Penangina Pueꞌ Ala
68
I topoánti toponani. Nanina Daudiꞌ. Nani penómbá.
2 Pueꞌ Ala motulungimoheꞌ taunáNa,
haneꞌi ewáliNa tehawukaheꞌ.
Tauna to mokáhihiꞌ Pueꞌ Ala,
melangkaheꞌ hangko i Hia.a
3 Tauna to kadake napatunaheꞌ Pueꞌ Ala,
nodo rámbu to naꞌánti wui duuꞌna matántá,
hai taru to magonuꞌ naꞌandeꞌ api.
4 Agáiáná tauna to manótó góe-góeꞌheꞌ,
monaniheꞌ nani petóiá i lindoꞌna Pueꞌ Ala,
mohoraꞌ-horaꞌheꞌ ánti kagóeꞌraꞌ.
5 Monanikou motóiá Pueꞌ Ala!
Nipatimama rárá poliuána Pueꞌ to mesaweꞌ i gawu.
Hangaꞌna ia miꞌi PUEꞌ.b
Hangaa-ngaa góeꞌkou i lindoꞌNa.
6 Pueꞌ Ala toroꞌ i katoroꞌáNa to magasaꞌ.
Ia to mewaliꞌ umáraꞌ ánángkóiꞌ to ilu,
hai mampeámpárái tobembaꞌ.
7 Pueꞌ Ala mampeweꞌi katoroꞌá i tauna to tueꞌ mosadudua,
Ia mopasuwuꞌ tauna hangko i petarungkuá, haneꞌiheꞌ góeꞌ.
Agáiáná tauna to moewaꞌ Pueꞌ Ala
toroꞌ peheꞌ i tampoꞌ to bangi.
8 Ó Pueꞌ Ala, i tempóMu mampoioruá taunáMuheꞌ
molumao i pádá loriꞌ,
9 duniáꞌ melinu hai udá mentóáꞌ hangko i langiꞌ
tandaꞌ kahaweꞌMu i buluꞌ Sinai.
Io miꞌi Pueꞌ Ala to rapenómbái toSáráeliꞌ.
10 Ó Pueꞌ Ala, Nububuha udá to handaꞌ
bona moloeꞌi tampoꞌ to Nudándi miꞌic álána maruduꞌ.
11 TaunáMu mokatoroꞌi tampoꞌ iti.
Ánti kamaroꞌaMu, apa peá to raparaluu
tauna to rapopeahiahiꞌ, Nuweꞌiheꞌ.
12 Pueꞌ molaluita, hai handaꞌ towawine
mopahaweꞌheꞌ bámbári to maroꞌa iti,
13 rauliꞌ, “Datu-datu hai surudadoꞌraꞌ melangkamoheꞌ!
Hai towawine to ara i támbi
mogáláꞌ-gáláꞌheꞌ párewá to raperampaꞌi.
14 Mogalo riꞌi kómu to tiꞌarakou meuláꞌ mombeala,
molámbiꞌkou woꞌo gáláꞌmi, ia miꞌi buláwá hai peráꞌ.”
15 Tempóna To Makuasaꞌ mampopogááꞌ-gááꞌheꞌ datu,
mendáulu miꞌi salju i buluꞌ Salemo.d
16 Buluꞌ Basana ia miꞌi buluꞌ to meawaꞌ,
to handaꞌ buluꞌ-buluꞌna.
17 Ee buluꞌ-buluꞌ Basana, moapa riꞌi haneꞌi mahiniꞌkoꞌ i buluꞌ Sio,
buluꞌ to napileꞌi miꞌi Pueꞌ Ala mewaliꞌ katoroꞌáNa,
bona mepárentá hangko ionoꞌ haweꞌ i rue-ruena.
18 Kereta pombealana Pueꞌ Ala handaꞌ ntepuꞌu,
i sábuna kahandaꞌna.
Pueꞌ Ala haweꞌ miꞌi hangko i Sinai,
mesuaꞌ i támbiNa to magasaꞌ.
19 KarooNa monangi ewáliNa,
Ia mengkaoreꞌ lao i kapángkáꞌáNa.
Handaꞌ tawani to Naꞌánti,e
hai Ia motarima pampeweꞌi hangko i tauna,
tepasuaꞌ tauna to moewaꞌ, tandaꞌ kamanangiraꞌ,
bona PUEꞌ Ala toroꞌ i oloꞌraꞌ.
20 Tetóiá miꞌi Pueꞌ to monangkohi
kamapárina katueꞌtaꞌ hangalo-hangalo.
Ia miꞌi Pueꞌ Ala to motulungikeꞌ.
21 Pueꞌ Ala to tapenómbái, Ia miꞌi to mampelaekeꞌ.
Pueꞌ ALA Pueꞌkuꞌ to mokábáhákeꞌ hangko i kapate.
22 Pueꞌ Ala morupuꞌ wuáꞌraꞌ ewáliNa,
tauna to malóe weluáꞌraꞌf to mobábehi oaꞌ dósá.
23 Mongkóráꞌ miꞌi Pueꞌ, Nauliꞌ:
“Ina Kuántiheꞌ ewálimi hangko i Basana
hai hangko i tahiꞌ to kaladu,g
24 bona nikada-kada waheꞌraꞌ,
hai ralilaꞌi ahumi duuꞌna raporái.”h
25 Ó Pueꞌ Ala, tauna to handaꞌ ina mosabikiKoꞌ
tempóMu molumao moioruheꞌi láwiꞌ menangiKoꞌ,
tempóMu Pueꞌ Ala Datungkuꞌ
mesuaꞌ i katoroꞌáMu to magasaꞌ.
26 Toponani molumao ioru-oru,
ánáꞌntawine to mokadoꞌ rebana i tangaꞌ-tangaꞌ,
hai tauna to mokáwiꞌ kasapi molumao i bókóꞌ.
Node ponaniraꞌ:
27 “Nitóiá Pueꞌ Ala i kahirámpuámi menómbá!
Upu-upukou pemuleꞌána Iako,j nipomahile PUEꞌ!”
28 ToBenami, pemuleꞌánaheꞌ Iako to tiꞌara handaꞌ,
molumaoheꞌ ioru,k
hangko ionoꞌ, tadulako-tadulakoraꞌ toIudá to handaꞌ,
haneꞌi tadulako-tadulakoraꞌ toSebuloꞌ hai toNatali.l
29 Ó Pueꞌ Ala, kipembiáꞌ bona Nupatongawaꞌ
kuasaꞌMu hai kamaróhóMu,
nodo to Nupatongawaꞌ miꞌi hangkoia.
30 Datu-datu ina laoheꞌ i támbiMu i kótá Ierusale,
bona mohuhuꞌheꞌ pampeweꞌiraꞌ i Hio.
31 Kipembiáꞌ bona Nukámbáróáheꞌ toMásiriꞌ
to rapándiriꞌ nodo binataꞌ i lalu biroꞌ.m
Nukámbáróáꞌheꞌ tauna to makuasaꞌ i tampoꞌ ntániꞌna
to rapándiriꞌ nodo gapiꞌ laki i oloꞌraꞌ ánáꞌ gapiꞌ.
Nupaiwóiꞌheꞌ to mampeliꞌ peráꞌ.
Nupopogááꞌ-gááꞌheꞌ tauna to moundeꞌ mombeala.
32 Sulewátá datu hangko i tampoꞌ Másiriꞌ
ina moántiheꞌ párewá tambaga,
toEtiopia ina manggaguheꞌ
mohuhuꞌ pampeweꞌiraꞌ i Pueꞌ Ala.
33 Ee tauna i upu-upu kadatuá i duniáꞌ,
monanimokou nani petóiá i Pueꞌ Ala!
34 Ia to mesaweꞌ i kereta motolelingi langiꞌ
to Napopewaliꞌ hangkoia.
Ia mampopahádi wambaꞌNa to masimbuku ntepuꞌu.
35 Nipolaluita kamakuasaꞌna Pueꞌ Ala.
PopárentáNa meawaꞌ i tampoꞌ Sáráeliꞌ,
hai langiꞌ mopatongawaꞌ kamaróhóNa.
36 Pueꞌ Ala meawaꞌ ntepuꞌu
i lalu támbiNa to magasaꞌ.
Pueꞌ Ala to rapenómbái toSáráeliꞌ
mampeweꞌi róhó hai kuasaꞌ i taunáNaheꞌ.
Tetóiá miꞌi Pueꞌ Ala!