Pueꞌ Ala, moapa riꞌi haneꞌiaꞌ Nupálehi?
22
I topoánti toponani. Rananika mouláꞌ nani “Lagiwa Ane Hungkuꞌ Miꞌi Mabaa.” Nani to nakáráhi Daudiꞌ.
2 Pueꞌ Ala Pueꞌkuꞌ!
Moapa riꞌi haneꞌiaꞌ Nupálehi?a
Meraruaꞌaꞌ i Hio, agáiáná Nukaraohiraꞌaꞌ
hai tiꞌaraꞌaꞌ Nutulungi.
3 Ó Pueꞌ Ala Pueꞌkuꞌ, tempó mabaa mekióꞌaꞌ i Hio,
agáiáná tiꞌaraꞌaꞌ Nuhániki,
hai káindi mekakaeaꞌ,
agáiáná tiꞌaranto woꞌo tinda lalungkuꞌ.
4 Mole riꞌi Io Pueꞌ Ala to magasaꞌ,
hai mehodaKoꞌ i pehodaꞌá kadatuáMu
motarima petóiá hangko i toSáráeliꞌ.
5 Toiorungkiꞌ mehárungáheꞌ i Hio,
hai Nupelaemoheꞌ.
6 Meraruaꞌheꞌ i Hio, hai Nupelaeheꞌ.
Mehárungáheꞌ i Hio, hai tiꞌara kóiꞌ inaoraꞌ
{láwiꞌ dándiMu i hira Nupabukeꞌi}.
7 Agáiáná kódóꞌ, pehádingkuꞌ nodo tiꞌarapoꞌ tauna,
nodo peaꞌ hambaꞌa tanadu,
láwiꞌ handaꞌ tauna to motitibei hai mopakóiꞌaꞌ.
8 Upu-upu tauna to moitaꞌaꞌ mengee-ngee,
rapetabeuꞌáꞌaꞌ hai mobibiliheꞌ tandaꞌ karapakóiꞌkuꞌ.b
9 Rauliꞌ, “Ia mehárungá i PUEꞌ,
babilaꞌ PUEꞌ ina mai mampelae.
Ane ia napokagóeꞌ Pueꞌ,
babilaꞌ ina Nakábáhá.”c
10 Mole riꞌi, ánti petulungiMu haneꞌi peisáꞌaꞌ naꞌánáka inángkuꞌ,
hai maroꞌa ntepuꞌu pehádingkuꞌ mepalintukuꞌ i pondána.
11 Mantepuꞌu hangko i karapoánákangkuꞌ,
katueꞌkuꞌ ara i lalu taeMu.
Mantepuꞌu hangko i lalu taꞌina inángkuꞌ,
Io miꞌi Pueꞌ Ala to kupenómbái.
12 IneeꞌKoꞌ karaoꞌ hangko i kódóꞌ,
láwiꞌ ara kapári to ina morampeaꞌ,
hai tiꞌara ara haweꞌ hadua to ina motulungiaꞌ.
13 Handaꞌheꞌ ewálingkuꞌ to mai mokómbóngiaꞌ,
nodoheꞌ gapiꞌ to maróhó hangko i tampoꞌ Basana.
14 Ewálingkuꞌ timamaheꞌ ina mopatunaꞌaꞌ,
nodoheꞌ singá to tebungkáhi humeraꞌ
mebentá-bentá haneꞌi mengau.
15 Róhóngkuꞌ upu nodo uwai to mabubu,
upu-upu buꞌungkuꞌ nodo to ina malehoki,
lalungkuꞌ nodo taru to magonuꞌ.
16 Róhóngkuꞌ upu nodo kori tampoꞌ to marupuꞌ,
lilaꞌkuꞌ medingkiꞌ i káráꞌkuꞌ,
Ó Pueꞌ, Nupálehimoꞌ i wongko awu,
nodo tauna to mate.
17 Nodo ahu to handaꞌ, ewálingkuꞌ mai mokómbóngiaꞌ,
haneꞌiheꞌ motohuꞌ tae hai bitingkuꞌ.
18 Upu-upu buꞌungkuꞌ peisá kuimbaꞌ.
Tauna mai molelemataꞌ hai mampengongoꞌiaꞌ.
19 Waruꞌkuꞌ ragáláꞌ-gáláꞌ,
hai kumbángkuꞌ rabolobiaꞌ.d
20 Agáiáná Io PUEꞌ, ineeꞌKoꞌ karaoꞌ hangko i kódóꞌ.
Io to mampoweꞌiaꞌ róhó.
HawiáꞌmoKoꞌ, maiaꞌ wongkódóꞌá Nutulungi.
21 Nukábáháꞌaꞌ hangko i ewálingkuꞌ
to moundeꞌ mopapateaꞌ hai pihoꞌ.
Nupelae katueꞌkuꞌ hangko i taeraꞌ ewálingkuꞌ
to nodomoheꞌ ahu to ina mehakaꞌ.
22 Nukábáháꞌaꞌ hangko i taeraꞌ ewálingkuꞌ
to nodoheꞌ singá to ina mehakaꞌ,
hai nodoheꞌ gapiꞌ to ina metánduꞌ.
Nuhániki mpuꞌumoꞌ!
23 Upu-upu to Nubábehi ina kupolaluita
i oloꞌraꞌ hángká rángángkuꞌ.
I kahirámpuáraꞌ taunáMu,
ina kutóiáKoꞌ Pueꞌ.
24 Kómu to mengkoruꞌ i PUEꞌ, nitóiá miꞌi.
Ee upu-upu pemuleꞌána Iako! Nipomahile hangaꞌna Pueꞌ.
Menómbámokou i Hia upu-upu pemuleꞌána Sáráeliꞌ,e
25 láwiꞌ Pueꞌ tiꞌara mopakóiꞌ ba mampokatidiꞌ
tauna to rapopeahiahiꞌ.
Ia tiꞌara motaleuki tauna iti,
agáiáná Ia mampehádingi tauna
to meraruaꞌ membiáꞌ tulungi i Hia.
26 KutóiáKoꞌ i kahirámpuáraꞌ taunáMu to handaꞌ.
Ina kubukeki dándingkuꞌ i lindoꞌraꞌ tauna to mengkoruꞌ i Hio.
27 Tauna to meahiahiꞌ ina mandeꞌ duuꞌraꞌ mabuhu.
Tauna to moundeꞌ moisá PUEꞌ, ina metóiáheꞌ i Hia.
Hampóáꞌworia góeꞌ laluraꞌ haweꞌ i rue-ruena.
28 Sanggena to i duniáꞌ ina mambuhinao PUEꞌ
hai mesuleꞌheꞌ i Hia.
Upu-upu tauna i duniáꞌ ina molingkuduheꞌ menómbá i Hia,
29 láwiꞌ PUEꞌ miꞌi datu to makuasaꞌ,
Ia to mopárentái upu-upu tauna i duniáꞌ.
30 Upu-upu tauna to maroꞌa katueꞌraꞌ i duniáꞌf
ina mandeꞌheꞌ hai menómbá i Hia.
Upu-upu tauna to mesuleꞌ mewaliꞌ awu,
to tiꞌara rabuku tueꞌ,
bateꞌraꞌ ina molingkuduheꞌ woꞌo i lindoꞌNa.
31 Tauna to ina rapoánáka ina menómbáheꞌ i Pueꞌ,
hai ina mampolaluitaheꞌ mokana i Pueꞌ
i tauna to tiꞌara mani rapoánáka.
32 Ina rapahaweꞌ mokana i kamanótóna Pueꞌ
i pemuleꞌánaheꞌ to ina mesupaꞌ,
láwiꞌ PUEꞌ mampelae miꞌi taunáNaheꞌ.