Kahandaꞌraꞌ surudadoꞌ toSáráeliꞌ raimbaꞌ
24
Hangkani tempó, PUEꞌ mabukoꞌ i toSáráeliꞌ haneꞌi ina mohukuheꞌ, onoꞌ haneꞌi Ia monáráhi Daudiꞌ bona mampopeimbaꞌ kahandaꞌraꞌ tobaleilo to rabuku mombeala.a Nauliꞌ PUEꞌ, “Laomokoꞌ moimbaꞌ tobaleilo toSáráeliꞌ hai toIudá to rabuku mombeala.”2 Mewaliꞌ molaluita miꞌi datu i Ioabiꞌ hai tadulako-tadulako surudadoꞌ to natadulakoi Ioabiꞌ, nauliꞌ Daudiꞌ, “Laomokoꞌ i humalele tampoꞌ Sáráeliꞌ, mantepuꞌu hangko i Daa tándáꞌ i wongko haweꞌ-haweꞌ i Baraseba tándáꞌ i wóiꞌ, hai niukiꞌ kahandaꞌraꞌ tobaleilo to rabuku mombeala, bona kuisá imbaꞌraꞌ.”
3 Agáiáná Ioabiꞌ molaluita i datu, nauliꞌ, “Hampóáꞌworia Pueꞌ Ala PUEꞌmu ina motámbái kahandaꞌraꞌ surudadoꞌ, hangatu kánina hangko i kahandaꞌraꞌ deꞌe-deꞌe, hai kuhárungá ina naita maniheꞌ datu. Agáiáná apa tunggáiána datu moimbaꞌ tauna?”
4 Kehapiꞌ nauliꞌ noꞌonoꞌ, párentána datu iti hangaa-ngaa rapeuláꞌi. Mewaliꞌ lao mpuꞌumoheꞌ moimbaꞌ kahandaꞌraꞌ tobaleilo toSáráeliꞌ to rabuku mombeala.
5 Mengkalimbaheꞌ i uwai Iarade, hai mobambaruꞌheꞌ tándáꞌ i wóiꞌ kótá Aróe to i tangaꞌ-tangaꞌ lembo i tampoꞌraꞌ toGati. Hangko ionoꞌ, laoheꞌ tándáꞌ i wongko i wánuá Iaese, 6 haneꞌi liliuheꞌ lao i Gileaꞌ hai Kadesi i katoroꞌáraꞌ toHeti. Roo onoꞌ, laoheꞌ i tampoꞌraꞌ toDaa, hai hangko i Daa laoheꞌ i Sido. 7 Hangko ionoꞌ, liliuheꞌ lao i Tiru tándáꞌ i wóiꞌ. Tiru iti kótá to rabente. Rapaliliu polumaoraꞌ lao i upu-upu kótáraꞌ toHewi hai toKánáꞌá, duuꞌraꞌ haweꞌ i Baraseba tándáꞌ i wóiꞌ tampoꞌ Iudá.
8 Tempóraꞌ molumaohi humalele tampoꞌ Sáráeliꞌ, hahioꞌ wulána rompuloꞌ alona kamaruena, hai roo onoꞌ, mesuleꞌheꞌ lao i kótá Ierusale. 9 Ioabiꞌ mopahaweꞌ i datu bahangapa tauna to raimbaꞌ. Kahandaꞌraꞌ tobaleilo toSáráeliꞌ to rabuku mombeala, uwalu átuna sáburaꞌ, hai tobaleilo toIudá to rabuku mombeala, lima átuna sáburaꞌ.
10 Agáiáná i karooraꞌ moimbaꞌ upu-upu tobaleilo to rabuku mombeala, nahohoꞌ miꞌi inaona Daudiꞌ láwiꞌ naisá to nabábehi iti salaꞌ, onoꞌ miꞌi haneꞌi nauliꞌ i PUEꞌ, “Mahile dósángkuꞌ i peitáMu. Mewaliꞌ deꞌe-deꞌe PUEꞌ, kupembiáꞌ bona Nuwoe kamasalaꞌna hawiꞌMu deꞌe. Bebe ntepuꞌuaꞌ mobábehi noꞌonoꞌ.”
11 Kahalona mepulo, hangko tiꞌara mani mearó Daudiꞌ, Gadi nábiꞌna PUEꞌ to mopatente Daudiꞌ mohádi miꞌi laluita hangko i PUEꞌ to manguliꞌ: 12 “Laomokoꞌ i Daudiꞌ, nupahaweꞌ laluitaNgkuꞌ node: ‘Deꞌe miꞌi to nauliꞌ PUEꞌ: Ina Kuhukukou. Ara tálu pákáꞌna pehuku. Nupileꞌi pehuku to noumbá to ina nutarima.’ ”
13 Mewaliꞌ pohuꞌ miꞌi Gadi lao mpuꞌu mampohidupaꞌá Daudiꞌ, haneꞌi nauliꞌ, “Umbána to nupileꞌi? Tálu parenab ara rimi i tampoꞌmu? Ba tálu wulána nadápáꞌkoꞌ ewálimu haneꞌi hangaa-ngaa melangkakoꞌ? Ba tálu alona ara hakiꞌ to humalele i tampoꞌmu? Hangaa-ngaa nupekiri hampaiꞌ haneꞌi nupahaweꞌ i kódóꞌ apa to nupileꞌi, bona kupahaweꞌ i PUEꞌ to mohuoꞌaꞌ mai.”
14 Nahániki Daudiꞌ i Gadi, “Masusa ntepuꞌu lalungkuꞌ. Ineeꞌaꞌ rahuku tauna. Rángina miꞌi PUEꞌ to mohukuaꞌ, láwiꞌ Ia bukeꞌ ahiꞌ.”
15 Onoꞌ miꞌi haneꞌi PUEꞌ mopaꞌara hakiꞌ to humalele i toSáráeliꞌ, mantepuꞌu mepulo iti haweꞌ i tempó to Napakanótó miꞌi. Pitu puloꞌna sáburaꞌ tauna mate i humalele tampoꞌ iti, hangko i Daa tándáꞌ i wongko haweꞌ-haweꞌ i Baraseba tándáꞌ i wóiꞌ. 16 Tempóna malaꞌeka haweꞌ i kótá Ierusale ina mopapateheꞌ tauna to toroꞌ ionoꞌ, masusa miꞌi laluna PUEꞌ ánti huleáká iti, onoꞌ haneꞌi Nauliꞌ, “Gáná miꞌi! Mengkaroomokoꞌ!” Tempó onoꞌ, malaꞌekana PUEꞌ haweꞌ miꞌi i pobántiá parena Arauna toIebusi.
17 I kanaitána Daudiꞌ malaꞌeka to mopapate tauna iti, ia molaluita i PUEꞌ, nauliꞌ, “Kódóꞌ miꞌi to madósá hai mobábehi salaꞌ. Hira, wohiraꞌá, nodo peheꞌ dimbá. Apa salaꞌraꞌ? Mewaliꞌ kupembiáꞌ bona Nuhuku peangkaiꞌ, kódóꞌ hai tinángkuꞌ.”
Daudiꞌ mobábehi hambuaꞌ paintuá popenómbá
18 I alo iti woꞌo, nabiꞌ Gadi lao mampolaluitaꞌá Daudiꞌ, nauliꞌ, “Laomokoꞌ naiꞌ i hinoena Arauna toIebusi, nuaró hambuaꞌ paintuá popenómbá i PUEꞌ i pobántiá pare to ionoꞌ.” 19 Mewaliꞌ lao mpuꞌu miꞌi Gadi mopahaweꞌ laluitana PUEꞌ i Daudiꞌ. Hangko ionoꞌ, pohuꞌ miꞌi Daudiꞌ hintotoꞌ hai párentána PUEꞌ moliu nabiꞌ Gadi.
20 I kanapetirona Arauna, Datu Daudiꞌ hai topobágóꞌnaheꞌ ina haweꞌmoheꞌ i hia, ia lao molingkudu motóngkóꞌ haweꞌ i tampoꞌ i bitina Datu Daudiꞌ.
21 Nauliꞌ Arauna, “Pueꞌkuꞌ datu! Apa tunggáiámu mai i kódóꞌ hawiꞌmu deꞌe?”
Nahániki Daudiꞌ, “Maiaꞌ i hio láwiꞌ kupoinao mohóló pobántiá pare deꞌe. Ina kuaró hambuaꞌ paintuá popenómbá ieneꞌ, haneꞌi ina kuhuhuꞌ popenómbá i PUEꞌ bona hakiꞌ to morampeheꞌ taunángkuꞌ ina mengkaroo.”
22 Nauliꞌ Arauna i Daudiꞌ, “Kupokana pembiáꞌmu iti. Pueꞌkuꞌ datu, peisákoꞌ moala apa peá to nuꞌundeꞌ nupopewaliꞌ popenómbá i PUEꞌ. Deꞌe miꞌi bahangapa báꞌána gapiꞌ to peisá nupakeꞌ mewaliꞌ popenómbá to raintu. Ara woꞌo bahangapa pobántiá pare hai pásángá gapiꞌ. Káuna peisá nupakeꞌ mewaliꞌ kau api. 23 Ó datu, kódóꞌ Arauna mampeweꞌi mbero-mbero upu-upuna deꞌe i hio. Hampóáꞌworia popenómbámu iti ina Napokana PUEꞌ Ala to nupenómbái.”
24 Agáiáná nauliꞌ datu, “Ineeꞌaꞌ nuweꞌi mbero. Ina kubaiari. Tiꞌara ina kuhuhuꞌ i Pueꞌ Ala PUEꞌkuꞌ popenómbá to tiꞌara kuhóló.”
Mewaliꞌ Daudiꞌ mohóló pobántiá pare hai bahangapa báꞌána gapiꞌ. Hólóna upu-upuna iti lima puloꞌna dóiꞌ peráꞌ.c 25 Roo onoꞌ, Daudiꞌ moaró ionoꞌ hambuaꞌ paintuá popenómbá i PUEꞌ, hai mohuhuꞌ popenómbá to raintu hai popenómbá pohintuwuꞌ.
Hangko ionoꞌ, PUEꞌ mohániki miꞌi pekakaena Daudiꞌ hai motulungiheꞌ toSáráeliꞌ, haneꞌi tiꞌara piꞌi ara tauna to mate kana hakiꞌ to humalele iti.