Pehuku i tauna to kadake
64
I topoánti toponani. Nani to nakáráhi Daudiꞌ.
2 Ó Pueꞌ Ala, kupembiáꞌ bona Nupehádingiaꞌ tempóngkuꞌ meraruaꞌ,
Nukámpái katueꞌkuꞌ hangko i ewali to maseke.
3 Nuwuniaꞌ hangko i tauna to kadake,
to himpudumoheꞌ ina moewaꞌaꞌ.
4 Polaluitaraꞌ metaiꞌ nodo pihoꞌ,
hai mohuwáráheꞌ laluita to mataru nodo mata panaꞌ.
5 Hangko i pebuniáraꞌ,
hangkaꞌ-hangkaꞌ mohuwáráheꞌ laluita to mapana
i tauna to tiꞌara ara salaꞌna,
hai tiꞌaraheꞌ malááꞌ molaluita to noꞌonoꞌ.
6 Motibaaꞌheꞌ tunggáiáraꞌ to kadake,
moliwoheꞌ ngkaniiꞌ-niiꞌ ina mopakanawoꞌ tauna,
rauliꞌ, “Heáná paꞌi to ina moitakeꞌ?
7 Roomokeꞌ mopaꞌara poliwo to tiꞌara ara kamakuraꞌna!”
Mole riꞌi moliwoheꞌ mobábehi to tiꞌara hintotoꞌ.
Kaladu ntepuꞌu pekirina tauna. Tiꞌara taisá noumbá laluna.a
8 Agáiáná Pueꞌ Ala ina motembáꞌheꞌ hai panaꞌ.
Hangkaꞌ-hangkaꞌ tauna to kadake ina manangiheꞌ.
9 Polaluitaraꞌ haduduáraꞌ ina mopakanawoꞌheꞌ.
Heáná peá to moitaheꞌ ina mobibiliheꞌ tandaꞌ pepakóiꞌraꞌ.
10 Upu-upu tauna ina malááꞌheꞌ.
Ina mampepekiriheꞌ hai mobámbári
apa to nabábehi Pueꞌ Ala.
11 Tauna to manótó ina góeꞌheꞌ ánti apa to nabábehi PUEꞌ.
Ina mengkatueꞌheꞌ i Hia.
Upu-upu tauna to manótó ina mampomahileheꞌ Pueꞌ Ala.