Kutóiá PUEꞌ hangko i lalungkuꞌ ntepuꞌu
Nanina Daudiꞌ.
103
Ina motóiáꞌaꞌ PUEꞌ hangko i lalungkuꞌ ntepuꞌu,ina kupomahile hangaꞌNa to magasaꞌ.
2 Ina motóiáꞌaꞌ PUEꞌ hangko i lalungkuꞌ ntepuꞌu,
hai tiꞌara ina kukáláliꞌá upu-upu kamaroꞌaNa.
3 Ia to moámpungi upu-upu salaꞌkuꞌ.
I tempóna tiꞌara kulalu, Napakauriꞌaꞌ.
4 Ia to mokábáháꞌaꞌ hangko i kapate,
hai mopatongawaꞌáꞌaꞌ kamaꞌahiꞌNa to tiꞌara mokahópóꞌá.
5 Ia to mopabukeꞌi tueꞌkuꞌ hai apa to maroꞌa,
onoꞌ haneꞌi maróhóaꞌ oaꞌ
nodo kamaróhóna tádáhi koꞌaaꞌ.a
6 Pobutusina PUEꞌ hintimbá
i upu-upu tauna to rapopeahiahiꞌ.
7 Ia mampopaisá peundeꞌáNa i Musa,
hai mopatongawaꞌ kuasaꞌNa i toSáráeliꞌ.
8 PUEꞌ maroꞌa laluNa hai bukeꞌ ahiꞌ.
Ia sabaraꞌ ntepuꞌu hai tetidaꞌ oaꞌ.
9 PUEꞌ tiꞌara mekámbáróá oaꞌ,
hai tiꞌara mabukoꞌ haweꞌ i rue-ruena.
10 Tiꞌarakeꞌ Nahuku hintotoꞌ hai dósántaꞌ,
hai tiꞌarakeꞌ woꞌo Naháwángi hintotoꞌ hai kamasalaꞌtaꞌ.
11 Agáiáná nodo kamapángkáꞌna langiꞌ,
noꞌonoꞌ woꞌo kamahilena ahiꞌNa i tauna to mengkoruꞌ i Hia.
12 Nodo kakaraoꞌna pembetoá alo hangko i katámpuá alo,
noꞌonoꞌ woꞌo kaNapakaraoꞌna salaꞌtaꞌ hangko i kitaꞌ.
13 Nodo umaꞌ mampokaꞌahiꞌ ánáꞌna,
noꞌonoꞌ woꞌo kamaꞌahiꞌna PUEꞌ
i upu-upu tauna to mengkoruꞌ i Hia,
14 láwiꞌ naisá PUEꞌ hangko i apakeꞌ Nabábehi,
Nabuhinao Napopewaliꞌkeꞌ hangko i awu tampoꞌ.b
15 Katueꞌna tauna nodo peá rumpuꞌ,
hampaiꞌ peá nodo bungaꞌ to tueꞌ i tangaꞌ pádá.
16 Ane natawueꞌ wui, ina maránáꞌ bungaꞌ iti
hai tiꞌara piꞌi ara;
mogalo riꞌi kaꞌaraꞌána, tiꞌara piꞌi teisáꞌá.
17 Agáiáná ahiꞌna PUEꞌ i tauna to mengkoruꞌ i Hia
tiꞌara mabáliꞌ hangko i rungu-runguna haweꞌ i rue-ruena,
hai kamanótóNa tiꞌara ina mokahópóꞌá
haweꞌ-haweꞌ i pemuleꞌáraꞌ
18 upu-upu tauna to tetidaꞌ oaꞌ
i totowina PUEꞌ,
hai mampeuláꞌi oaꞌ párentáNa.c
19 PUEꞌ mepárentá hangko i pehodaꞌá kadatuáNa i surugáꞌ.
Ia miꞌi Datu to makuasaꞌ i hinángkáꞌna to ara.
20 Ee malaꞌeka to maróhó, to mampehádingi ngkóráꞌNa
hai mampeuláꞌi oaꞌ párentáNa,
nitóiá miꞌi PUEꞌ.
21 Ee upu-upu malaꞌekaNa to i surugáꞌ,
to mampeuláꞌi peundeꞌáNa,
nitóiá miꞌi PUEꞌ.
22 Ee hinángkáꞌ to Napopewaliꞌ,
nitóiá miꞌi PUEꞌ iumbá peá Ia mepárentá.
KutóiáKoꞌ PUEꞌ hangko i lalungkuꞌ ntepuꞌu!