Laluitana Daudiꞌ to kahópóꞌána
23
Deꞌe miꞌi laluitana Daudiꞌ to kahópóꞌána:“Kódóꞌ Daudiꞌ ánáꞌna Isai,
tauna to napileꞌi Pueꞌ Ala mewaliꞌ datu.
Kódóꞌ napomahileaꞌ Pueꞌ Ala to napenómbái Iako,
kódóꞌ woꞌo toponani to rapokakaia toSáráeliꞌ.
2 Inaona PUEꞌ molaluita moliu i kódóꞌ,
onoꞌ haneꞌi kuhuwárá laluitaNa.
3 Pueꞌ Ala to rapenómbái toSáráeliꞌ mongkóráꞌ,
buluꞌ watu to mokámpái toSáráeliꞌ molaluita i kódóꞌ, Nauliꞌ:
‘Ane datu mepárentá i kanótó-nótóána
hai mengkoruꞌ i Pueꞌ Ala,
4 ia ina mewangkaꞌ nodo alo
to ina membeto i langiꞌ to maleláhá.
Ina nodo pewangkaꞌna alo
to mampopeláni rumpuꞌ ane wóró miꞌi udá.’
5 Pemuleꞌángkuꞌ nawátiꞌ Pueꞌ Ala,
podándiNa tiꞌara ina tebáliki.
DándiNa haweꞌ i rue-ruena
hai tiꞌara ara kamakuraꞌna.
Upu-upu to ina mewaliꞌ,
Ia to mopakanótó miꞌi.
Bateꞌ-bateꞌkuꞌ ina Natulungi,
hai hinángkáꞌ to kupembiáꞌ, Napabukeꞌi.
6 Agáiáná tauna to tiꞌara mengkoruꞌ i Pueꞌ,
upu-upuheꞌ nodo dui to ratibe peá,
tiꞌara ara to mau motibaaꞌ.
7 Heáná to morámpu dui
paraluu mopakeꞌ laiꞌ besiꞌ ba duruká tawalaꞌ.
Tauna to nodo dui iti ina raintu.”
Surudadoꞌnaheꞌ Daudiꞌ to keate
8 Deꞌe miꞌi hangaꞌ-hangaꞌ tálu puloꞌraꞌ surudadoꞌna Daudiꞌ to keate. Hangko i oloꞌraꞌ araheꞌ tálu to keate ntepuꞌu. To motadulakoiheꞌ “To Tálu To Keate Ntepuꞌu” iti ia miꞌi Isibaꞌa toHakamoni. Hangkani tempó, ia mampombealaꞌá uwalu áturaꞌ tauna, upu-upuheꞌ napapate hai tawalaꞌna.
9 Tauna to kaduá hangko i “To Tálu To Keate Ntepuꞌu” iti ia miꞌi Eleasa ánáꞌna Dodo pemuleꞌána Ahohi. Ia hingkakani hai Daudiꞌ tempóraꞌ mopakóiꞌheꞌ toPelisitiꞌ. I pombealaraꞌ iti, toSáráeliꞌ mosuliꞌheꞌ, 10 agáiáná Eleasa mombeala oaꞌ moewaꞌ toPelisitiꞌ haweꞌ maledeꞌ. Pihoꞌna tiꞌara piꞌi peisá nakábáhá, láwiꞌ taena matodoꞌ miꞌi. Alo iti PUEꞌ mampopenangiheꞌ toSáráeliꞌ. Surudadoꞌ toSáráeliꞌ to mosuliꞌheꞌ, mesuleꞌheꞌ huleꞌ i pombealaꞌána Eleasa, agáiáná moala peheꞌ párewá pombealaraꞌ tauna to matemoheꞌ.
11 Tauna to katálu hangko i “To Tálu To Keate Ntepuꞌu” iti ia miꞌi Sama ánáꞌna Age pemuleꞌána Harari. Hangkani tempó, toSáráeliꞌ melangkaheꞌ hangko i toPelisitiꞌ to morámpu i Lehi i hamboloꞌ hinoe tambue. 12 Agáiáná Sama meángkáꞌ riꞌi i tangaꞌ-tangaꞌ hinoe iti mampombealaꞌá toPelisitiꞌ. Napapate hai nanangiheꞌ álána tiꞌara mewaliꞌ toPelisitiꞌ mamperampaꞌi hinoe tambue iti.
13-14 Hangkani mani, i tempó mepare, táluheꞌ hangko i oloꞌraꞌ tálu puloꞌraꞌ surudadoꞌna Daudiꞌ to keate lao mampohidupaꞌá Daudiꞌ i balamba Adulá. Tempó iti, Daudiꞌ ara i lalu balamba iti. ToPelisitiꞌ mobambaruꞌheꞌ i lembo Repaimi, hai surudadoꞌ to hanggáláꞌ mokuasaꞌi Beteleme i lembo iti. 15 Teduuꞌ pekirina Daudiꞌ moundeꞌ mainu uwai hangko i wánuána, haneꞌi nauliꞌ, “Ane arai tauna to moántiáꞌaꞌ mai uwai hangko i tibubuꞌ to hungkuꞌ i babaꞌá wánuá Beteleme!” 16 Tempó onoꞌ Beteleme rakuasaꞌi toPelisitiꞌ. Karahádina to tálu iti laluitana Daudiꞌ, pohuꞌheꞌ lao ngkaniiꞌ-niiꞌ i wánuá Beteleme,a mantámbuꞌheꞌ uwai hangko i tibubuꞌ to hungkuꞌ i babaꞌá wánuá, haneꞌi raꞌánti lao i Daudiꞌ. Agáiáná tiꞌara nainu Daudiꞌ, ngkáliꞌna nabubu riꞌi i tampoꞌ mewaliꞌ popenómbá i PUEꞌ. 17 Nauliꞌ Daudiꞌ, “Ó PUEꞌ, tiꞌara tuꞌu inaongkuꞌ moinu uwai deꞌe, láwiꞌ ane kuinu, hibali peaꞌ moinu waheꞌraꞌ tauna to tálu deꞌe to tiꞌara mampekiri wátáraꞌ lao mai moala uwai deꞌe!” Mewaliꞌ uwai iti tiꞌara mpuꞌu nainu Daudiꞌ.
Iti miꞌi to rabábehi tauna to tálu to keate ntepuꞌuheꞌ iti.
18-19 Abisai ádina Ioabiꞌ ánáꞌna Seruia to motadulakoi tálu puloꞌraꞌ surudadoꞌ to keate. Ia mopapate tálu áturaꞌ tauna hai tawalaꞌna. Onoꞌ haneꞌi hangaꞌna tebámbári, hai ia rabiláꞌ ntepuꞌu i oloꞌraꞌ to tálu puloꞌraꞌ iti. Agáiáná kakeatena tiꞌara hibali hai kakeateraꞌ “To Tálu To Keate Ntepuꞌu.”
20 Hadua surudadoꞌ ntániꞌna to tebámbári ia miꞌi Benaia ánáꞌna Ioiada toKabesele. Ia mopapate rodua surudadoꞌ to keate ntepuꞌu hangko i tampoꞌ Moabiꞌ. Hai hangkani tempó, ia mendáulu i lalu taroboꞌ mopapate hambaꞌa singá. Iti mewaliꞌ i tempó salju. 21 Hangkani tempó, ia mopapate hadua toMásiriꞌ to mapángkáꞌ ntepuꞌu. Kehapiꞌ toMásiriꞌ iti motibaaꞌ tawalaꞌ, Benaia to moewaꞌ peá hai laiꞌ, mamperampaꞌi tawalaꞌ iti, haneꞌi mopapate toMásiriꞌ hai tawalaꞌ iti. 22-23 Noꞌonoꞌ miꞌi to nabábehi Benaia ánáꞌna Ioiada. Ia tebámbári hai teádái ntepuꞌu hangko i oloꞌraꞌ to tálu puloꞌraꞌ surudadoꞌ to pebáiꞌ iti, agáiáná ia tiꞌara tepasuaꞌ “To Tálu To Keate Ntepuꞌu.” Hai Daudiꞌ molántiꞌ Benaia iti mewaliꞌ tadulakoraꞌ topekámpáina.
24 Tálu puloꞌraꞌ surudadoꞌna Daudiꞌ to keate tepasuaꞌ:
Asaeliꞌ ádina Ioabiꞌ,
Elehana ánáꞌna Dodo hangko i Beteleme,
25 Sama toHaroꞌ,
Elika toHaroꞌ,
26 Halesa toPaliti,
Ira ánáꞌna Ikesi hangko i Tekoa,
27 Abiese toAnatoꞌ,
Mebunai toHusa,
28 Salemo toAhohi,
Maharai toNetopa,
29 Heleꞌ ánáꞌna Baana toNetopa,
Itai ánáꞌna Ribai toBenami hangko i Gibeá,
30 Benaia toPirato,
Hidai hangko i lembo-lembo i Gaasa,
31 Abialabono toBete-Araba,
Asamaweꞌ toBahurimi,
32-33 Eliaba toSaalabono,
hai ánáꞌnaheꞌ Iasene toGuni,
Ionata ánáꞌna Sama toHarari,
Ahiami ánáꞌna Sara toHarari,
34 Elipeleꞌ ánáꞌna Ahasibai toMaꞌaka,
Eliama ánáꞌna Ahitope toGilo,
35 Hesarai toKarame,
Paerai toArabi,
36 Igali ánáꞌna Nata hangko i Sobá,
Bani toGati,
37 Seleꞌ toAmoni,
Naharai toBeeroꞌ to moánti párewá pombealana Ioabiꞌ ánáꞌna Seruia,
38 Ira toIetiri,
Gareꞌ toIetiri,
39 hai Uria toHeti.
Upu-upuheꞌ tálu puloꞌraꞌ hai pitu tauna.