Pekakae membiáꞌ pekámpáina Pueꞌ Ala
61
I topoánti toponani. Rananika hai kasapi. Nanina Daudiꞌ.
2 Ó Pueꞌ Ala, kupembiáꞌ bona Nupehádingi peraruaꞌkuꞌ,
hai Nupailalu pekakaengkuꞌ.
3 Hangko i wuntu duniáꞌ meraruaꞌaꞌ i Hio,
láwiꞌ mapári gaga kuhádi.
Nuteteꞌaꞌ lao i buluꞌ watu to mapángkáꞌ ntepuꞌu,
4 láwiꞌ Io miꞌi pengkatueꞌángkuꞌ,
peantoꞌá to maróhó to mokámpáiaꞌ hangko i ewálingkuꞌ.
5 Kupembiáꞌ bona Nupatoroꞌaꞌ i támbiMu haweꞌ i rue-ruena,
hai Nukámpáiaꞌ nodo tádáhi to moꞌóbóki ánáꞌna,
6 láwiꞌ Io Pueꞌ Ala, mampehádingimoKoꞌ dándingkuꞌ,
hai mobukekiKoꞌ pembiáꞌraꞌ tauna to mengkoruꞌ i Hio.
7 Hampóáꞌworia datu ina matinuwuꞌ
haweꞌ-haweꞌ i pemuleꞌánaheꞌ.
8 Ó Pueꞌ Ala, hampóáꞌworia datu
ina mepárentá haweꞌ i rue-ruena,
láwiꞌ ia to Nupileꞌi miꞌi.
Kupembiáꞌ bona Nukámpái katueꞌna
ánti pepokaꞌahiꞌMu hai katetidaꞌMu i hia.
9 Ina monaniaꞌ oaꞌ nani petóiá
mampomahile hangaꞌMu.
Hangalo-hangalo ina kubukeki dándingkuꞌ.