Pehárungá i Pueꞌ Ala
56
I topoánti toponani. Rananika mouláꞌ nani “Manggebodoꞌ to mesóndáꞌ i kau to marumbu to karaoꞌ.” Nani to nakáráhi Daudiꞌ tempóna rahakaꞌ toPelisitiꞌ i kótá Gati.a
2 Ó Pueꞌ Ala, Nupokaꞌahiꞌaꞌ wongkódóꞌá,
láwiꞌ ara to mampopeahiahiꞌaꞌ.
Maiheꞌ ewálingkuꞌ moduluaꞌ oaꞌ.
3 Hangaloá-loá, rapopeahiahiꞌaꞌ.
Ánti kamaꞌángkáꞌraꞌ, handaꞌ tauna mombeala hai kódóꞌ.
4 Tempóngkuꞌ malááꞌ, mehárungáꞌaꞌ i Hio.
5 Kutóiá Pueꞌ Ala láwiꞌ Ia modándi ina motulungiaꞌ.
Mehárungáꞌaꞌ i Pueꞌ Ala, onoꞌ haneꞌi tiꞌaraꞌaꞌ malááꞌ.
Apa paꞌi to peisá rabábehi tauna i kódóꞌ?b
6 Hangaloá-loá, ewálingkuꞌ mopamapáriaꞌ,
moliwo peheꞌ oaꞌ mobábehi to kadake i kódóꞌ.
7 Mohintuwuꞌheꞌ mampenongkokiaꞌ,
hai mokamataheꞌ apa to kubábehi
láwiꞌ rapoinao ina mopapateaꞌ.
8 Tauna to moundeꞌ peheꞌ mobábehi to kadake,
ineeꞌheꞌ Nupatodáhi tekábáhá.
Ó Pueꞌ Ala, Nupatongawaꞌ kamabukoꞌMu i hira
hai Nupakanawoꞌheꞌ.
9 Nuisánto kamapáringkuꞌ.
Uwai mátángkuꞌ Nuwoli i lalu butoloꞌMu.
Tiꞌara paꞌi upu-upuna Nuꞌukiꞌ i lalu suraMu?
10 Tempóngkuꞌ meraruaꞌ membiáꞌ tulungi i Hio,
ewálingkuꞌ ina mosuliꞌheꞌ.
Kupoinálái Pueꞌ Ala to mampeámpáráiaꞌ.
11 Kutóiá Pueꞌ Ala láwiꞌ Ia modándi ina motulungiaꞌ,
kutóiá PUEꞌ láwiꞌ Ia modándi ina motulungiaꞌ.
12 Mehárungáꞌaꞌ i Pueꞌ Ala, onoꞌ haneꞌi tiꞌaraꞌaꞌ malááꞌ.
Apa paꞌi to peisá rabábehi tauna i kódóꞌ?
13 Ó Pueꞌ Ala, apa to kudándi i Hio
ina kupabukeꞌi.
Ina mampopenómbáꞌaꞌ binataꞌ
tandaꞌ popahaweꞌkuꞌ handaꞌ kamaroꞌana i Hio,
14 láwiꞌ Nupelaemoꞌ hangko i kapate,
Nukámpái katueꞌkuꞌ haneꞌi tiꞌaraꞌaꞌ manawoꞌ.
Onoꞌ miꞌi haneꞌi tueꞌaꞌ hungkuꞌ i Hio
i lalu pewangkaꞌ to moánti katueꞌ i tauna.c