Pekakae bona datu menangi
20
I topoánti toponani. Nani to nakáráhi Daudiꞌ.
2 Ee datu, hampóáꞌworia PUEꞌ mohániki pekakaemu i tempómu mapári!
Kipembiáꞌ bona kuasaꞌna Pueꞌ Ala to napenómbái Iako mokámpáikoꞌ!
3 Hampóáꞌworia Pueꞌ Ala motulungikoꞌ hangko i katoroꞌáNa to magasaꞌ,
hai mampoweꞌikoꞌ kamaróhó hangko i buluꞌ Sio.
4 Hampóáꞌworia upu-upu popenómbámu Nabuhinao oaꞌ,
hai góeꞌ laluNa motarima popenómbá to nuintu.
5 Hampóáꞌworia peundeꞌána lalumu ina Naweꞌikoꞌ,
hai upu-upu to nuliwo ina Napopewaliꞌ.
6 Ina mohoraꞌ-horaꞌangkaiꞌ ánti penangimu,
hai kiundeꞌ moꞌoreꞌ bánderá i lalu hangaꞌna Pueꞌ Ala Pueꞌtaꞌ.
Hampóáꞌworia PUEꞌ mobukeki upu-upu pembiáꞌmu.
7 Deꞌe-deꞌe kuisá miꞌi, PUEꞌ peá
to ina mampelae tauna to Napileꞌi mewaliꞌ datu,
láwiꞌ hangko i surugáꞌ to magasaꞌ,
PUEꞌ mohániki pembiáꞌna,
hai mampeweꞌi penangi moliu kuasaꞌna tae kuánáNa.
8 Araheꞌ tauna to mehárungá peá i kereta pombeala,
hai araheꞌ woꞌo to mamporóhó dárá pombeala.
Agáiáná kitaꞌ, mehárungákeꞌ i kuasaꞌna PUEꞌ Ala to tapenómbái.
9 Hira ina tehubeheꞌ haneꞌiheꞌ madámpá,
agáiáná kitaꞌ ina mearókeꞌ hai maróhó oaꞌ peángkáꞌtaꞌ.
10 Ó PUEꞌ, kipembiáꞌ bona Nupeweꞌi penangi i datu,
hai Nuhánikiangkaiꞌ tempóngkiꞌ meraruaꞌ mekakae i Hio.