Pekakae i lalu kapári
69
I topoánti toponani. Rananika mouláꞌ nani “Bungaꞌ Bakung.” Nanina Daudiꞌ.
2 Ó Pueꞌ Ala, Nutulungiaꞌ,
láwiꞌ uwai to kebuꞌu haweꞌ miꞌi i támbólóngkuꞌ.
3 Haloloaꞌ i dondoꞌ to kaladu,
tiꞌara ara pengkadaꞌángkuꞌ.
Teduuꞌaꞌ i uwai to kaladu,
támpuaꞌ duuꞌkuꞌ mawaro.
4 Mawonggoꞌmoꞌ meraruaꞌ membiáꞌ tulungi.
Tandokoꞌkuꞌ bangi,
mátángkuꞌ piróꞌ
mampegiá petulungina Pueꞌ Ala to kupenómbái.
5 Tauna to mokáhihiꞌaꞌ, kehapiꞌ tiꞌara ara álásáraꞌ,
melumbuꞌ kahandaꞌraꞌ hangko i kahandaꞌna weluáꞌkuꞌ.
Handaꞌ ntepuꞌu tauna to mewaliꞌ ewálingkuꞌ,
kehapiꞌ tiꞌara ara ntóáꞌna.
Mampoinaoheꞌ mopapateaꞌ.
Rapasimbukuaꞌ ina mampopesuleꞌ párewá
to tiꞌaranto kuperampaꞌi.
6 Ó Pueꞌ Ala, nuisá kamasalaꞌkuꞌ,
hai kamadósángkuꞌ tiꞌara tewuniángi i Hio.
7 Ó Pueꞌ, Pueꞌ ALA to Makuasaꞌ,
ineeꞌ Nupatodáhi tauna to mehárungá i Hio
rapamahili ánti bábehiángkuꞌ.
Ó Pueꞌ Ala to rapenómbái toSáráeliꞌ,
ineeꞌ Nupatodáhi tauna to mau menómbá i Hio
rasasalaꞌi ánti kakódóꞌna.
8 Ewálingkuꞌ mopakóiꞌaꞌ láwiꞌ mepoináláiaꞌ i Hio Pueꞌ.
Lindoꞌkuꞌ kuháláꞌ láwiꞌ mahiliaꞌ.
9 Rapairawamoꞌ halalungkuꞌ hángká toSáráeliꞌkuꞌ,
pelumbuꞌna mani mewaliꞌmoꞌ nodo tohaweꞌ peaꞌ
i oloꞌraꞌ halalu hampembolo-mbolongkuꞌ.
10 Rumihi peundeꞌángkuꞌ bona TámbiMu Pueꞌ ina rabiláꞌ,a
hai upu-upu laluita to motitibei Pueꞌ Ala, kana miꞌi woꞌo i kódóꞌ.b
11 I tempóngkuꞌ mengkaiwóiꞌ hai mopuasaꞌ,
ara to mopakóiꞌaꞌ.
12 I tempóngkuꞌ mopakeꞌ waruꞌ karuꞌ tandaꞌ kamasusana lalungkuꞌ,
ara to mopatawaiaꞌ.
13 Kódóꞌ rauliꞌ-uliꞌaꞌ oaꞌ tauna to mehoda i babaꞌá kótá,
hai raponani-naniaꞌ tauna to malangu.
14 Agáiáná mekakaeaꞌ i Hio PUEꞌ
bona ina Nuhániki pekakaengkuꞌ i tempó to maroꞌa,
hai kupembiáꞌ i Hio Pueꞌ Ala, bona Nutulungiaꞌ,
ánti kamahilena ahiꞌMu to tiꞌara madepuꞌ-depuꞌ.
15 Nupelaeaꞌ hangko i tauna to mokáhihiꞌaꞌ,
láwiꞌ nodoaꞌ to i lalu dondoꞌ.
Ineeꞌaꞌ Nupatodáhi támpu
i lalu uwai to kaladu.
16 Ineeꞌaꞌ Nupatodáhi nawaroha uwai to kebuꞌu,
ba támpu i tahiꞌ to kaladu,
ba ratuko i lalu tibubuꞌ.
17 Ó PUEꞌ, kupembiáꞌ bona Nuhánikiaꞌ
ánti kamaroꞌana ahiꞌMu to tiꞌara madepuꞌ-depuꞌ.
Nupehaileꞌaꞌ, láwiꞌ Io miꞌi to bukeꞌ ahiꞌ.
18 Ineeꞌ Nutaleuki hawiꞌMu deꞌe.
Nupakawiáꞌ mohániki pekakaengkuꞌ,
láwiꞌ mapári kuhádi.
19 MaiKoꞌ mampelaeaꞌ,
Nukábáháꞌaꞌ hangko i ewálingkuꞌ.
20 Nuisá noumbá ewálingkuꞌ mosasalaꞌi,
mopakahili hai motitibeiaꞌ.
Upu-upu to moewaꞌaꞌ Nuisáheꞌ aha.
21 Pesasalaꞌiraꞌ iti mopamahái lalungkuꞌ
hai tiꞌara piꞌi ara pehárungángkuꞌ.
Kupegiá to ina mampokaꞌahiꞌaꞌ,
agáiáná tiꞌara ara.
Kuhárungá ara to ina mopalindó lalungkuꞌ,
agáiáná tiꞌara woꞌo ara.
22 Mogalo riꞌi pandeꞌ to raweꞌiaꞌ kuandeꞌ,
minána nodo rasu to mapaiꞌ.
Tempóngkuꞌ mangkadoꞌu,
rapopainuaꞌ anggoroꞌ to maisu.c
23 Ó Pueꞌ, hampóáꞌworia posusa kagóeꞌ-góeꞌraꞌ
ina mopakanawoꞌheꞌ,
haneꞌi molámbiꞌheꞌ rugiꞌ hai pehuku,
bona teháwángi bábehiáraꞌ to kadake.
24 Kupembiáꞌ bona Nupamakáindi pampeitáraꞌ
bona tiꞌaraheꞌ peisá meita.
Nupamapáriheꞌ duuꞌna maꞌángkárá pehádiraꞌ mantódihá.d
25 Nukabukoꞌiheꞌ hai Nuhukuheꞌ.
I kamabukoꞌMu, Nudápáꞌheꞌ duuꞌraꞌ Nuhakaꞌ.
26 Nupatodáhi katoroꞌáraꞌ malaheꞌ,
láwiꞌ tiꞌara piꞌi ara to toroꞌ ionoꞌ.
27 Kupembiáꞌ bona Nubábehi upu-upuna iti
láwiꞌ mampopeahiahiꞌheꞌ tauna to Nuhuku miꞌi.
Mampolaluitaheꞌ pantódiháraꞌ tauna to Nupamahái.
28 Kupembiáꞌ bona Nutámbái kamasalaꞌraꞌ
duuꞌna handaꞌ ntepuꞌu.
Ineeꞌheꞌ Nuámpungi.
29 Hampóáꞌworia Nuwoe hangaꞌraꞌ hangko i Sura Ngkatueꞌ.e
Ineeꞌheꞌ Nupasuaꞌ i poukiꞌá hangaꞌ-hangaꞌ tauna to manótó.
30 Agáiáná kódóꞌ deꞌe, mahái kuhádi mantódihá kapári.
Ó Pueꞌ Ala, kupembiáꞌ bona Nutulungiaꞌ hai Nukámpáiaꞌ.
31 Ina monaniaꞌ motóiá Pueꞌ Ala,
ina kupomahile Pueꞌ hai nani kagóeꞌ.
32 Upu-upuna iti melumbuꞌ mani kanaundeꞌna PUEꞌ
haneꞌi gapiꞌ laki to rapopenómbá,
gapiꞌ to motánduꞌ hai kanuꞌna to mabikáꞌ.f
33 Kómu to rapopeahiahiꞌ, peita apa to nabábehi Pueꞌ,
hai góeꞌ-góeꞌkou.
Kómu to mau menómbá i Pueꞌ Ala,
nipakaróhó huleꞌ lalumi,
34 láwiꞌ PUEꞌ mampehádingi pekakaeraꞌ tauna to meahiahiꞌ,
hai tiꞌara mopakóiꞌ taunáNa to ratarungku.
35 Upu-upukou to i langiꞌ hai i duniáꞌ, nitóiá miꞌi Pueꞌ,
noꞌonoꞌ woꞌo upu-upu to tueꞌ i lalu tahiꞌ,
36 láwiꞌ Pueꞌ Ala ina mampelae Sio,
hai moaró huleꞌ kótá-kótá i tampoꞌ Iudá,
bona tauna ina toroꞌ wopaheꞌ ionoꞌ,
hai tampoꞌ iti ina mewaliꞌ tampoꞌraꞌ.
37 Ina mewaliꞌ sosoraraꞌ pemuleꞌáraꞌ huoꞌána Pueꞌ Ala,
hai tauna to mampokaꞌahiꞌ Pueꞌ Ala ina toroꞌheꞌ ionoꞌ.