Nani kagóeꞌ i Pueꞌ Ala
66
I topoánti toponani. Nani petóiá.
Ee tauna i humalele duniáꞌ!
Mohoraꞌ-horaꞌmokou i Pueꞌ Ala ánti kagóeꞌmi.
2 Monanikou nani petóiá ánti peawaꞌNa.
Nipomahile miꞌi hai nani petóiámi.
3 Niuliꞌ i Pueꞌ Ala, “Meriringkuꞌi apa to Nubábehi!
Ánti kamaróhóna kuasaꞌMu, ewáliMu mengkoruꞌheꞌ i Hio.
4 Tauna i humalele duniáꞌ molingkudu menómbá i Hio,
hai monaniheꞌ motóiá hangaꞌMu.”
5 Maikou mampeita apa to nabábehi Pueꞌ Ala.
Meriringkuꞌi ntepuꞌu apa to Nabábehi i tauna.
6 Ia mobáliki tahiꞌ mewaliꞌ tampoꞌ to bangi,
hai toioruntaꞌ mengkalimbaheꞌ molumao i poráráꞌána uwai iti.
Onoꞌ miꞌi haneꞌi tapogóeꞌ upu-upu to Nabábehi.
7 Ia makuasaꞌ mepárentá haweꞌ i rue-ruena.
Ia mokamata hai mokámpái upu-upu tauna i duniáꞌ
bona tauna to moundeꞌ meꞌewaꞌ
tiꞌaraheꞌ peisá mampepemahile.
8 Ee upu-upu tauna to i duniáꞌ!
Nipomahile Pueꞌ Ala to kipenómbái,
bona petóiá iti tehádi ntepuꞌu.
9 Ia to mokámpái katueꞌkiꞌ,
tiꞌaraꞌangkaiꞌ Napatodáhi rapakanawoꞌ.
10 Láwiꞌ Io Pueꞌ Ala, Nupáresáꞌmongkaiꞌ,
Nupamagasaꞌmongkaiꞌ nodo peráꞌ rapopengkilaꞌ i api.a
11 Nupatodáhiheꞌ ewálingkiꞌ mohakaꞌangkaiꞌ,
hai Nupamatimiangkaiꞌ hai kapári to rumihi.
12 Nupatodáhi ewálingkiꞌ mokuasaꞌiangkaiꞌ
álána mapári katueꞌkiꞌ,
nodoangkaiꞌ to mengkalimba i lalu api
ba i uwai to kebuꞌu.
Agáiáná Nuántimongkaiꞌ i katoroꞌá to maroꞌa ntepuꞌu.
13 Ina mesuaꞌaꞌ i támbiMu
moánti popenómbángkuꞌ to raintu,
ina kubukeki dándingkuꞌ i Hio.
14 Dándi iti kuhuwárá
tempóngkuꞌ mapári.
15 Ina mointuaꞌ binataꞌ laki to maruduꞌ
kupopenómbá i Hio,
ia miꞌi dimbá, gapiꞌ hai bekeꞌ.
Rámbuna ina rumukuꞌ haweꞌ i Hio.
16 Maikou nipehádingi, upu-upukou to mengkoruꞌ i Pueꞌ Ala.
Ina kupodarita apa to Nabábehi i kódóꞌ.
17 Meraruaꞌaꞌ kupasimbuku i Hia membiáꞌ tulungi,
hai monaniaꞌ nani petóiá.
18 Kekuꞌundeꞌ mobábehi to kadake,
kehangaa-ngaa tiꞌara napehádingi Pueꞌ pekakaengkuꞌ.
19 Agáiáná Pueꞌ Ala mampehádingi mpuꞌu miꞌi peraruaꞌkuꞌ,
hai pekakae to kuhuwárá iti Napailalu.
20 Kutóiá Pueꞌ Ala
láwiꞌ Ia tiꞌara mosapuáka pekakaengkuꞌ,
hai tiꞌara mengkaroo mopatongawaꞌ kamaꞌahiꞌNa i kódóꞌ.