Nani kagóeꞌ ánti penangina datu
21
I topoánti toponani. Nani to nakáráhi Daudiꞌ.
2 Ó PUEꞌ, góeꞌ miꞌi datu ánti kamakuasaꞌMu.
Ia góeꞌ ntepuꞌu láwiꞌ Nuweꞌi miꞌi penangi.
3 Upu-upu to napoinao hangko i Hio,
Nubukeki miꞌi,
noꞌonoꞌ woꞌo to napembiáꞌ, tiꞌara Nupokabohiꞌá.
4 Nutarima datu hai Nupoweꞌi handaꞌ pewátiꞌ,
Nupakeꞌá tatali datu i wuáꞌna,
to rabábehi hangko i buláwá to mengkilaꞌ.
5 Napembiáꞌ bona katueꞌna Nukámpái,
hai pembiáꞌna iti Nubukeki.
Kamatinuwuꞌna Nuweꞌi haweꞌ i rue-ruena.
6 Hangaꞌna rapomahile ntepuꞌu láwiꞌ Nupoweꞌi penangi.
Io to mampoweꞌi peawaꞌ hai peádái i hia.
7 Nuwátiꞌ oaꞌ katueꞌna haweꞌ i rue-ruena.
Ánti kaNuporángána, ia góeꞌ oaꞌ.
8 Datu mehárungá i Hio PUEꞌ to i Surugáꞌ,
hai maróhó oaꞌ
ánti kamaꞌahiꞌMu to tiꞌara madepuꞌ-depuꞌ.
9 TaeMu ina haweꞌ i upu-upu ewáliMu,
hai ina Nuhakaꞌheꞌ tauna to mokáhihiꞌKoꞌ.
10 I kahaweꞌMu, upu-upu ewáliMu ina Nupatunaheꞌ
i lalu api to roreꞌ ntepuꞌu.
Ánti kamabukoꞌMu PUEꞌ,
ina naꞌandeꞌheꞌ api haweꞌ mate.
11 Pemuleꞌáraꞌ ina Nuropuꞌheꞌ,
álána tunaheꞌ hangko i wongko duniáꞌ deꞌe.
12 Kehapiꞌ moliwoheꞌ mobábehi to kadake i Hio,
poliworaꞌ iti tiꞌara ina mewaliꞌ.
13 KaraitáMu modiiꞌ panaꞌMu,
kásáliu ina melangkaheꞌ.
14 KipomahileKoꞌ PUEꞌ, láwiꞌ maróhó kamakuasaꞌMu,
kiponani nani petóiá ánti kamaróhóMu.