Pehárungá bateꞌna peá i Pueꞌ Ala
62
I Iedutu,a topoánti toponani. Nani to nakáráhi Daudiꞌ.
2 I Pueꞌ Ala peá molámbiꞌaꞌ katinda lalu
láwiꞌ Ia miꞌi to mampelaeaꞌ.
3 Ia peá buluꞌ watu, pengkatueꞌángkuꞌ,
Ia nodo bente kótá to mokámpáiaꞌ haneꞌi maróhóaꞌ oaꞌ.
4 Ee ewálingkuꞌ, hangapa mani kamaruemi
ina mombeala hai moropuꞌaꞌ.
Maledeꞌaꞌ nodo rindi to motulándá
hai bosoꞌ to ina maꞌambaꞌ.
5 Nipoinao peá ina mampopendáuluaꞌ
hangko i lántiꞌkuꞌ to mapángkáꞌ.
Niundeꞌ peá modongkoꞌ.
I humemi mohuwárákou pewátiꞌ,
agáiáná i lalumi, mekambokou.
6 I Pueꞌ Ala peá molámbiꞌaꞌ katinda lalu,
láwiꞌ Ia peá pehárungáꞌángkuꞌ.
7 Ia peá buluꞌ watu, pengkatueꞌángkuꞌ.
Ia nodo bente kótá to mokámpáiaꞌ haneꞌi maróhóaꞌ oaꞌ.
8 Pueꞌ Ala to mampelaeaꞌ hai mampopewaliꞌaꞌ to teádái,
Ia nodo buluꞌ watu to maróhó, pengkatueꞌángkuꞌ.
9 Ee taunángkuꞌ, mehárungákou oaꞌ i Pueꞌ Ala.
Nipahaweꞌ i Hia upu-upu óntóꞌ lalumi,
láwiꞌ Pueꞌ Ala pengkatueꞌántaꞌ.
10 Tauna to i wóiꞌ hai to i reá tueꞌraꞌ,
nodo peheꞌ wui, mbero-mbero katueꞌraꞌ.
Ane ratimbáheꞌ, hibali peheꞌ,
upu-upuraꞌ manangkoꞌ maniheꞌ hangko i wui.
11 Ineeꞌ nihárungá ara to ina niperampaꞌi.
Ineeꞌ nihárungá párewá to nipanako
láwiꞌ ina mbero-mbero peá.
Ane mantámbái kapebukumi,
ineeꞌ tetakaꞌ lalumi i hinti.b
12 Hangkani peá Pueꞌ Ala mongkóráꞌ,
rompákáꞌ to kuhádi, ia miꞌi:
kuasaꞌ mentóáꞌ hangko i Pueꞌ Ala,
13 hai ahiꞌNa to tiꞌara madepuꞌ-depuꞌ.
Ó Pueꞌ, bateꞌna ina Nuháwángi upu-upu tauna
hintotoꞌ hai bábehiáraꞌ.