Pekakae i lalu kapári
102
Pekakaena hadua tauna to mapári. I tempóna maledeꞌ, ia mopahaweꞌ kamapárina i PUEꞌ.
2 Ó PUEꞌ, kupembiáꞌ bona Nupehádingi pekakaengkuꞌ,
kuhárungá peraruaꞌkuꞌ membiáꞌ tulungi haweꞌ i Hio.
3 Ineeꞌaꞌ Nutaleuki i tempóngkuꞌ masusa.
Nupehádingi peraruaꞌkuꞌ,
hai hawiáꞌKoꞌ mohániki pekakaengkuꞌ.
4 Láwiꞌ katueꞌkuꞌ ina matántá nodo rámbu,
wátángkuꞌ maꞌámuꞌ nodo to nalálá api.
5 Maledeꞌaꞌ nodo rumpuꞌ to malau,
haneꞌi tiꞌara naita inaongkuꞌ mandeꞌ.
6 Peraruaꞌkuꞌ masimbuku,
wátángkuꞌ maduhuꞌ, buꞌungkuꞌ perái.
7 Nodoaꞌ tádáhi to maila i pádá loriꞌ,
nodoaꞌ kálákiá i támbi to magero.
8 Tiꞌaraꞌaꞌ peisá letaꞌ,
nodoaꞌ tádáhi to mosamambaꞌa i halopio támbi.
9 Hangalo-hangalo rasasalaꞌiaꞌ ewálingkuꞌ,
tauna to motitibeiaꞌ mekamboheꞌ mokábelái hangaꞌkuꞌ.a
10 Awu to mewaliꞌ pandeꞌkuꞌ,
painungkuꞌ mogalo hai uwai mátángkuꞌ,
11 láwiꞌ Nuángkáꞌmoꞌ haneꞌiaꞌ Nutibe,
ánti karumihina kamabukoꞌMu i kódóꞌ.
12 Katueꞌkuꞌ ina hópóꞌ miꞌi nodo babaio tempó kalumbaꞌ.
Maledeꞌaꞌ nodo rumpuꞌ to malau.
13 Agáiáná Io PUEꞌ, makuasaꞌKoꞌ mepárentá haweꞌ i rue-ruena,
hai tauna mambuhinaoKoꞌ oaꞌ haweꞌ-haweꞌ i pemuleꞌáraꞌ.
14 Io haduduáMu to ina mampokaꞌahiꞌ hai moaró huleꞌ Sio,
láwiꞌ haweꞌ miꞌi tempó to Nupakanótó miꞌi ami
ina mowátiꞌ kótá iti.
15 Kaiꞌ taunáMu, kikabilai hai kipomahile kótá Sio,
kehapiꞌ magero miꞌi, mewaliꞌ perái watu hai awu.
16-17 I tempóna PUEꞌ ina moaró huleꞌ Sio,
hai mopatongawaꞌ peawaꞌNa,
upu-upu tauna i duniáꞌ ina mengkoruꞌ i Hia,
hai upu-upu datu ina mobiláꞌ peawaꞌNa.
18 Ia ina mampehádingi pekakaeraꞌ tauna
to tiꞌarapoheꞌ poapa-apa,
hai mopabukeꞌi pembiáꞌraꞌ.
19 Hangaa-ngaa taukiꞌ apa to nabábehi PUEꞌ,
bona Ia ratóiá oaꞌ pemuleꞌántaꞌ to ina haweꞌ
hai tauna to tiꞌara mani mesupaꞌ.
20 PUEꞌ mampetiro tauna to i duniáꞌ
hangko i surugáꞌ to magasaꞌ,
21 bona mampehádingi peraruaꞌraꞌ tauna to ratarungku,
hai mokábáháheꞌ tauna to rabutusi
ina rahuku mate.
22 Onoꞌ haneꞌi tauna i Sio ina mobámbáriheꞌ hangaꞌna PUEꞌ,
hai Ia ina ratóiá i kótá Ierusale.
23 Iti ina mewaliꞌ i tempóna tauna hangko i humalele duniáꞌ
hirámpuheꞌ menómbá i PUEꞌ.
24 PUEꞌ mopamaledeꞌaꞌ i tempóngkuꞌ maleheꞌ mani,
hai moparembe tinuwuꞌkuꞌ.
25 Mewaliꞌ kuꞌuliꞌ, “Pueꞌ Ala to kupenómbái,
ineeꞌ Nuala peinaongkuꞌ
ane tiꞌara mani haweꞌ tempóna.
Io araKoꞌ oaꞌ haweꞌ i rue-ruena.
26 Hangkoia mampopewaliꞌKoꞌ duniáꞌ,
hai mopaꞌaraKoꞌ langiꞌ.
27 Upu-upuna iti ina tuna, agáiáná Io araKoꞌ oaꞌ,
hai upu-upu iti ina mewaliꞌ sae.
Nodo waruꞌ to tiꞌara piꞌi rapakeꞌ,
ina Nupaháwángi.
28 Agáiáná Io, tiꞌaraKoꞌ mambáliꞌ.
KatueꞌMu tiꞌara ina mokahópóꞌá.
29 Kaiꞌ taunáMu hai pemuleꞌángkiꞌ,
ina tueꞌangkaiꞌ i katinda lalu,
hai pemuleꞌángkiꞌ ina ara oaꞌ i pekámpáiMu.”