Nani kagóeꞌ Daudiꞌ láwiꞌ menangiheꞌ i pombeala
22
Daudiꞌ monanika nani deꞌe i PUEꞌ tempóna PUEꞌ mokábáhá hangko i taena Saulu hai upu-upu ewálina, 2 nauliꞌ:“Ó PUEꞌ, Io nodoKoꞌ buluꞌ watu
bentengkuꞌ to kupengkatueꞌi.
Io to mampelaeaꞌ.
3 Pueꞌ Ala nodo buluꞌ watu, laoaꞌ mengkatueꞌ i Hia.
Ia nodo lábá to mokámpái wátángkuꞌ.
Ia nodo kótá to rabente, to makuasaꞌ mampelaeaꞌ
hangko i tauna to maseke.
4 Meraruaꞌaꞌ i PUEꞌ to hintotoꞌ ratóiá, membiáꞌaꞌ tulungi,
hai Ia mampelaeaꞌ hangko i ewálingkuꞌ.
5 Hungkuꞌaꞌ ina mate, nodoaꞌ to ratimpuku gulaꞌ
ba nalábóꞌ uwai to kebuꞌu.
6 Hurewuꞌ ntepuꞌuaꞌ, nodo ara to mowewehiaꞌ,
duniáꞌraꞌ tomate mewaliꞌ nodo heáꞌ i lindoꞌkuꞌ
láwiꞌ ina mampohidupaꞌáꞌaꞌ kapate.
7 Hangko i kamapáringkuꞌ, meraruaꞌaꞌ i PUEꞌ
membiáꞌ tulungi i Pueꞌ Ala to kupenómbái,
hai hangko i lalu támbiNa, Ia mohádi pekakaengkuꞌ
hai peraruaꞌkuꞌ haweꞌ i Hia.
8 Hangko ionoꞌ, duniáꞌ melinu hai moenggo,
alehe peángkáꞌána langiꞌ moduá-duá hai moridiꞌ-ridiꞌ
ánti kamabukoꞌna Pueꞌ Ala.
9 Hangko i hilóNa mesuwuꞌ rámbu to rumukuꞌ,
api mendele hangko i humena,
hai awaa to roreꞌ woꞌo mesuwuꞌ.
10 Ia mobungkáhi langiꞌ haneꞌi mendáulu mai.
I wóiꞌna bitiNa ara gawu to makáindi.
11 Ia mosaweꞌi kerubi haneꞌi membara,
mendáulu mai naꞌánti wui.
12 Kamakáindi mewaliꞌ pengkatiháláꞌáNa,
udá to rumihi hai gawu to makápá mobóungángi.
13 Ánti pewangkaꞌna kiláꞌ to i lindoꞌNa
api roreꞌ i duniáꞌ.
14 PUEꞌ Ala to i Surugáꞌ molaluita nodo gumpataꞌ,
hai wambaꞌNa iti rahádi upu-upu tauna.
15 Ia mokábáhá mata panaꞌNa,
haneꞌiheꞌ ewáliNa mahawuꞌ.
Mompakani-kani Ia mopaꞌara kiláꞌ,
haneꞌi ewáliNa melangkaheꞌ.
16 I tempóna PUEꞌ mokabukoꞌi ewáliNaheꞌ,
peinaoNa mesuwuꞌ hangko i hilóNa
álána tahiꞌ mewaliꞌ maꞌáti
hai alehe duniáꞌ peisá raita.
17 Hangko i kamapángkáꞌána, PUEꞌ moulu taeNa
haneꞌiaꞌ Naꞌángkáꞌ hangko i kapári to rumihi,
to nodo uwai to kebuꞌu.
18 Ia mopelaeaꞌ hangko i ewálingkuꞌ to maróhó,
hangko i tauna to mokáhihiꞌaꞌ,
láwiꞌ hira maróhó maniheꞌ hangko i kódóꞌ.
19 Rapombealaꞌáꞌaꞌ i tempóngkuꞌ narampe kapári,
agáiáná kupaisarenga katueꞌkuꞌ i PUEꞌ.
20 Ia mokábáháꞌaꞌ hangko i kapári,a
hai Napelaeaꞌ láwiꞌ Napokagóeꞌaꞌ.
21 PUEꞌ moháwángi bábehiángkuꞌ to maroꞌa,
Nawátiꞌaꞌ láwiꞌ tiꞌaraꞌaꞌ masalaꞌ.
22 Mampeuláꞌiaꞌ oaꞌ párentána PUEꞌ,
tiꞌaraꞌaꞌ mobábehi to kadake,
hai tiꞌaraꞌaꞌ woꞌo mengkábáhá
i Pueꞌ Ala to kupenómbái.
23 Upu-upu hawaꞌNa kupailalu,
tiꞌaraꞌaꞌ moliungi párentáNa.
24 Tiꞌaraꞌaꞌ mobábehi to peisá rasalaꞌi i peitáNa,
hai kukaraohi bábehiá to salaꞌ.
25 PUEꞌ moháwángi bábehiángkuꞌ to maroꞌa,
Nawátiꞌaꞌ láwiꞌ tiꞌaraꞌaꞌ masalaꞌ.
26 PUEꞌ, tetidaꞌKoꞌ i tauna
to tetidaꞌ woꞌo i Hio,
hai Nupatongawaꞌ kamaroꞌaMu
i tauna to tiꞌara ara kamasalaꞌraꞌ.
27 I tauna to bulá laluraꞌ, Nupatongawaꞌ kamagasaꞌMu,
agáiáná i tauna to kadake bábehiáraꞌ, Nuewaꞌheꞌ.
28 Tauna to mengkaiwóiꞌ, Nutulungiheꞌ,
agáiáná Nupailalu tauna to mampepemahile, bona Nunawoꞌheꞌ.
29 Ó PUEꞌ, Io miꞌi to mowangkaꞌi katueꞌkuꞌ.
Nubáliki kamakáindi mewaliꞌ mabaa i kódóꞌ.
30 Nupoweꞌiaꞌ róhó bona moewaꞌaꞌ ewali to handaꞌ.
Pueꞌ Ala to kupenómbái, ánti petulungiMu,
pebáiꞌaꞌ mengkaheꞌ i benteraꞌ {mosuaki kótáraꞌ}.
31 Pueꞌ Ala, upu-upu bábehiáMu manótó
hai tiꞌara ara kamakuraꞌna.
DándiMu PUEꞌ peisá rapoinálái.
Io nodo lábá to mokámpái upu-upu tauna to mengkatueꞌ i Hio.
32 Heáná paꞌi pueꞌ to rapenómbái i rawa hangko i PUEꞌ Ala?
Pueꞌ Ala to tapenómbái, Ia miꞌi buluꞌ watu, pengkatueꞌántaꞌ.
33 Pueꞌ Ala pengkatueꞌángkuꞌ to maróhó.
Ia mokámpáiaꞌ bona upu-upu to kubábehi tiꞌara ara to masalaꞌ.
34 Napoweꞌiaꞌ kamalingkátiꞌ to nodo kamalingkátiꞌna lagiwa,
bona kubuku meángkáꞌ i tutuꞌ buluꞌ.
35 Ia mopaturoꞌaꞌ mombeala,
onoꞌ miꞌi haneꞌi kubuku modiiꞌ panaꞌ to rabábehi hangko i tambaga.
36 Nupoweꞌiaꞌ lábá haneꞌiaꞌ menangi.
Nuhániki pekakaengkuꞌ álána maróhóaꞌ.
37 Nupoweꞌiaꞌ katoroꞌá to maeláꞌ
bona peisáꞌaꞌ mombeala.
Nupamaróhó bitingkuꞌ
bona maróhó peángkáꞌkuꞌ moewaꞌ ewálingkuꞌ.
38 Kudápáꞌheꞌ ewálingkuꞌ duuꞌraꞌ kuropuꞌ.
Tiꞌaraꞌaꞌ mesuleꞌ ane tiꞌara maniheꞌ kupatuna.
39 Kupamanangiheꞌ haneꞌi tiꞌaraheꞌ peisá meángkáꞌ huleꞌ,
álána mengkoruꞌheꞌ i wóiꞌ bitingkuꞌ.
40 Nupoweꞌiaꞌ kamaróhó bona kubuku mombeala,
hai tauna to moewaꞌaꞌ ina mengkoruꞌheꞌ i kuasaꞌkuꞌ.
41 Nupopelangkaheꞌ ewálingkuꞌ hangko i kódóꞌ,
hai tauna to mokáhihiꞌaꞌ kupatunaheꞌ.
42 Ewálingkuꞌ monganga-ngangaheꞌ membiáꞌ tulungi,
agáiáná tiꞌara ara to mampelaeheꞌ.
Mekióꞌheꞌ i PUEꞌ,
agáiáná tiꞌaraheꞌ Nahániki.
43 Kunangiheꞌ, haneꞌiheꞌ mewaliꞌ nodo awu tampoꞌ,
kukada-kadaheꞌ woꞌo nodo regeꞌ i rárá.
44 Nukábáhámoꞌ hangko i peꞌewaꞌraꞌ hangka taunángkuꞌ.
Nupopewaliꞌmoꞌ to makuasaꞌ i tampoꞌ ntániꞌna.b
Mogalo riꞌi tauna to tiꞌaraheꞌ kuisá,
mengkoruꞌheꞌ i kódóꞌ.
45 Hangko mohádintoheꞌ wambaꞌkuꞌ,
tohandarena mengkoruꞌheꞌ ánti kamalááꞌraꞌ i kódóꞌ,
hai párentángkuꞌ rapeuláꞌi aha.
46 Kakeateraꞌ matántá,
moridiꞌheꞌ ánti kamalááꞌraꞌ
hai mesuwuꞌheꞌ hangko i bente pebuniáraꞌ.
47 Kuisá ntepuꞌu PUEꞌ toꞌu-toꞌu tueꞌ!
Tetóiá miꞌi Pueꞌ Ala, buluꞌ watu pengkatueꞌángkuꞌ.
Tetóiá miꞌi Pueꞌ Ala to mampelaeaꞌ.
48 Ia miꞌi Pueꞌ Ala to moháwángi bábehiáraꞌ ewálingkuꞌ,
hai mampopengkoruꞌ tauna i tampoꞌ ntániꞌna i kódóꞌ.
49 Ia to mampelaeaꞌ hangko i ewálingkuꞌ.
Ó PUEꞌ, Io miꞌi to mampoweꞌiaꞌ penangi
i tauna to mampoewaliáꞌaꞌ.
Io miꞌi to mampelaeaꞌ
hangko i tauna to maseke.
50 Onoꞌ miꞌi haneꞌi kuꞌundeꞌ manguliꞌ handaꞌ kamaroꞌana i Hio PUEꞌ
i oloꞌraꞌ tauna i tampoꞌ ntániꞌna,
hai ina kunanika nani petóiá mampomahile hangaꞌMu.
51 Pueꞌ Ala mampeweꞌi penangi to mahile
i datu to Naꞌángkáꞌ,
hai Ia mopatongawaꞌ kamaꞌahiꞌNa to tiꞌara madepuꞌ-depuꞌ
i tauna to Napileꞌi,
ia miꞌi Daudiꞌ hai pemuleꞌánaheꞌ haweꞌ i rue-ruena.”