Nani kagóeꞌ i Pueꞌ Ala ánti pewátiꞌNa
65
I topoánti toponani. Nani to nakáráhi Daudiꞌ.
2 Ó Pueꞌ Ala, bateꞌMu kitóiá i buluꞌ Sio,
hai mobukekiangkaiꞌ dándingkiꞌ i Hio.
3 Io miꞌi to mampehádingi pekakaengkiꞌ.
Upu-upu tauna lao i Hio.
4 Matimi gaga dósángkiꞌ,
agáiáná Io miꞌi to moámpungiangkaiꞌ.
5 Morasiꞌ miꞌi tauna to Nupileꞌi hai Nukióꞌ
bona toroꞌheꞌ i tangabaa támbiMu.
Góeꞌ ntepuꞌuangkaiꞌ ánti pewátiꞌ to kitarima
i lalu támbiMu to magasaꞌ.
6 Nubábehi tandaꞌ kuasaꞌ to meriringkuꞌi,
tandaꞌ kaNuhánikina miꞌi pekakaengkiꞌ,
hai Nupatongawaꞌ kamanótóMu.
Ó Pueꞌ Ala to mampelaeangkaiꞌ,
Io miꞌi pehárungáꞌáraꞌ upu-upu tauna i humalele duniáꞌ
haweꞌ-haweꞌ i puló-puló to karaoꞌ.
7 Moliu kuasaꞌMu,
Nupatindáꞌ buluꞌ-buluꞌ i kaꞌaraꞌána,
hai Nupatongawaꞌ kamahilena kamakuasaꞌMu.
8 Nupatinda pokalena bálumbá to rumihi i tahiꞌ,
hai Nupopengkaroo peꞌewaꞌraꞌ tauna i duniáꞌ.
9 Onoꞌ miꞌi haneꞌi tauna to toroꞌ i humalele duniáꞌ
malááꞌheꞌ moita tandaꞌ kuasaꞌMu to metingkáráki.
Hangko i pembetoá alo haweꞌ i katámpuána,
upu-upu tauna mohoraꞌ-horaꞌheꞌ ánti kagóeꞌraꞌ i Hio.
10 Nukádipurá tampoꞌ i duniáꞌ hai Nuꞌudái,
bona maruduꞌ hai handaꞌ wuaꞌna powiáꞌraꞌ tauna.
Poiliána uwai Nupabukeꞌ
hai Nupoweꞌiheꞌ pare bona ara to raꞌandeꞌ,
láwiꞌ iti miꞌi to Nupatimama.
11 Nupopendáulu udá bona moloeꞌi tampoꞌ to rapajekoꞌ,
láwiꞌ ane naudángiꞌi, tampoꞌ to matuꞌa mewaliꞌ mawuuꞌ,
hai tudaꞌ-tudaꞌ Nuwátiꞌ bona maruduꞌ.
12 Ánti kamaroꞌaMu, hampare-hampare
Nupopewaliꞌ wuaꞌna powiáꞌraꞌ,
hai iumbá-umbá peá kalaoáMu,
Nuántiáheꞌ to maroꞌa.
13 Tampoꞌ i pádá loriꞌ nakatueꞌi rumpuꞌ to maruduꞌ.
Buluꞌ-buluꞌ Nupopewaliꞌ nodo tauna to góeꞌ.
14 Handaꞌ ntepuꞌu bekeꞌ hai dimbá tueꞌ i pádá
hai handaꞌ ntepuꞌu pare tueꞌ i tampoꞌ iti.
Upu-upu iti peisá rapándiriꞌ nodo tauna to mohoraꞌ-horaꞌ
hai monani-nani ánti kagóeꞌraꞌ.