Penangina Daudiꞌ i pombeala
(1 Tuntukáná 18:1-13)
8
Bahangapa kamaruena hangko ionoꞌ, Datu Daudiꞌ mombeala wopiꞌi hai toPelisitiꞌ, hai nanangiheꞌ. Hangko ionoꞌ, Datu Daudiꞌ mokuasaꞌi kótá pehodaꞌá popárentáraꞌ toPelisitiꞌ.2 Hai Daudiꞌ monangiheꞌ woꞌo toMoabiꞌ. Nahuoꞌheꞌ motere motubáláꞌ i tampoꞌ, hai tálu terena, rontere rapapate. ToMoabiꞌ mengkoruꞌ i Daudiꞌ hai hangaa-ngaa mobaiariheꞌ ásele i hia.
3 Roo onoꞌ, Daudiꞌ monangi Hadadese ánáꞌna Reho datu i Sobá.a Tempó iti, Hadadese tangaꞌna lao ina mopakaróhó huleꞌ kamakuasaꞌna i uwai Epara. 4 Daudiꞌ motawani hasábu pitu átuna surudadoꞌna Hadadese to modárá hai rompuloꞌ sábuna surudadoꞌna to molumao. Upu-upu dárá to modiiꞌ kereta pombeala nabóhóki uaꞌna pádóꞌraꞌ, agáiáná napopentárá hangatu dárá bona peisáheꞌ modiiꞌ kereta pombeala.
5 Hangko ionoꞌ, toÁrá to hangko i Damasiꞌ ina laoheꞌ motulungi Hadadese datu i Sobá, agáiáná nanangiheꞌ Daudiꞌ, rompuloꞌ hai rosábu surudadoꞌ toÁrá rapapate. 6 Roo onoꞌ, Daudiꞌ mopatoroꞌheꞌ surudadoꞌna i tampoꞌraꞌ toÁrá. ToÁrá iti hangaa-ngaa mengkoruꞌheꞌ i Daudiꞌ hai mobaiari ásele i hia. PUEꞌ mampopenangi Daudiꞌ iumbá peá kalaoána mombeala. 7 Roo onoꞌ, Daudiꞌ morámpu upu-upu lábá buláwá to rapakeꞌ surudadoꞌna Hadadese, naꞌánti lao i Ierusale. 8 Handaꞌ woꞌo tambaga to naꞌala Daudiꞌ hangko i kótá Beta hai Berotai to napárentá Hadadese hangko tiꞌara mani manangi.
9 I kamohádina Tou datu i Hama, Daudiꞌ monangi miꞌi upu-upu surudadoꞌna Hadadese, 10 ia mohuoꞌ Iora ánáꞌna, lao mopahaweꞌ tabeána, nauliꞌ handaꞌ kamaroꞌana i Daudiꞌ ánti penangina miꞌi i Hadadese, láwiꞌ Hadadese paka mampombealaꞌá Tou. Iora moánti párewá-párewá to rabábehi hangko i buláwá, peráꞌ hai tambaga. 11 Upu-upu párewá to narámpu Daudiꞌ napataniꞌá PUEꞌ, noꞌonoꞌ woꞌo buláwá hai peráꞌ to naꞌala hangko i upu-upu tampoꞌ to nanangi i pombeala, 12 ia miꞌi buláwá hai peráꞌ to hangko i tampoꞌ Ara,b hangko i Moabiꞌ hai hangko i toAmoni, hangko i toPelisitiꞌ, hangko i toAmaleꞌ, hai to raperampaꞌi hangko i Hadadese ánáꞌna Reho daturaꞌ toSobá.
13 Daudiꞌ tetámbái wopiꞌi katekahangaꞌiána tempóna mesuleꞌ hangko i kamopapatena hampuloꞌ hai uwalu sáburaꞌ toEdo i lembo Bure. 14 Ia mopatoroꞌheꞌ woꞌo surudadoꞌ i humalele tampoꞌraꞌ toEdo, álána mengkoruꞌheꞌ upu-upu toEdo i Daudiꞌ, hai PUEꞌ mampopenangi Daudiꞌ iumbá peá kalaoána mombeala.
Topobágóꞌnaheꞌ Daudiꞌ
(2 Semueli 20:23-26; 1 Tuntukáná Datu 18:14-17)
15 Daudiꞌ mopárentá upu-upu toSáráeliꞌ, hai ia mepárentá i kahintimbá hai kamanótó.
16 Ioabiꞌ ánáꞌna Seruiac mewaliꞌ tadulako surudadoꞌ,
Iosapa ánáꞌna Ahiluꞌ mewaliꞌ guruntulisiꞌ i támbi kadatuá.
17 Sadoꞌ ánáꞌna Ahituꞌ hai Ahimeleꞌ ánáꞌna Abiata mewaliꞌ tadulako menómbá,
Seraia mewaliꞌ guruntulisiꞌ negárá.
18 Benaia ánáꞌna Ioiada mewaliꞌ tadulakoraꞌ toKereti hai toPeleti,d topokámpáina Daudiꞌ,
hai ánáꞌnaheꞌ Daudiꞌ mewaliꞌheꞌ topopárentá to mapángkáꞌ ntepuꞌu lántiꞌraꞌ.e