Pekakae membiáꞌ tulungi
57
I topoánti toponani. Mouláꞌ nani “Ineeꞌkoꞌ mopatuna.” Nanina Daudiꞌ mokana i tempóna melangka hangko i Saulu lao mebuni i lalu balamba.a
2 Nupokaꞌahiꞌaꞌ Pueꞌ Ala, Nupokaꞌahiꞌaꞌ,
láwiꞌ mengkatueꞌaꞌ i Hio
nodo ánáꞌ tádáhi lao i hinána bona naóbóki
duuꞌna liu miꞌi to mepahurewuꞌ.
3 Mekakaeaꞌ i Pueꞌ Ala to i Surugáꞌ,
i Pueꞌ Ala to mampelaeaꞌ i kamapáringkuꞌ.
4 Ia mohánikiaꞌ hangko i surugáꞌ hai Napelaeaꞌ.
Ia mokámbáróá tauna to mampopeahiahiꞌaꞌ.
Pueꞌ Ala ina mopatongawaꞌ kamaꞌahiꞌNa hai katetidaꞌNa i kódóꞌ.
5 Kódóꞌ araꞌaꞌ i oloꞌraꞌ ewali
to nodoheꞌ singá to moandeꞌ tauna.
Ngihiraꞌ maumbiꞌ nodo tawalaꞌ hai panaꞌ,
lilaꞌraꞌ mataru nodo pihoꞌ.
6 Ó Pueꞌ Ala, kipembiáꞌ bona Nupatongawaꞌ kamakuasaꞌMu i langiꞌ,
hai peawaꞌMu i humalele duniáꞌ.
7 Ewálingkuꞌ mopári-páriheꞌ ina mohakaꞌaꞌ,
rapakósóꞌaꞌ.
Mokaeheꞌ taroboꞌ bona manawoꞌaꞌ,
mole hira riꞌi to manawoꞌ.
8 Ó Pueꞌ Ala, maróhó pehárungángkuꞌ i Hio.
Ina monaniaꞌ nani petóiá i Hio.
9 Hangko tiꞌara mani membeto alo,
ina mearóaꞌ hai monani.
Ina mokáwiꞌaꞌ gambusuꞌ hai kasapi.
10 Ó Pueꞌ, ina kutóiáKoꞌ i oloꞌraꞌ tauna i duniáꞌ,
ina monaniaꞌ nani petóiá i oloꞌraꞌ tina-tina,
11 láwiꞌ kamaꞌahiꞌMu mahile haweꞌ i langiꞌ,
hai katetidaꞌMu mapángkáꞌ hangko i gawu.
12 Ó Pueꞌ Ala, kipembiáꞌ bona Nupatongawaꞌ kamakuasaꞌMu i langiꞌ,
hai peawaꞌMu i humalele duniáꞌ.