Pekakae bona upu-upu tauna motóiá Pueꞌ Ala
67
I topoánti toponani. Rananika hai kasapi. Nani penómbá.
2 Hampóáꞌworia Pueꞌ Ala mopatongawaꞌ kamaꞌahiꞌNa i kitaꞌ,
mowátiꞌkeꞌ, hai mampokagóeꞌkeꞌ.a
3 Ó Pueꞌ Ala, kipembiáꞌ bona ráráMu raisá tauna i humalele duniáꞌ,
hai upu-upu tauna ina moisáheꞌ kamakuasaꞌMu mampelaeheꞌ.
4 Ó Pueꞌ Ala, hampóáꞌworia tauna ina motóiáKoꞌ.
Hampóáꞌworia upu-upu tauna motóiáKoꞌ.
5 Hampóáꞌworia tauna to i duniáꞌ ina góeꞌ-góeꞌheꞌ
hai monani-naniheꞌ ánti kagóeꞌraꞌ,
láwiꞌ mepárentáKoꞌ i kanótó-nótóána,
hai moteteꞌKoꞌ tauna i humalele duniáꞌ.
6 Ó Pueꞌ Ala, hampóáꞌworia tauna ina motóiáKoꞌ.
Hampóáꞌworia upu-upu tauna motóiákoꞌ.
7 Pueꞌ Ala Pueꞌtaꞌ ina mowátiꞌkeꞌ,
álána maruduꞌ tampoꞌtaꞌ hai handaꞌ wuaꞌna powiáꞌna.
8 Hampóáꞌworia Pueꞌ Ala ina mowátiꞌkeꞌ,
bona upu-upu tauna i duniáꞌ ina mengkoruꞌheꞌ i Hia.