wongko wui.
4 MampopewaliꞌKoꞌ wui to moánti tewáiMu,
hai api mewaliꞌ huoꞌáMu.a
5 MampopewaliꞌKoꞌ duniáꞌ deꞌe i kaꞌaraꞌána,
haneꞌi haweꞌ i rue-ruena, tiꞌara peisá ralimbá.
6 Duniáꞌ deꞌe Nuóntóki miꞌi hai tahiꞌ,
haweꞌ i tutuꞌ buluꞌ.
7 I párentáMu, uwai iti moili,
i kanahádina peruuMu, maꞌálóhóꞌ poilina uwai iti.
8 Uwai moili hangko i buluꞌ-buluꞌna lao i lokeꞌ-lokeꞌna
i katoroꞌá to Nupakanótó miꞌi ami.
9 Nupakanótó páráiliꞌna uwai to tiꞌara peisá raliungi,
bona duniáꞌ deꞌe tiꞌara piꞌi ina nalábóꞌ uwai.
10 Nupakanótó bona uwai mentumbuꞌ lao i lokeꞌna,
ánáꞌ uwai moili i hiliꞌna buluꞌ-buluꞌ
11 bona rainu upu-upu binataꞌ i pádá,
hai kalide to maila to mangkadoꞌu mainuheꞌ haweꞌ raporái.
12 Tádáhi to membara i laerawa moháráheꞌ i wiwi uwai,
hai muniheꞌ hangko i dáꞌángkau.
13 Nupaꞌara udá hangko i langiꞌ to moudái buluꞌ-buluꞌna,
maroꞌa miꞌi duniáꞌ ánti apa to Nubábehi.
14 Nupatueꞌ rumpuꞌ bona ara pandeꞌraꞌ binataꞌ,
hai Nupaꞌara tudaꞌ-tudaꞌ bona rapobágóꞌ tauna,
haneꞌiheꞌ molámbiꞌ pandeꞌraꞌ hangko i tampoꞌ,
15 ia miꞌi anggoroꞌ to mopagóeꞌ tauna,
lana saitu to mampopengkilaꞌ lindoꞌraꞌ,
hai pandeꞌ to mopakaróhó buꞌuraꞌ.
16 Hinángkáꞌ kau to Nupaꞌara, PUEꞌ, Nuꞌudángi,
tepasuaꞌ kau to mapángkáꞌ to Nutudaꞌ i Libano.
17 Ionoꞌ tádáhi mohárá,
hai timbokoꞌ mesóndáꞌ i kau pinusi.
18 Buluꞌ to mapángkáꞌ rakatoroꞌi bekeꞌ to maila,
walehuꞌ to mahile mebuni i buluꞌ-buluꞌ watu.
19 Nupopewaliꞌ wulá bona motandaꞌi tempó,
hai alo támpu i tempó to Nupakanótó miꞌi.
20 Nupaꞌara kamakáindi,
haneꞌi upu-upu binataꞌ i lalu kakau mampeliꞌheꞌ pandeꞌraꞌ.
21 Singá merengge
mampeliꞌ pandeꞌraꞌ to hangko i Pueꞌ Ala.
22 I kamesupaꞌna miꞌi alo, binataꞌ iti pohuꞌ,
laoheꞌ mebóungá.
23 Tauna laoheꞌ mampopolumao bágóꞌraꞌ
haweꞌ kalumbaꞌ.
24 Ó PUEꞌ, mampopengaa to Nubábehi.
Upu-upuna iti Nupopewaliꞌ ánti kamapándeMu.
Duniáꞌ deꞌe bukeꞌ hai apa to Nupopewaliꞌ.
25 I lalu tahiꞌ to maeláꞌ,
handaꞌ ntepuꞌu bouꞌ, to mahile hai to kókóiꞌ.
Tiꞌaraheꞌ peisá raimbaꞌ.
26 Duanga tahiꞌ molumao i wongko uwai,
hai naga mahileb to Nupopewaliꞌ mowadi i lalu tahiꞌ iti.
27 Upu-upu to tueꞌ iti mehárungá i Hio,
bona ara pandeꞌ i tempóna paraluu.
28 I kaNupoweꞌiraꞌ pandeꞌraꞌ, raꞌala.
I kaNubungkáhiáraꞌ taeMu, mabuhuheꞌ,
láwiꞌ molámbiꞌmoheꞌ to maroꞌa.
29 I kaNuwunina lindoꞌMu,
malááꞌheꞌ,
i kaNualana peinaoraꞌ,
mateheꞌ hai mesuleꞌheꞌ mewaliꞌ awu tampoꞌ.
30 I kaNuweꞌina InaoMu,
ara to tueꞌ,
haneꞌi Nupawoꞌu to tueꞌ i duniáꞌ deꞌe.
31 Hampóáꞌworia peawaꞌna PUEꞌ ina ara oaꞌ,
haweꞌ i rue-ruena.
Hampóáꞌworia PUEꞌ ina góeꞌ
i upu-upuna to Napopewaliꞌ.
32 Ia mampeita peá duniáꞌ,
haneꞌi moenggo.
Ia morumpa peá buluꞌ-buluꞌna,
haneꞌi mesuwuꞌ mai rámbu.
33 Ina kunanika nani i PUEꞌ
lántuꞌángkuꞌ mani tueꞌ.
Ina mamponaniaꞌ nani petóiá i Pueꞌ Ala to kupenómbái
tangaꞌkuꞌ mani ara i duniáꞌ deꞌe.
34 Kuhárungá apa to kupepekiri
mopagóeꞌ PUEꞌ,
láwiꞌ Ia to mopagóeꞌ lalungkuꞌ.
35 Agáiáná kuhárungá tauna to paka madósá
ina tunaheꞌ hangko i duniáꞌ deꞌe,
hai tauna to mobábehi to kadake
tiꞌarapoheꞌ ina ara.
KutóiáKoꞌ PUEꞌ hangko i lalungkuꞌ ntepuꞌu.
Haleluia! Tatóiá PUEꞌ!