Pekakae membiáꞌ tulungi
60
I topoánti toponani. Rananika mouláꞌ nani “Bungaꞌ Bakung mosabiki.” Nani pepaturoꞌ to nakáráhi Daudiꞌ2 mokana i tempóna mampombealaꞌáheꞌ toÁrá hangko i tampoꞌ Mesopotamia hai toÁrá hangko i Siria.a Kana woꞌo i tempóna Ioabiꞌ mesuleꞌ hai mopapate hampuloꞌ hai rosábu toEdo i lembo Bure.b
3 Ó Pueꞌ Ala, Nupálehimongkaiꞌ
hai Nupatodáhiangkaiꞌ ranangi ewálingkiꞌ
láwiꞌ mabukoꞌKoꞌ i kaiꞌ,
mewaliꞌ deꞌe-deꞌe kipembiáꞌ bona Nupamaroꞌaꞌangkaiꞌ huleꞌ.
4 MopaꞌaraKoꞌ linu to rumihi,
haneꞌi tampoꞌ mompagááꞌ-gááꞌ.
Kupembiáꞌ bona Nupakaróhó tampoꞌkiꞌ
láwiꞌ moenggo-enggo.
5 Nupatodáhimongkaiꞌ taunáMu molámbiꞌ kapári to matimi.
Ánti kamabukoꞌMu, nodoangkaiꞌ to Nupopainu anggoroꞌ to melángui.c
6 Agáiáná i tauna to mengkoruꞌ i Hio, Nuweꞌiheꞌ bánderá
bona raisá kamekámpáiMu i pombeala.
7 Kupembiáꞌ bona Nupopenangiangkaiꞌ ánti kamakuasaꞌMu,
Nupehádingi pekakaengkuꞌ bona tauna to Nupokaꞌahiꞌ tepelae.
8 Pueꞌ Ala mongkóráꞌ miꞌi hangko i katoroꞌáNa to magasaꞌ,
Nauliꞌ, “Ina góeꞌ ntepuꞌuAꞌ mogáláꞌ-gáláꞌ tampoꞌ Sikeꞌ,
hai lembo Sukoꞌ ina Kuhukáꞌ.
9 Kódóꞌ miꞌi to mampopueꞌ tampoꞌ Gileaꞌ hai Manase,d
tampoꞌ Eparai nodo sóngkó wájá to mokámpái wuáꞌKuꞌ,e
hai tampoꞌ Iudá nodo laiꞌ kadatuáNgkuꞌ.f
10 Agáiáná tampoꞌ Moabiꞌ nodo pobahoꞌiá bitiNgkuꞌ.g
Kutelánga sandaleNgkuꞌ i tampoꞌ Edo,
tandaꞌna kaKódóꞌna miꞌi pueꞌna.
Góeꞌ ntepuꞌuAꞌ láwiꞌ monangiMoꞌ toPelisitiꞌ.”
11 Heáná to ina moántiaꞌ lao i tampoꞌ Edo?
Heáná to ina moteteꞌaꞌ lao i kótá to rabente ionoꞌ?
12 Tiꞌara paꞌi Io Pueꞌ Ala? Agáiáná Nupálehimongkaiꞌ
hai tiꞌarapoKoꞌ mau hingkakani hai surudadoꞌkiꞌ
mampombealaꞌá ewálingkiꞌ.
13 Kupembiáꞌ bona Io to mampelaeangkaiꞌ hangko i ewálingkiꞌ,
láwiꞌ petulungi to hangko i tauna mbero-mbero peá.
14 Ane naporángákeꞌ Pueꞌ Ala, ina maróhókeꞌ,
láwiꞌ Ia miꞌi to ina monangiheꞌ ewálintaꞌ.