Pekakae membiáꞌ bona Pueꞌ Ala mohuku tauna to kadake
58
I topoánti toponani. Rananika mouláꞌ nani “Ineeꞌkoꞌ mopatuna.” Nanina Daudiꞌ.
2 Ee to makuasaꞌ! Hintotoꞌ paꞌi pobutusimi?
Manoroꞌ paꞌi lalumi ane mopáresáꞌkou tauna?
3 Tiꞌara! Ngkáliꞌna riꞌi, moliwo pekou mobábehi to kadake,
hai masekekou oaꞌ i duniáꞌ.
4 Hangko i karapoánákaraꞌ, tauna to kadake mobábehiheꞌ salaꞌ,
modongkoꞌheꞌ hangko i lalu taꞌina ináraꞌ.
5 Polaluitaraꞌ mobisa nodo lelótó,
mentibongoꞌheꞌ nodo alimaoꞌ
6 to tiꞌara piꞌi mampehádingi básána pueꞌna.
7 Ó Pueꞌ Ala, kupembiáꞌ bona Nurupuꞌ bágáraꞌ i lalu ngángáraꞌ.
Ó PUEꞌ, Nutepóꞌ-tepóꞌ ngihiraꞌ tauna to kadake to nodoheꞌ singá.
8 Nupatodáhiheꞌ matántá nodo uwai to maꞌáti,
hampóáꞌworia mateheꞌ nodo rumpuꞌ i tangaꞌ rárá.
9 Hampóáꞌworia marupuꞌheꞌ nodo kamarupuꞌna tanampohiꞌ,
hai nodoheꞌ ánáꞌlei to mate hangko tiꞌara mani moita alo.
10 Hangko tiꞌara mani raisá apa to ina mewaliꞌ, tunamoheꞌ
nodo kori tampoꞌ to marupuꞌ hangko tiꞌara mani tueꞌ api.a
11 Tauna to manótó ina góeꞌheꞌ
moita Pueꞌ Ala moháwángi bábehiáraꞌ tauna to kadake.
Ina mokada-kadaheꞌ waheꞌraꞌ tauna to kadake.
12 Onoꞌ miꞌi haneꞌi ina rauliꞌ tauna:
“Tauna to manótó bateꞌna ina molámbiꞌ háwángina.
Tongawaꞌ Pueꞌ Ala to mobutusi i kanótó-nótóána
bábehiána upu-upu tauna i duniáꞌ.”