Seba moewaꞌ Datu Daudiꞌ
20
I kótá Giligá, ara hadua toBenami to paka meꞌewaꞌ. Hangaꞌna Seba ánáꞌna Bikiri. Ia motawueꞌ tamburuꞌ hai molaluita, nauliꞌ, “Kitaꞌ tiꞌara ara pombekáiꞌántaꞌ hai Daudiꞌ. Tiꞌarakeꞌ molámbiꞌ sosora hangko i ánáꞌna Isai iti. Ee toSáráeliꞌ, mesuleꞌmokeꞌ i wánuántaꞌ hadua-hadua.”2 Roo onoꞌ, upu-upu toSáráeliꞌ iti mopálehiheꞌ Daudiꞌ hai meuláꞌmoheꞌ i Seba ánáꞌna Bikiri iti, agáiáná toIudáheꞌ bateꞌna peá meuláꞌ i daturaꞌ, hai raporángá oaꞌ hangko i uwai Iarade haweꞌ-haweꞌ i kótá Ierusale.
3 I kahaweꞌna Daudiꞌ i támbi kadatuána i Ierusale, ia moala hampuloꞌ towawine to napálehi iaꞌo bona mokádipuráheꞌ támbi kadatuá, hai napatoroꞌheꞌ i hambuaꞌ támbi bona rakámpáiheꞌ ionoꞌ. Towawine iti napiaraꞌheꞌ, agáiáná tiꞌarapoheꞌ haweꞌ hangkani napoiluhi. Hira rapataniꞌheꞌ hai tueꞌheꞌ nodo tobembaꞌ haweꞌ i kamateraꞌ.
4 Roo onoꞌ, molaluita miꞌi datu i Amasa,a nauliꞌ, “I lalu tálu alona, nurámpuheꞌ surudadoꞌ toIudá hai nuántiheꞌ mai i kódóꞌ.” 5 Lao mpuꞌu miꞌi Amasa morámpu surudadoꞌ toIudá, agáiáná i tempó to napakanótó miꞌi datu, ia tiꞌara mani mesuleꞌ.
6 Hangko ionoꞌ, molaluita miꞌi datu i Abisai, nauliꞌ, “Deꞌe-deꞌe rumihi pehurewukina Seba ánáꞌna Bikiri hangko i peꞌewaꞌna Abisalo. Mewaliꞌ nuántiheꞌ surudadoꞌkuꞌ deꞌe hai nidápáꞌ Seba iti, bona ia tiꞌara mesuaꞌ i kótá to rabente hai tiꞌara piꞌi peisá tahakaꞌ.” 7 Mewaliꞌ Ioabiꞌ, toKereti hai toPeleti, surudadoꞌ to mokámpái datu, hai upu-upuheꞌ surudadoꞌ to pebáiꞌ ntepuꞌu, pohuꞌheꞌ hangko i Ierusale, laoheꞌ modápáꞌ Seba ánáꞌna Bikiri iti.
8 I kahaweꞌraꞌ i watu mahile i Gibeo,b Amasa ara miꞌi ionoꞌ. Tempó iti, Ioabiꞌ mebadu pombeala hai ara miꞌi pihoꞌ i hopeꞌna. Tangaꞌna molumao ina motabe Amasa, pihoꞌna iti manawoꞌ. 9 Nauliꞌ Ioabiꞌ i Amasa, “Halalungkuꞌ! Noumbá bámbári?” Tae kuánána motibaaꞌ danggona Amasa, nodo to ina meángki. 10 Tempó iti, Amasa tiꞌara moita pihoꞌ to ara i tae kabeoꞌna Ioabiꞌ iti. Iaperái hangkaꞌ Ioabiꞌ motohuꞌ taꞌina Amasa, álána óntóꞌ taꞌina mabubu i tampoꞌ. Kásáliu mate Amasa, tiꞌara paraluu natáruhu huleꞌ Ioabiꞌ.
Roo onoꞌ, Ioabiꞌ hai Abisai ádina liliu modápáꞌ Seba. 11 Hadua hangko i oloꞌraꞌ surudadoꞌna Ioabiꞌ meángkáꞌ i hintáiꞌna wátámandoꞌna Amasa, nauliꞌ, “Heáná tándáꞌ i Daudiꞌ, meuláꞌkou i Ioabiꞌ!”
12 Tempó iti, wátámandoꞌna Amasa to bukeꞌ waheꞌ iti ara mani i tangaꞌ rárá. I kanaitána miꞌi surudadoꞌna Ioabiꞌ iti, upu-upu tauna to melempó ionoꞌ mengkarooheꞌ mampeita Amasa, ia modiiꞌ sosoꞌ wátámandoꞌna Amasa hangko i karadaa, nawoli i pádá, haneꞌi moala báná napopohumbáki. 13 Roo miꞌi wátána Amasa iti raꞌánti karaoꞌ hangko i karadaa, upu-upu surudadoꞌ liliumoheꞌ mouláꞌ Ioabiꞌ, laoheꞌ modápáꞌ Seba ánáꞌna Bikiri iti.
14 Seba lao miꞌi motunggái upu-upu tampoꞌ to rakatoroꞌi toSáráeliꞌ, haneꞌi lao monóntóhi kótá Abeli i Beꞌ-Maka, hai upu-upu toBikiri meuláꞌheꞌ i hia. 15 Tiꞌara marue hangko ionoꞌ, rahádimoheꞌ surudadoꞌna Ioabiꞌ iumbá kaꞌaraꞌána Seba, onoꞌ miꞌi haneꞌi laoheꞌ i kótá Abeli i Beꞌ-Maka hai molibuꞌ kótá iti. Motámbungaheꞌ tampoꞌ bona peisáheꞌ mesuaꞌ i bente kótá, hai ara woꞌo to mokae tampoꞌ i wóiꞌ bentena kótá iti bona maꞌambaꞌ.
16 I lalu kótá iti, ara hadua towawine to bukeꞌ pekiri. Ia lao meángkáꞌ i tutuꞌ bente kótá mekióꞌ, nauliꞌ, “Nipehádingi! Nipehádingi! Nikióꞌ mai Ioabiꞌ, kupoinao molaluita hai ia.” 17 Hangko ionoꞌ, lao mpuꞌu miꞌi Ioabiꞌ mohungkuki towawine iti. Mewaliꞌ mekuneꞌ miꞌi towawine iti, nauliꞌ, “Ba io miꞌi Ioabiꞌ?”
Nahániki Ioabiꞌ, “Io, kódóꞌnto.”
Hangko ionoꞌ, nauliꞌ towawine iti, “Tuá, nupehádingi laluitangkuꞌ deꞌe.”
Nahániki Ioabiꞌ, “Ió, kupehádingi. Apa to nuparaluu?”
18 Nauliꞌ towawine iti, “Hangkoia, ane tauna mosisalaꞌ, pakaheꞌ manguliꞌ, ‘Laokeꞌ membiáꞌ paturoꞌ i kótá Abeli ba i Daa,’ hai ionoꞌ molámbiꞌheꞌ paturoꞌ to maroꞌa. 19 Pueꞌ wánuá kótá deꞌe tauna to moundeꞌ dame. Agáiáná moapa riꞌi haneꞌi motunggáikoꞌ mopatuna kótá deꞌe, kótá to teádái i tampoꞌ Sáráeliꞌ. Moapa riꞌi haneꞌi nupoinao mogero hambuaꞌ kótána PUEꞌ?”
20 Nahániki Ioabiꞌ, “Tiꞌara noꞌonoꞌ tunggáiángkuꞌ! Kótá deꞌe tiꞌara ina kugero! 21 Tunggáiángkuꞌ tiꞌara haweꞌ ionoꞌ. Agáiáná ara hadua to hangko i buluꞌ Eparai, hangaꞌna Seba ánáꞌna Bikiri. Ia moewaꞌ Datu Daudiꞌ. Ane nuhuhuꞌáꞌaꞌ mai tauna iti, ina pohuꞌangkaiꞌ hangko i kótá deꞌe.”
Nauliꞌ towawine iti, “Maroꞌa. Wuáꞌna Seba iti ina ratendeákoꞌ hangko i bente deꞌe.”
22 Mewaliꞌ lao mpuꞌu miꞌi towawine iti, mopahaweꞌ tunggáiána to maroꞌa i tauna to toroꞌ i kótá iti. Roo onoꞌ, laomoheꞌ mobóhóki támbólóna Seba haneꞌi wuáꞌna ratende i Ioabiꞌ. Hangko ionoꞌ, Ioabiꞌ motawueꞌ tamburuꞌ, hai upu-upu surudadoꞌna mogááꞌ-gááꞌmoheꞌ mopálehi kótá iti, mesuleꞌheꞌ i katoroꞌáraꞌ hadua-hadua. Noꞌonoꞌ woꞌo Ioabiꞌ mesuleꞌ i kótá Ierusale hai lao i Datu Daudiꞌ.
Topobágóꞌnaheꞌ Daudiꞌ
23 Deꞌemoheꞌ taunána Daudiꞌ to mapángkáꞌ lántiꞌraꞌ:
Tadulako surudadoꞌ toSáráeliꞌ ia miꞌi Ioabiꞌ.
Tadulako toKereti hai toPeleti topokámpáina Daudiꞌ ia miꞌi Benaia ánáꞌna Ioiada.
24 Tadulako topobágóꞌ to rapasaꞌ: Adoram.
Topokádipurá dóiꞌ kadatuá: Iosapa ánáꞌna Ahiluꞌ.
25 Guruntulisiꞌ negárá: Seia.
Tadulako menómbá: Sadoꞌ hai Abiata.
26 Tadulako menómbá i támbi kadatuá: Ira to hangko i wánuá Iairi.