Pekakae i lalu kapári
109
I topoánti toponani. Nanina Daudiꞌ.
Ó Pueꞌ Ala to kupomahile,
ineeꞌaꞌ Nupengkaniika,
2 láwiꞌ tauna to kadake hai mebagiuꞌ
mohuwáráheꞌ laluita to tiꞌara toꞌu kana i kódóꞌ.
3 Rapakadakeaꞌ hai laluita pekáhihiꞌ,
hai rasalaꞌiaꞌ, kehapiꞌ tiꞌara ara álásáraꞌ.
4 Raráiꞌaꞌ mobábehi to kadake,
mole riꞌi kupokaꞌahiꞌheꞌ hai kupekakaeáheꞌ.
5 Kamaroꞌangkuꞌ raháwángi hai to kadake,
hai kamaꞌahiꞌkuꞌ raháwángi hai pekáhihiꞌ.
6 Kupembiáꞌ bona Nuángkáꞌ topebutusi to kadake
to ina mohoda-hoda kara-karana ewálingkuꞌ.
Hampóáꞌworia ewálingkuꞌ iti ina rasalaꞌi woꞌo.
7 Hampóáꞌworia ane ia rapáresáꞌ,
ina tongawaꞌ kaꞌiana miꞌi to masalaꞌ,
hai pekakaena rarekeꞌ peá dósá.
8 Hampóáꞌworia tueꞌna tiꞌara ina marue,
hai lántiꞌna raꞌala tauna.a
9 Patodáhi miꞌi ánáꞌnaheꞌ mewaliꞌ ilu,
hai toinána mewaliꞌ bembaꞌ.
10 Patodáhi miꞌi ánáꞌnaheꞌ rawura hangko i támbiraꞌ to magero,
hai mewaliꞌheꞌ topembiáꞌ-mbiáꞌ peá.
11 Hampóáꞌworia tauna to mesingaraꞌ ina moala upu-upu párewána,
hai wuaꞌna pobágóꞌna raperampaꞌi tauna.
12 Ineeꞌ ara haweꞌ hadua to maroꞌa laluna i hia,
ba mampokaꞌahiꞌ ánáꞌnaheꞌ to napálehi miꞌi.
13 Hampóáꞌworia upu-upu pemuleꞌána ina tunaheꞌ,
hai hangaꞌna rakáláliꞌá tauna to ina haweꞌ.
14 Hampóáꞌworia kamasalaꞌraꞌ toioruna ina nabuhinao oaꞌ PUEꞌ,
hai dósána inána tiꞌara rawoe.
15 Hampóáꞌworia dósáraꞌ ina nabuhinao oaꞌ PUEꞌ,
hai tiꞌaraheꞌ ara to mambuhinao i duniáꞌ.
16 Kupembiáꞌ upu-upuna iti
láwiꞌ tiꞌara naisá maꞌahiꞌ,
ngkáliꞌna riꞌi ia mampopeahiahiꞌ tauna
to mapári hai to i wóiꞌ tueꞌraꞌ.
Ia mopapate tauna to tiꞌara ara pehárungáraꞌ.
17 Naundeꞌ mekambo,
patodáhi miꞌi ia molámbiꞌ pekambo.
Ia tiꞌara mau mewátiꞌ,
patodáhi pewátiꞌ karaoꞌ hangko i hia.
18 Napobiásá miꞌi mokambo tauna,
patodáhi miꞌi pekambona mandeꞌ wátána haduduána.
19 Patodáhi miꞌi pekambo iti mentakaꞌ i wátána
nodo pewaruꞌ hai pámpóu.
20 Hampóáꞌworia noꞌonoꞌ miꞌi pehukuna PUEꞌ
i tauna to mosalaꞌiaꞌ hai mopakadake hangaꞌkuꞌ.
21 Ó Pueꞌ ALA, Pueꞌkuꞌ,
kupembiáꞌ bona Nutulungiaꞌ ánti kamahilena hangaꞌMu,
hai Nupeámpáráiaꞌ ánti kamaꞌahiꞌMu hai kamaroꞌaMu,
22 láwiꞌ mapári tueꞌkuꞌ, tiꞌara piꞌi ara pehárungángkuꞌ,
hai mahái ntepuꞌu lalungkuꞌ.
23 Katueꞌkuꞌ hungkuꞌ miꞌi matántá,
nodo kamatántána babaio ane ina makáindi miꞌi,
nodo katupeeꞌ to pohuꞌ ratáróbáhi.
24 Kuntuꞌkuꞌ moridiꞌ láwiꞌ marueaꞌ tiꞌara mandeꞌ,
hai wátángkuꞌ mewaliꞌ miꞌi maduhuꞌ ntepuꞌu.
25 Kódóꞌ ratitibeiaꞌ tauna,
hai tauna to moitaꞌaꞌ mobibiliheꞌ mopakóiꞌaꞌ.
26 Ó Pueꞌ Ala PUEꞌkuꞌ,
kupembiáꞌ bona Nutulungiaꞌ hai Nupelaeaꞌ
hintotoꞌ hai kamaꞌahiꞌMu,
27 bona raisá ewálingkuꞌ, kaꞌIona miꞌi to motulungiaꞌ,
Io PUEꞌ to mampelaeaꞌ.
28 Kehapiꞌaꞌ rakambo,
ina Nuwátiꞌaꞌ,
hai kehapiꞌ meángkáꞌmoheꞌ ina mosalaꞌiaꞌ,
ina Nupakahiliáheꞌ,
agáiáná kódóꞌ hawiꞌMu deꞌe, ina góeꞌaꞌ oaꞌ.
29 Hampóáꞌworia tauna to mosalaꞌiaꞌ ina mahili ntepuꞌuheꞌ,
hai kamahiliraꞌ iti bateꞌna raisá tauna.
30 Ina kuꞌuliꞌ handaꞌ-handaꞌ kamaroꞌana i PUEꞌ,
ina kutóiá i oloꞌraꞌ tauna to handaꞌ,
31 láwiꞌ Ia timama motulungi tauna to i wóiꞌ tueꞌraꞌ,
Ia mampeámpáráiheꞌ hangko i tauna to ina mopakarugiꞌheꞌ.