Pekakaena tauna to tiꞌara masalaꞌ
17
Pekakaena Daudiꞌ.
Ó PUEꞌ, kupembiáꞌ bona Nupailalu kamanótóngkuꞌ.
Nupehádingi peraruaꞌkuꞌ.
Nupehádingi pekakaengkuꞌ,
láwiꞌ bulá lalungkuꞌ.
2 Nupatongawaꞌ miꞌi katiꞌárángkuꞌ masalaꞌ,
láwiꞌ Nuisá aha apa to toꞌu.
3 Ane Nupáresáꞌ lalungkuꞌ,
hai Nupehukáꞌaꞌ tangaꞌ káindi,
tiꞌara ina Nulámbiꞌ to kadake
láwiꞌ kutunggái kuhuwárá to manótó.
4 Kukámpái lalungkuꞌ hintotoꞌ hai párentáMu
bona tiꞌaraꞌaꞌ mouláꞌ ráráraꞌ tauna to maseke.
5 Tueꞌaꞌ mouláꞌ ráráMu,
hai tiꞌara haweꞌ hangkani kuliungi.
6 Ó Pueꞌ Ala, meraruaꞌaꞌ i Hio
láwiꞌ ina Nuhánikiaꞌ.
Kupembiáꞌ bona Nupailalu laluitangkuꞌ
hai Nupehádingi pekakaengkuꞌ.
7 Nupatongawaꞌ kamaꞌahiꞌMu to maroꞌa ntepuꞌu.
Ánti kamakuasaꞌMu, tauna to mengkatueꞌ i Hio
Nupelaeheꞌ hangko i ewáliraꞌ.
8 Kupembiáꞌ bona Nukámpáiaꞌ nodoKoꞌ mokámpái mátáMu.
Nupelaeaꞌ nodo hambaꞌa tádáhi to moꞌóbóki ánáꞌna.
9 Nukámpáiaꞌ hangko i tauna to kadake
to ina mopatunaꞌaꞌ,
hangko i ewálingkuꞌ to modápáꞌaꞌ
hai ina mopapateaꞌ.
10 Tiꞌara raisá maꞌahiꞌ,
hai polaluitaraꞌ maꞌángkáꞌ.
11 Maiheꞌ moewaꞌaꞌ hai motolelingiaꞌ,
mampeliꞌheꞌ oaꞌ tempó bona rapakanawoꞌaꞌ.
12 Nodoheꞌ singá to timama ina mohakaꞌ ewálina,
nodoheꞌ ánáꞌ singá to maróhó, to mebuni i kamawuniána.
13 MaimoKoꞌ PUEꞌ, Nuewaꞌheꞌ ewálingkuꞌ hai Nupopengkoruꞌheꞌ.
Nupakeꞌ pihoꞌMu Nupelaeaꞌ hangko i taeraꞌ tauna to kadake.
14 Ó PUEꞌ, Nukábáháꞌaꞌ hangko i tauna
to morámpu peá párewá i duniáꞌ,
Nuhukuheꞌ hai pehuku to Nupatimama miꞌi,
haweꞌ-haweꞌ i ánáꞌraꞌ hai ueꞌraꞌ.
15 Agáiáná kódóꞌ, ina kuitaKoꞌ,
láwiꞌ tiꞌaraꞌaꞌ masalaꞌ.
I tempóngkuꞌ mearó,
kahaweꞌMu i kódóꞌ kupogóeꞌ ntepuꞌu.