Peawaꞌna Pueꞌ Ala tongawaꞌ hangko i bábehiáNa
19
I topoánti toponani. Nani to nakáráhi Daudiꞌ.
2 Langiꞌ mopatongawaꞌ peawaꞌna Pueꞌ Ala,
hai laerawa mampolaluita apa to Napopewaliꞌ.
3 Hangalo-hangalo rapatongawaꞌ peawaꞌNa,
hambengi-hambengi rapopaisá kaheánána Pueꞌ Ala.
4 Langiꞌ hai laerawa tiꞌaraheꞌ molaluita,
wambaꞌraꞌ tiꞌara tehádi,
5 agáiáná posabikiraꞌ tebámbári i humalele duniáꞌ,
hai polaluitaraꞌ rahádi haweꞌ i wuntu duniáꞌ.
Pueꞌ Ala mopatimama katoroꞌána alo i langiꞌ.
6 Mepulo-pulo alo mesupaꞌ nodo hadua tobaleilo to ratauna,
to mesuwuꞌ hangko i lintuꞌna
hai molumao nodo hadua tobaleilo
to maróhó melangka i kagóeꞌ-góeꞌna.
7 Hangko i wiwi langiꞌ alo mesupaꞌ,
hai molumao oaꞌ duuꞌna haweꞌ i hambalina.
Tiꞌara ara to teóndóngángi hangko i kamaꞌámuꞌna.
Peawaꞌna PUEꞌ tongawaꞌ hangko i ngkóráꞌNa
8 Paturoꞌna PUEꞌ tiꞌara ara kamakuraꞌna,
hai mopakaróhó laluraꞌ tauna.
Áturána PUEꞌ iti peisá rapoinálái,
hai mampeweꞌi kanótó lalu
i tauna to tiꞌara hangka iumbá pekiriraꞌ.
9 Áturána PUEꞌ iti toꞌu,
hai mopagóeꞌ laluraꞌ tauna.
Hawaꞌna PUEꞌ iti magasaꞌ,
hai mopamanótó pekiri tauna.
10 Pengkoruꞌtaꞌ i PUEꞌ iti maroꞌa,a
hai mantaha haweꞌ i rue-ruena.
Áturána PUEꞌ manótó,
hai upu-upuna hintotoꞌ.
11 HawaꞌNa iti melumbuꞌ kamaroꞌana
hangko i buláwá to handaꞌ to mengkilaꞌ ntepuꞌu,
hai melumbuꞌ kamatánina hangko i tináháꞌ
to tudoꞌ hangko i támbi uwani.
12 HawiꞌMuheꞌ tepaingáꞌi hangko i upu-upu hawaꞌMu,
hai tauna to mampeuláꞌi párentáMu
ina molámbiꞌheꞌ háwángina to mahile.
13 Heáná paꞌi to moisá salaꞌna haduduána?
Nuámpungiaꞌ wongkódóꞌá
hangko i salaꞌ to tiꞌara kuhádiá.
14 Ineeꞌaꞌ Nupatodáhi motunggái mobábehi dósá.
Nukámpáiaꞌ bona dósá tiꞌara mokuasaꞌiaꞌ,
bona kódóꞌ deꞌe tiꞌara ara salaꞌiángkuꞌ,
hai tekábáháꞌaꞌ hangko i dósá to mahile.
15 Ó PUEꞌ, hampóáꞌworia Nupokana
upu-upu to kuꞌuliꞌ hai to kupepekiri,
láwiꞌ Io miꞌi buluꞌ watu pengkatueꞌángkuꞌ
hai topehómpóꞌ to mokábáháꞌaꞌ.