ToGibeo hai pemuleꞌánaheꞌ Saulu
21
I tempó popárentána Daudiꞌ, ara rimi to rumihi, tálu parena kamaruena, onoꞌ haneꞌi lao miꞌi Daudiꞌ mekuneꞌ i PUEꞌ noumbá haneꞌi mewaliꞌ. Nahániki PUEꞌ, “Rimi iti mewaliꞌ ánti kamasalaꞌna Saulu hai pemuleꞌánaheꞌ, láwiꞌ mopapateheꞌ toGibeo.”2 ToGibeo iti tiꞌaraheꞌ toSáráeliꞌ, pentáráꞌánaheꞌ toAmori. Kehapiꞌ marue miꞌi toSáráeliꞌ mopaꞌaramoheꞌ podándi pohintuwuꞌ hai toGibeo,a agáiáná bahangapa parena to liu, Saulu mampehukáꞌ mopatunaheꞌ láwiꞌ ia mampoinao toSáráeliꞌ hai toIudá mokuasaꞌi humalele tampoꞌ iti. 3 I kanaisána Daudiꞌ apa álásána rimi iti, ia mokióꞌmoheꞌ tadulakoraꞌ toGibeo, haneꞌi mekuneꞌ, “Apa to paraluu kubábehiákou? Noumbá rárána kupopobaiari kamasalaꞌna Saulu iti, bona maroꞌakou huleꞌ i kaiꞌ taunána PUEꞌ.”
4 Mewaliꞌ rahániki toGibeo, rauliꞌ, “Kara-karangkiꞌ hai pemuleꞌánaheꞌ Saulu tiꞌara peisá rabaiari hai buláwá ba peráꞌ. Tiꞌaraꞌangkaiꞌ woꞌo peisá mohuku mate haweꞌ hadua toSáráeliꞌ, ane tiꞌara mouláꞌ pobutusina datu.”
Napekuneꞌ Daudiꞌ, “Ane noꞌonoꞌi, apa to niundeꞌ kubábehiákou?”
5 Rahániki toGibeo, “Saulu to mampoinao ina moropuꞌangkaiꞌ duuꞌkiꞌ tuna i tampoꞌ Sáráeliꞌ. 6 Mewaliꞌ kipembiáꞌ bona nuhuhuꞌheꞌ pitu tobaleilo pemuleꞌána Saulu, bona kitóeheꞌ i lindoꞌna PUEꞌ i Gibeá wánuána Saulu, datu to napileꞌi miꞌi PUEꞌ.”b
Nahániki datu, “Noꞌonoꞌ miꞌi. Ina kuhuhuꞌheꞌ i kómu.”
7 Agáiáná datu maꞌahiꞌ i Mepibose ánáꞌna Ionata ueꞌna Saulu, láwiꞌ mambuhinao podándina hai Ionata to napaꞌara i lalu hangaꞌna PUEꞌ.c 8 Onoꞌ haneꞌi ia moala Mepibose to ntániꞌna hai Amoni, ánáꞌnaheꞌ Saulu hangko i pohambokoraꞌ hai Risipa ánáꞌna Aia, hai limaheꞌ tobaleilo ánáꞌnaheꞌ Meraba ánáꞌna Saulu,d hai Arieli ánáꞌna Barasilai toMehola. 9 Hangko ionoꞌ, pemuleꞌánaheꞌ Saulu iti nahuhuꞌ Daudiꞌ i lalu taeraꞌ toGibeo. Mewaliꞌ toGibeo iti mopapateheꞌ, hai motóe wátámandoꞌraꞌ to pitu iti i tutuꞌ buluꞌ i lindoꞌna PUEꞌ. Tauna to pitu iti mateheꞌ hingkakani. Hira rahuku mate i kahópóꞌána tempó madiiꞌ, i tempóna wulu laiꞌ hangko mantepuꞌu rapepare.
10 Roo onoꞌ, Risipa, towawine to napiaraꞌ Saulu, moala karuꞌ, nabinihi i wongko buluꞌ watu, tandaꞌ kawiorana. Mantepuꞌu tempó mepare haweꞌ tempó udá, ia mokámpái wátámandoꞌraꞌ to pitu iti.e Mabaa ia tiꞌara mampatodáhi tádáhi mengkatóá i wátáraꞌ iti, hai káindi tiꞌara mampatodáhi binataꞌ to maila mandeꞌ.
11 I karapahaweꞌána Daudiꞌ apa to nabábehi Risipa iti, 12 ia lao moala buꞌuraꞌ Saulu hai Ionata ánáꞌna hangko i wánuá Iabesi i tampoꞌ Gileaꞌ. Bahangapa parena to liu, i tempóraꞌ toPelisitiꞌ monangiheꞌ toSáráeliꞌ i buluꞌ Giboa, moántiheꞌ wátámandoꞌraꞌ Saulu hai Ionata i Bete-Sea ratóe i tanalapa. Agáiáná toIabesi lao moala ngkaniiꞌ-niiꞌ buꞌuraꞌ iti, ratawu i wánuá Iabesi.f 13 Mewaliꞌ Daudiꞌ moánti buꞌuraꞌ Saulu hai Ionata iti, hai morámpu woꞌo buꞌuraꞌ tobaleilo to pitu to ratóe iti. 14 Napehuoꞌá bona ratawuheꞌ hingkakani hai buꞌuraꞌ Saulu hai Ionata i Sela i tampoꞌraꞌ toBenami, i lalu popatawuána Kisi umána Saulu. I karooraꞌ tauna mobábehi to napárentáiáheꞌ datu, Pueꞌ Ala mobukeki pekakaeraꞌ bona tampoꞌ Sáráeliꞌ tiꞌara piꞌi narampe kamarimi.
Pombealaraꞌ toSáráeliꞌ hai toPelisitiꞌ
15 Hangkani tempó, mewaliꞌ wopiꞌi pombealaraꞌ toPelisitiꞌ hai toSáráeliꞌ. Lao miꞌi Daudiꞌ hingkakani hai surudadoꞌnaheꞌ. I lalu pombeala iti, Daudiꞌ maledeꞌ ntepuꞌu. 16 Tempó iti, haweꞌ hadua to rahangaꞌ Isibi-Benoꞌ. Ia pemuleꞌánaheꞌ tauna to mahile wátáraꞌ. Tawalaꞌna rabábehi hangko i tambaga, hai kamatimina tálu kiló hantangaꞌ.g Ia mopatakaꞌ woꞌo pihoꞌ to woꞌu, nahárungá peisá mopapate Daudiꞌ. 17 Agáiáná Abisai ánáꞌna Seruia haweꞌ mampelae Daudiꞌ. Ia mampombealaꞌá hai mopapate toPelisitiꞌ iti. Roo onoꞌ, surudadoꞌnaheꞌ Daudiꞌ membiáꞌ i Daudiꞌ, rauliꞌ, “Ineeꞌmokoꞌ mombeala hingkakani hai kaiꞌ, bona pemuleꞌámu i tampoꞌ Sáráeliꞌ tiꞌara ina tuna hingkakani hai io, láwiꞌ io miꞌi to kihárungá.”h
18 Bahangapa kamaruena hangko ionoꞌ, mombeala wopaheꞌ hai toPelisitiꞌ i Goꞌ. I tempó iti, Sibekai toHusa mopapate Sapa. Sapa iti tepasuaꞌheꞌ pemuleꞌána tauna to mahile.
19 Tiꞌara marue hangko ionoꞌ, mewaliꞌ wopiꞌi pombeala hai toPelisitiꞌ i Goꞌ. Elehana ánáꞌna Iare toBeteleme mopapate Goliá toGati.i Kamahilena durukána tawalaꞌna Iare iti nodo kahilena kau párewá mantanu.
20 Roo onoꞌ, mewaliꞌ wopiꞌi pombeala i Gati, hai ionoꞌ ara hadua tauna to mapángkáꞌ hai mahile wátána. Karaweꞌna i taena hai i bitina, ini, lempóna rompuloꞌ hai iba káuna karaweꞌna, hai tauna iti tepasuaꞌ woꞌo pemuleꞌána tauna to mahile wátáraꞌ. 21 Ia mohuwárá laluita mopakóiꞌ toSáráeliꞌ, onoꞌ haneꞌi napapate Ionata pinoánáꞌna Daudiꞌ, ánáꞌna Simea wutuꞌna Daudiꞌ.
22 Tauna to ibaheꞌ iti, tepasuaꞌheꞌ tauna to mahile wátáraꞌ i kótá Gati. Mateheꞌ i taeraꞌ Daudiꞌ hai surudadoꞌnaheꞌ.