Pekakae bona Pueꞌ Ala mokámpái hangko i ewali
59
I topoánti toponani. Rananika mouláꞌ nani “Ineeꞌkoꞌ mopatuna.” Nanina Daudiꞌ mokana i tempóna Saulu mohuoꞌ tauna lao mopapate Daudiꞌ i támbina.a
2 Ó Pueꞌ Ala to kupenómbái.
Nukábáháꞌaꞌ wongkódóꞌá hangko i ewálingkuꞌ,
Nukámpáiaꞌ hangko i tauna to moewaꞌaꞌ.
3 Nukábáháꞌaꞌ hangko i tauna to mobábehi to kadake,
hai Nupelaeaꞌ hangko i tauna to moundeꞌ mepapate.
4 Peita, ralawaꞌaꞌ, láwiꞌ ina rapapateaꞌ.
Tauna to maseke himpuduheꞌ ina mombeala hai kódóꞌ.
Mole riꞌi PUEꞌ, tiꞌaraꞌaꞌ moliungi hawaꞌMu
hai tiꞌaraꞌaꞌ madósá.
5-6 Kehapiꞌ tiꞌara ara salaꞌkuꞌ, manggaguheꞌ
bona timamaheꞌ ina medulu.
Ó PUEꞌ Ala to Makuasaꞌ, maiKoꞌ Nutulungiaꞌ.
Nupeita apa to pewaliꞌ i kódóꞌ,
láwiꞌ Io miꞌi Pueꞌ Ala to rapenómbái toSáráeliꞌ.
Kupembiáꞌ bona Nuhukuheꞌ tauna i tampoꞌ ntániꞌna
to tiꞌara toSáráeliꞌ.
Ineeꞌ Nupatongawaꞌ kamaꞌahiꞌMu i tauna to kadake
to mampehuhuꞌá hángká rángáraꞌ i ewali.
7 Támpu miꞌi alo, haweꞌ wopaheꞌ.
Meloloꞌheꞌ nodo ahu, motolelingiheꞌ kótá.
8 Meuliꞌ-uliꞌ hai mepakóiꞌheꞌ.
Polaluitaraꞌ metaiꞌ nodo pihoꞌ,
láwiꞌ rauliꞌ ripaꞌi tiꞌaraheꞌ ara to mohádi.
9 Agáiáná Io PUEꞌ, Nupatawaiheꞌ.
Nusasalaꞌiheꞌ upu-upu tauna i duniáꞌ
to tiꞌaraKoꞌ moisá.
10 Io to mampoweꞌiaꞌ róhó, mehárungáꞌaꞌ i Hio
láwiꞌ Io Pueꞌ Ala to mokámpáiaꞌ nodo bente.
11 Pueꞌ Ala mampokaꞌahiꞌaꞌ hai ina mai motulungiaꞌ,
onoꞌ miꞌi haneꞌi ina Napopaitaꞌáꞌaꞌ kamonangiNa ewálingkuꞌ.
12 Ó Pueꞌ, ineeꞌheꞌ Nupapate ewálingkuꞌ
bona taunáMu tiꞌaraheꞌ mokáláliꞌá {noumbá pohukuMu ewali}.
Nupopogááꞌ-gááꞌheꞌ, Nupamanangiheꞌ,
láwiꞌ Io nodo lábá to mokámpáiangkaiꞌ.
13 Hampóáꞌworia ina manawoꞌheꞌ ánti kamaꞌángkáꞌraꞌ,
láwiꞌ polaluitaraꞌ mopatongawaꞌ kamadósáraꞌ.
Mohuwáráheꞌ pekambo hai laluita pebagiuꞌ.
14 Nuropuꞌheꞌ ánti kamabukoꞌMu
duuꞌna tiꞌarapoheꞌ ara.
Hangko ionoꞌ ina raisá tauna i humalele duniáꞌ
Io miꞌi Pueꞌ Ala to mopárentáheꞌ toSáráeliꞌ,
iamoheꞌ pemuleꞌána Iako.
15 Támpu alo, haweꞌ wopaheꞌ tauna to kadake.
Meloloꞌheꞌ nodo ahu, motolelingiheꞌ kótá.
16 Mampeliꞌheꞌ pandeꞌraꞌ iumbá-umbá peá.
Ane tiꞌaraheꞌ mabuhu, mehume-hume wopaheꞌ.
17 Agáiáná ina kutóiáKoꞌ ánti kamakuasaꞌMu.
Hampepulo-hampepulo ina kunanika kamaꞌahiꞌMu,
láwiꞌ Io miꞌi to mokámpáiaꞌ nodo bente.
Io miꞌi pengkatueꞌángkuꞌ i tempóngkuꞌ narampe kapári.
18 Ó Pueꞌ Ala to mampoweꞌiaꞌ róhó,
ina monaniaꞌ motóiáKoꞌ,
láwiꞌ Io miꞌi Pueꞌ Ala to mokámpáiaꞌ nodo bente,
Pueꞌ Ala to maꞌahiꞌ oaꞌ i kódóꞌ.