Pewátiꞌ i tauna to manótó
16
Nanina Daudiꞌ.
Ó Pueꞌ Ala, kupembiáꞌ bona Nukámpáiaꞌ,
láwiꞌ mengkatueꞌaꞌ i Hio.
2 Kupangákuꞌ i lindoꞌMu PUEꞌ:
“Io peá to makuasaꞌ i katueꞌkuꞌ.
Upu-upu to maroꞌa i lalu katueꞌkuꞌ,
hangko i Hio peá pentóáꞌána.”
3 Tauna to magasaꞌ tueꞌraꞌ to toroꞌ i tampoꞌ deꞌe,
kubiláꞌheꞌ hai kuꞌundeꞌ ntepuꞌuheꞌ kupohingkakaniá.
4 Tauna to menómbá i ánitu,
mantámbái kamasusaraꞌ.
Tiꞌaraꞌaꞌ mau mobubu waheꞌ
mewaliꞌ popenómbá i ánituraꞌ nodo to rabábehi,
mogalo riꞌi manguliꞌ hangaꞌna ánituraꞌ, tiꞌaraꞌaꞌ mau.
5 Ó PUEꞌ, Io miꞌi to kuhárungá i katueꞌkuꞌ.
Upu-upu to kuparaluu, Nuweꞌiaꞌ.
Polumaona katueꞌkuꞌ ara i taeMu.
6 Tampoꞌ to Nuweꞌiaꞌ maroꞌa ntepuꞌu,
hai sosorangkuꞌ iti kupokagóeꞌ ntepuꞌu.
7 Ó PUEꞌ, kutóiáKoꞌ,
láwiꞌ Io miꞌi to mamponóntóáꞌaꞌ i lalu katueꞌkuꞌ.
Kehapiꞌ miꞌi tangaꞌ káindi,
kupailalu ntepuꞌu pepaturoꞌMu i kódóꞌ.
8 KubuhinaoKoꞌ oaꞌ PUEꞌ,
tiꞌara ara to peisá mopakanawoꞌaꞌ
láwiꞌ Io PUEꞌ araKoꞌ oaꞌ hingkakani hai kódóꞌ.
9 Onoꞌ miꞌi haneꞌi góeꞌ ntepuꞌu lalungkuꞌ,
hai mohoraꞌ-horaꞌaꞌ ánti kagóeꞌkuꞌ.
Mengkarooaꞌ i katinda lalu.
10 Tiꞌaraꞌaꞌ ina Nupatodáhi toroꞌ oaꞌ i duniáꞌraꞌ tomate.
Hai taunáMu to magasaꞌa tiꞌara ina Nupatodáhi tuna.b
11 Nutudeꞌáꞌaꞌ rárá to menóntó i katueꞌ to tiꞌara mokahópóꞌá.
Ina Nuweꞌiaꞌ kagóeꞌ lalu tempóngkuꞌ hingkakani hai Io.
Kagóeꞌ-góeꞌ to tiꞌara mokahópóꞌá mentóáꞌ hangko i tae kuánáMu.