Pekakae membiáꞌ tulungi láwiꞌ ara to meꞌewaꞌ
55
I topoánti toponani. Rananika hai kasapi. Nani pepaturoꞌ to nakáráhi Daudiꞌ.
2 Ó Pueꞌ Ala, Nupehádingi pekakaengkuꞌ.
Ineeꞌ Nupengkaniika pembiáꞌkuꞌ.
3 Nupailalu pembiáꞌkuꞌ hai Nuhánikiaꞌ.
Pekiringkuꞌ tiꞌara tinda láwiꞌ masusa ntepuꞌu lalungkuꞌ
4 ánti kamepáráráiraꞌ ewálingkuꞌ,
hai karapopeahiahiꞌkuꞌ tauna to kadake.
Mopamapáriheꞌ katueꞌkuꞌ,
hai rapoewaliꞌáꞌaꞌ ánti kamabukoꞌraꞌ i kódóꞌ.
5 Masusa ntepuꞌu lalungkuꞌ,
malááꞌaꞌ i kapate to ina morampeaꞌ.
6 Moridiꞌaꞌ humawátá
ánti kamalááꞌkuꞌ.
7 Kuꞌuliꞌ i lalungkuꞌ, “Kearai kápingkuꞌ nodo manggebodoꞌ,
kemembaraꞌaꞌ mampeliꞌ katoroꞌá to malaheꞌ.
8 Ina membaraꞌaꞌ karaoꞌ ntepuꞌu
hai toroꞌaꞌ i pádá loriꞌ.
9 Ina manggaguaꞌ mampeliꞌ pengkatiháláꞌángkuꞌ,
bona tiꞌaraꞌaꞌ ralámbiꞌ ewálingkuꞌ to nodo wui mpeangi.”
10 Ó Pueꞌ, kupembiáꞌ bona Nupawuliheꞌ ewálingkuꞌ,
hai Nupopontaniꞌ-ntaniꞌ polaluitaraꞌ,
láwiꞌ kuita kamasekeraꞌ hai kamohiororaꞌ i lalu kótá.
11 Mabaa hai káindi molumaoheꞌ i wongko bente to motolelingi kótá,
hai i lalu kótá mobábehiheꞌ to kadake mopamapáriheꞌ tauna.
12 Iumbá-umbá peá, tauna to kadake mogero pohintuwuꞌ,
mepopeahiahiꞌ hai mebagiuꞌheꞌ i kahirámpuá tauna.
13 Ane ewálingkuꞌ to mopakóiꞌaꞌ,
peisá mani kutaha.
Ane to mampepemahile to mokáhihiꞌaꞌ,
peisá maniaꞌ mebuni.
14 Agáiáná io, to kurekeꞌmokoꞌ rángángkuꞌ to hungkuꞌ,
balengkuꞌ to kupoinálái, mewaliꞌrakoꞌ ewálingkuꞌ.
15 Iaꞌo mobalekeꞌ, hai hingkakanikeꞌ
lao menómbá i támbina Pueꞌ Ala.
16 Hampóáꞌworia ewálingkuꞌheꞌ ina mate hangkaꞌ-hangkaꞌ,
hai mendáuluheꞌ tueꞌ-tueꞌ i duniáꞌraꞌ tomate,
láwiꞌ kakadake ara i laluraꞌ.
17 Agáiáná kódóꞌ, meraruaꞌaꞌ i Pueꞌ Ala membiáꞌ tulungi,
hai PUEꞌ ina motulungiaꞌ.
18 Mepulo, kalialó hai kalumbaꞌ,a
meraruaꞌ hai teriaꞌaꞌ.
Ia mampehádingi apa to kupahaweꞌ i Hia.
19 Kehapiꞌ handaꞌheꞌ to moewaꞌaꞌ,
agáiáná Nakábáháꞌaꞌ hangko i pombeala.
20 Pueꞌ Ala to mepárentá hangko i rungu-runguna
ina mampehádingi pekakaengkuꞌ,
hai ina Napaiwóiꞌheꞌ láwiꞌ tiꞌaraheꞌ mau mobáliki bábehiáraꞌ,
hai tiꞌaraheꞌ mengkoruꞌ i Hia.
21 Rángángkuꞌ moewaꞌ rángánaheꞌ,
ia moliungi dándina.
22 Laluitana maꞌálusuꞌ mopamalulu rángánaheꞌ,
agáiáná i laluna mokáhihiꞌ tauna.
Polaluitana maꞌálu ntepuꞌu,
agáiáná metaiꞌ nodo pihoꞌ.
23 Nupaisarenga kamapárina katueꞌmu i PUEꞌ,
Ia ina mokádipurákoꞌ.
Ia tiꞌara ina mopatodáhi tauna to manótó
manawoꞌ haweꞌ i rue-ruena.
24 Agáiáná Io Pueꞌ Ala ina monawoꞌheꞌ tauna to kadake
i pingke to kaladu,
tauna to moundeꞌ mopapate hai mobagiuꞌ hángká rángáraꞌ,
tiꞌaraheꞌ ina Nupaliu motámbái tinuwuꞌraꞌ.
Agáiáná kódóꞌ deꞌe, mehárungáꞌaꞌ i Hio.