Nani kagóeꞌ to naukiꞌ Daudiꞌ tempóna menangi
18
I topoánti toponani. Nanina Daudiꞌ huoꞌána PUEꞌ, to nananika i PUEꞌ tempóna nakábáhá PUEꞌ hangko i kuasaꞌraꞌ upu-upu ewálina, tepasuaꞌ Datu Saulu. Nauliꞌ node:
2 KupomahileKoꞌ PUEꞌ.
Io miꞌi to mopakaróhóaꞌ!
3 Ó PUEꞌ, Io nodoKoꞌ buluꞌ watu,
bentengkuꞌ to kupengkatueꞌi,
Io to mampelaeaꞌ.
Io Pueꞌ Ala nodo buluꞌ watu,
laoaꞌ mengkatueꞌ i Hio.
Io nodoKoꞌ lábá
to mokámpái wátángkuꞌ.
Io miꞌi to makuasaꞌ mampelaeaꞌ,
nodo kótá to rabente.
4 Meraruaꞌaꞌ i PUEꞌ to hintotoꞌ ratóiá,
membiáꞌaꞌ tulungi,
hai Ia mampelae mpuꞌuaꞌ hangko i ewálingkuꞌ.
5 Hungkuꞌaꞌ ina mate, nodoaꞌ to ratimpuku gulaꞌ
ba nalábóꞌ uwai to kebuꞌu.
6 Hurewuꞌ ntepuꞌuaꞌ,
nodo ara to mowewehiaꞌ.
Duniáꞌraꞌ tomate mewaliꞌ nodo heáꞌ i lindoꞌkuꞌ
láwiꞌ ina mampohidupaꞌáꞌaꞌ kapate.
7 Hangko i kamapáringkuꞌ, meraruaꞌaꞌ i PUEꞌ
membiáꞌ tulungi i Pueꞌ Ala to kupenómbái,
hai hangko i lalu támbiNa, Ia mohádi pekakaengkuꞌ.
Peraruaꞌkuꞌ haweꞌ i Hia.
8 Hangko ionoꞌ, duniáꞌ melinu hai moenggo,
biti buluꞌ moduá-duá hai moridiꞌ-ridiꞌ
ánti kamabukoꞌna Pueꞌ Ala.
9 Hangko i hilóNa mesuwuꞌ rámbu to rumukuꞌ,
api mendele hangko i humena,
hai awaa to roreꞌ woꞌo mesuwuꞌ.
10 Ia mobungkáhi langiꞌ haneꞌi mendáulu mai.
I wóiꞌna bitiNa ara gawu to makáindi.
11 Ia mosaweꞌi kerubi haneꞌi membara,
mendáulu mai naꞌánti wui.
12 Kamakáindi mewaliꞌ pengkatiháláꞌáNa,
udá to rumihi hai gawu to makápá mobóungángi.
13 Pewangkaꞌ to i lindoꞌNa mesuwuꞌ mai hangko i gawu,
hingkakani hai udá to mowuaꞌ hai awaa.
14 PUEꞌ Ala to i surugáꞌ molaluita nodo gumpataꞌ,
hai wambaꞌNa iti rahádi upu-upu tauna.
15 Ia mokábáhá mata panaꞌNa,
haneꞌiheꞌ ewáliNa mahawuꞌ.
Mompakani-kani Ia mopaꞌara kiláꞌ,
haneꞌi ewáliNa melangkaheꞌ.
16 I tempóna PUEꞌ mokabukoꞌi ewáliNaheꞌ,
peinaoNa mesuwuꞌ hangko i hilóNa
álána tahiꞌ mewaliꞌ maꞌáti
hai alehe duniáꞌ peisá raita.
17 Hangko i kamapángkáꞌána, PUEꞌ moulu taeNa
haneꞌiaꞌ Naꞌángkáꞌ hangko i kapári to rumihi,
to nodo uwai to kebuꞌu.
18 Ia mopelaeaꞌ hangko i ewálingkuꞌ to maróhó,
hangko i tauna to mokáhihiꞌaꞌ,
láwiꞌ maróhó maniheꞌ hangko i kódóꞌ.
19 Rapombealaꞌáꞌaꞌ i tempóngkuꞌ narampe kapári,
agáiáná kupaisarenga katueꞌkuꞌ i PUEꞌ.
20 Ia mokábáháꞌaꞌ hangko i kapári,a
hai Napelaeaꞌ láwiꞌ Napokagóeꞌaꞌ.
21 PUEꞌ moháwángi bábehiángkuꞌ to maroꞌa,
Nawátiꞌaꞌ láwiꞌ tiꞌaraꞌaꞌ masalaꞌ.
22 Mampeuláꞌiaꞌ oaꞌ párentána PUEꞌ,
tiꞌaraꞌaꞌ mengkábáhá Pueꞌ Ala to kupenómbái
bona mobábehi to kadake.
23 Upu-upu hawaꞌNa kupailalu,
tiꞌaraꞌaꞌ moliungi párentáNa.
24 Tiꞌaraꞌaꞌ mobábehi to peisá rasalaꞌi i peitáNa,
hai kukaraohi bábehiá to salaꞌ.
25 PUEꞌ moháwángi bábehiángkuꞌ to maroꞌa,
Nawátiꞌaꞌ láwiꞌ tiꞌaraꞌaꞌ masalaꞌ.
26 PUEꞌ, tetidaꞌKoꞌ i tauna
to tetidaꞌ woꞌo i Hio,
hai Nupatongawaꞌ kamaroꞌaMu
i tauna to tiꞌara ara kamasalaꞌraꞌ.
27 I tauna to bulá laluraꞌ, Nupatongawaꞌ kamagasaꞌMu,
agáiáná i tauna to kadake bábehiáraꞌ, Nupoewaliáheꞌ.
28 Tauna to mengkaiwóiꞌ, Nutulungiheꞌ,
agáiáná tauna to mampepemahile, Nunawoꞌheꞌ.
29 Ó PUEꞌ, Io to mampoweꞌiaꞌ pewangkaꞌ.
Pueꞌ Ala to kupenómbái,
Nubáliki kamakáindi mewaliꞌ mabaa i kódóꞌ.
30 Nupoweꞌiaꞌ róhó bona moewaꞌaꞌ ewali to handaꞌ.
Pueꞌ Ala to kupenómbái, ánti petulungiMu,
pebáiꞌaꞌ mengkaheꞌ i benteraꞌ {mosuaki kótáraꞌ}.
31 Upu-upu rárána Pueꞌ Ala manótó
hai tiꞌara ara kamakuraꞌna.
Dándina PUEꞌ peisá rapoinálái.
Ia nodo lábá to mokámpái upu-upu tauna to mengkatueꞌ i Hia.
32 Heáná paꞌi Pueꞌ Ala to rapenómbái i rawa hangko i PUEꞌ?
Pueꞌ Ala to tapenómbái, Ia miꞌi buluꞌ watu, pengkatueꞌántaꞌ.
33 Pueꞌ Ala to mampoweꞌiaꞌ kamaróhó,
hai mokámpáiaꞌ bona upu-upu to kubábehi tiꞌara ara to masalaꞌ.
34 Napoweꞌiaꞌ kamalingkátiꞌ to nodo kamalingkátiꞌna lagiwa,
bona kubuku meángkáꞌ i tutuꞌ buluꞌ.
35 Napaturoꞌaꞌ mombeala,
onoꞌ miꞌi haneꞌi kubuku modiiꞌ panaꞌ to rabábehi hangko i tambaga.
36 Nupoweꞌiaꞌ lábá haneꞌiaꞌ menangi.
Tae kuánáMu makuasaꞌ motulungiaꞌ,
rapomahileaꞌ ánti kamaꞌahiꞌMu i kódóꞌ.
37 Nupoweꞌiaꞌ katoroꞌá to maeláꞌ
bona peisáꞌaꞌ mombeala,
Nupamaróhó bitingkuꞌ
bona maróhó peángkáꞌkuꞌ moewaꞌ ewálingkuꞌ.
38 Kudápáꞌheꞌ ewálingkuꞌ duuꞌraꞌ kuhakaꞌ.
Tiꞌaraꞌaꞌ mesuleꞌ ane tiꞌara maniheꞌ kupatuna.
39 Kupamanangiheꞌ haneꞌi tiꞌaraheꞌ peisá meángkáꞌ huleꞌ,
mateheꞌ i bitingkuꞌ.b
40 Nupoweꞌiaꞌ kamaróhó bona kubuku mombeala,
hai tauna to moewaꞌaꞌ ina mengkoruꞌheꞌ i kuasaꞌkuꞌ.
41 Nupopelangkaheꞌ ewálingkuꞌ hangko i kódóꞌ,
hai tauna to mokáhihiꞌaꞌ kupatunaheꞌ.
42 Ewálingkuꞌ monganga-ngangaheꞌ membiáꞌ tulungi,
agáiáná tiꞌara ara to mampelaeheꞌ.
Mekióꞌheꞌ i PUEꞌ,
agáiáná tiꞌaraheꞌ Nahániki.
43 Kunangiheꞌ, haneꞌiheꞌ mewaliꞌ nodo awu to nahimbáróká wui,
kukada-kadaheꞌ nodo regeꞌ i rárá.
44 Nukábáhámoꞌ hangko i peꞌewaꞌraꞌ hángká rángángkuꞌ,
Nuángkáꞌmoꞌ mewaliꞌ to makuasaꞌ i tampoꞌraꞌ tauna ntániꞌna.c
Mogalo riꞌi tauna to tiꞌaraheꞌ kuisá,
mengkoruꞌheꞌ i kódóꞌ.
45 Hangko mohádintoheꞌ wambaꞌkuꞌ,
tauna hangko i tampoꞌ ntániꞌna
mengkoruꞌheꞌ ánti kamalááꞌraꞌ i kódóꞌ,
hai párentángkuꞌ rapeuláꞌi aha.
46 Kakeateraꞌ matántá,
moridiꞌheꞌ ánti kamalááꞌraꞌ
hai mesuwuꞌheꞌ hangko i bente pebuniáraꞌ.
47 Kuisá ntepuꞌu PUEꞌ toꞌu-toꞌu tueꞌ!
Tetóiá miꞌi Pueꞌ Ala, buluꞌ watu pengkatueꞌángkuꞌ.
Kupomahile Pueꞌ Ala to mampelaeaꞌ.
48 Ia miꞌi Pueꞌ Ala to moháwángi bábehiáraꞌ ewálingkuꞌ,
hai mampopengkoruꞌ tauna i tampoꞌ ntániꞌna i kódóꞌ.
49 Ia to mampelaeaꞌ hangko i ewálingkuꞌ.
Ó PUEꞌ, Io miꞌi to mampoweꞌiaꞌ penangi
i tauna to mampoewaliáꞌaꞌ.
Io miꞌi to mampelaeaꞌ
hangko i tauna to maseke.
50 Onoꞌ miꞌi haneꞌi kuꞌundeꞌ manguliꞌ handaꞌ kamaroꞌana i Hio PUEꞌ
i oloꞌraꞌ tauna i tampoꞌ ntániꞌna,
hai ina kunanika nani petóiá mampomahile hangaꞌMu.
51 Pueꞌ Ala mampeweꞌi penangi to mahile
i datu to Naꞌángkáꞌ,
hai Ia mopatongawaꞌ kamaꞌahiꞌNa to tiꞌara madepuꞌ-depuꞌ
i tauna to Napileꞌi,
ia miꞌi Daudiꞌ hai pemuleꞌánaheꞌ haweꞌ i rue-ruena.