Mabilaꞌaꞌ i Pueꞌ
63
Nani to nakáráhi Daudiꞌ, mokana i tempóna ia ara i pádá loriꞌ Iudá.a
2 Ó Pueꞌ Ala, Io miꞌi Pueꞌ Ala to kupenómbái.
Mabilaꞌ ntepuꞌuaꞌ i Hio.
Kupoinao araꞌaꞌ oaꞌ i hintáiꞌmu.
KuparaluuKoꞌ oaꞌ,
nodo tampoꞌ to bangi hai maduhuꞌ
to moparaluu oaꞌ uwai.
3 KuitamoKoꞌ i támbiMu to magasaꞌ,
kusabiki miꞌi kamaróhóMu hai peawaꞌMu.
4 KamaꞌahiꞌMub melumbuꞌ kamaroꞌana hangko i katueꞌ,
onoꞌ miꞌi haneꞌi ina kupomahileKoꞌ.
5 Ina kutóiáKoꞌ oaꞌ lántuꞌángkuꞌ mani tueꞌ,
ina moángkáꞌaꞌ taengkuꞌ mekakae i Hio.
6 Ina kutóiáKoꞌ i kagóeꞌ-góeꞌ, láwiꞌ Nupogóeꞌaꞌ,
nodoaꞌ to mamporái pandeꞌ to matamaꞌ ntepuꞌu.c
7 Ane maturuaꞌ, kubuhinaoKoꞌ oaꞌ,
hambengiá-ngiá kupepekiriKoꞌ oaꞌ,
8 láwiꞌ Io to motulungimoꞌ.
Nukámpáiaꞌ nodo tádáhi to moꞌóbóki ánáꞌna,
hai kutóiáKoꞌ i kagóeꞌ-góeꞌ.
9 Tiꞌaraꞌaꞌ mengkábáhá i Hio,
láwiꞌ Io to mampoweꞌiaꞌ róhó.
10 Agáiáná tauna to mampoinao ina mopapateaꞌ
ina laoheꞌ i duniáꞌraꞌ tomate.
11 Ina mateheꞌ i pombealaꞌá,
hai ina mewaliꞌheꞌ pandeꞌraꞌ binataꞌ.
12 Agáiáná datu ina góeꞌ ánti petulungina Pueꞌ Ala.
Tauna to modándi i lalu hangaꞌna Pueꞌ Ala
ina mampomahileheꞌ Pueꞌ,
agáiáná humeraꞌ topodongkoꞌ ina ratuko.