Dándina PUEꞌ i Daudiꞌ mokana i tinána hai kadatuána
7
Ánti petulungina PUEꞌ, Datu Daudiꞌ monangi upu-upu ewálina, onoꞌ haneꞌi ia peisá miꞌi toroꞌ i támbi kadatuána. 2 Ia molaluita i nabiꞌ Nata, nauliꞌ, “Peita, kódóꞌ deꞌe toroꞌaꞌ i támbi to rabábehi hangko i kau to maroꞌa ntepuꞌu, agáiáná Petiꞌ Podándina Pueꞌ Ala rawoli peá i bambaruꞌ.”3 Nahániki Nata, nauliꞌ, “Nubábehi hinángkáꞌ tunggáiána lalumu, láwiꞌ PUEꞌ mamporángákoꞌ.”
4 Agáiáná káindi iti mongkóráꞌ miꞌi PUEꞌ i Nata, Nauliꞌ, 5 “Laokoꞌ i Daudiꞌ huoꞌáNgkuꞌ, nupahaweꞌ laluitaNgkuꞌ deꞌe: ‘Io paꞌi to ina mampoaróáꞌAꞌ támbi mewaliꞌ katoroꞌáNgkuꞌ? 6 HungkáꞌKuꞌ moteteꞌ toSáráeliꞌ mesuwuꞌ hangko i tampoꞌ Másiriꞌ duuꞌna deꞌe-deꞌe, tiꞌaraꞌAꞌ haweꞌ hangkani toroꞌ i lalu támbi, agáiáná Kuporángákou oaꞌ hai Kupatongawaꞌ kaꞌaraꞌáNgkuꞌ i bambaruꞌ peá. 7 HungkáꞌKuꞌ mamporángákou upu-upu toSáráeliꞌ tempómi molumao i pádá loriꞌ, tiꞌaraꞌAꞌ haweꞌ hangkani mekuneꞌ i tadulakoraꞌ toSáráeliꞌ node: “Moapa riꞌi haneꞌi tiꞌaraꞌAꞌ nipoaróá támbi to rabábehi hangko i kau to maroꞌa ntepuꞌu hangko i Libano?” ’
8 Onoꞌ haneꞌi hangaa-ngaa laokoꞌ i Daudiꞌ huoꞌáNgkuꞌ nupahaweꞌ i hia, ‘Node ngkóráꞌna PUEꞌ to Makuasaꞌ: Tempómu moewaꞌ mani dimbá hai bekeꞌ i pádá, Kódóꞌ miꞌi to mokióꞌmokoꞌ bona mewaliꞌkoꞌ daturaꞌ toSáráeliꞌ taunáNgkuꞌ. 9 Kuporángákoꞌ iumbá-umbá peá polumaoámu, hai i tempómu mombeala, Kupatunaheꞌ upu-upu ewálimu. Ina Kupopewaliꞌkoꞌ to tekahangaꞌiá, nodo pokahangaꞌiáraꞌ tauna to mapángkáꞌ lántiꞌraꞌ i wongko duniáꞌ. 10 Noꞌonoꞌheꞌ woꞌo toSáráeliꞌ taunáNgkuꞌ, Kupatimamaꞌámoheꞌ tampoꞌraꞌ hai Kupatoroꞌheꞌ ionoꞌ bona maroꞌa katueꞌraꞌ. Tiꞌarapoheꞌ ina rapopeahiahiꞌ tauna to kadake nodo hangkoia. 11 Mantepuꞌu hangko i tempóna Kupileꞌi tauna motadulakoi toSáráeliꞌ taunáNgkuꞌ, rapopeahiahiꞌheꞌ ewáliraꞌ. Agáiáná iti tiꞌara piꞌi ina mewaliꞌ. Ina Kupeámpáráikou hangko i upu-upu ewálimi.’
Hai napahaweꞌ woꞌo PUEꞌ i hio: ‘PUEꞌ ina mampopemuleꞌkoꞌ. 12 Ane matekoꞌ hai ratawukoꞌ hingkakani hai toiorumu, ina Kupileꞌi wátá ánáꞌmu mewaliꞌ datu, hai kadatuána ina Kupamaróhó. 13 Ia miꞌi to ina moaróáꞌAꞌ támbi, hai kadatuáNa ina Kupakaróhó haweꞌ i rue-ruena. 14 Kódóꞌ ina mewaliꞌAꞌ umána, hai ia ina mewaliꞌ ánáꞌKuꞌ. Ane mobábehi salaꞌ, ina Kuhuku nodo umaꞌ to mohuku ánáꞌna. 15 Agáiáná ahiꞌKuꞌ i hia tiꞌara ina mokahópóꞌá, tiꞌara nodo to Kubábehi i Saulu. Kupopengkaroo mewaliꞌ datu, bona io miꞌi ina Kuángkáꞌ mopaháwángi. 16 Tinámu hai kadatuámu ina maróhó haweꞌ i rue-ruena, pemuleꞌámu ina mepárentá oaꞌ haweꞌ i rue-ruena.’ ”
17 Mewaliꞌ Nata mopahaweꞌ i Daudiꞌ upu-upu to napahaweꞌ Pueꞌ Ala i hia moliu pampetudeꞌá.
Pekakaena Daudiꞌ
18 Hangko ionoꞌ, mesuaꞌ miꞌi Daudiꞌ i lalu bambaruꞌ kaꞌaraꞌána PUEꞌ. Ia mehoda i lindoꞌna PUEꞌ hai mekakae, nauliꞌ, “Ó Pueꞌ ALA, heánáꞌaꞌ hai heánáheꞌ tinángkuꞌ? Tiꞌaraꞌangkaiꞌ hintotoꞌ motarima ahiꞌMu to Nupatongawaꞌ miꞌi hanodeꞌena. 19 Melumbuꞌ hangko ionoꞌ, PUEꞌ Ala, Nubábehi mani to maroꞌa ntepuꞌu. ModándimoKoꞌ kana i pemuleꞌángkuꞌ to tiꞌara mani mesupaꞌ, hai Nupopaitaꞌámoꞌ, kehapiꞌ tauna biásá peaꞌ.
20 Apa mani to peisá kuhuwárá i Hio, láwiꞌ Nuisá miꞌi aha mokana i huoꞌáMu deꞌe. 21 Nubábehi to mahile iti, hai Nupahaweꞌ miꞌi i huoꞌáMu deꞌe ánti dándiMu láwiꞌ iti miꞌi peundeꞌáMu. 22 Ó PUEꞌ Ala, mahile kuasaꞌMu láwiꞌ tiꞌara ara kahibaliáMu, hai tiꞌara kihádi ara ala ntániꞌna, láwiꞌ Io peá PUEꞌ Ala. 23 Hai tauna to noumbá i duniáꞌ deꞌe to hibali hai kaiꞌ taunáMu toSáráeliꞌ? Nukábáhámongkaiꞌ hangko i karapohawiꞌkiꞌ i tampoꞌ Másiriꞌ, bona mewaliꞌangkaiꞌ ánáꞌMu haduduáMu. Nubábehiáꞌangkaiꞌ tandaꞌ kuasaꞌ to mahile bona hangaꞌMu rapomahile i humalele duniáꞌ. Nuwuraheꞌ tauna ntániꞌna hai ánituraꞌ hangko i lindoꞌraꞌ taunáMuheꞌ i tempóna taunáMu lao mombeala. 24 Kaiꞌ toSáráeliꞌ, Nupopewaliꞌmongkaiꞌ taunáMu haduduáMu haweꞌ i rue-ruena, hai Io PUEꞌ, mewaliꞌmoKoꞌ Pueꞌ Ala to kipenómbái.
25 Hai deꞌe-deꞌe PUEꞌ Ala, kupembiáꞌ bona maróhó oaꞌ dándiMu to Nupahaweꞌ i kódóꞌ huoꞌáMu deꞌe, hai i pemuleꞌángkuꞌ. Kupembiáꞌ woꞌo bona Nupabukeꞌi apa to Nudándi miꞌi iti, 26 bona hangaꞌMu ina rapomahile haweꞌ i rue-ruena, álána tauna ina manguliꞌ, ‘PUEꞌ to Makuasaꞌ, Ia miꞌi Pueꞌ Ala to rapenómbái toSáráeliꞌ!’ Hai hadua hangko i pemuleꞌána Daudiꞌ huoꞌáMu deꞌe ina mewaliꞌ datu i kadatuá deꞌe.
27 Ó PUEꞌ to Makuasaꞌ to rapenómbái toSáráeliꞌ, Nupatongawaꞌ miꞌi poliwoMu i huoꞌáMu deꞌe, Nuꞌuliꞌ node: ‘Pemuleꞌámu ina Kupileꞌi mewaliꞌ datu.’ Onoꞌ miꞌi haneꞌi huoꞌáMu deꞌe pebáiꞌ mohuwárá pekakae. 28 Ó Pueꞌ ALA, Io miꞌi Pueꞌ Ala, hai upu-upu laluitaMu peisá rapoinálái, hai maroꞌa ntepuꞌu dándiMu i kódóꞌ. 29 Mewaliꞌ deꞌe-deꞌe kupembiáꞌ i Hio, bona Nuwátiꞌheꞌ oaꞌ pemuleꞌángkuꞌ, bona araheꞌ oaꞌ haweꞌ i rue-ruena. Láwiꞌ PUEꞌ Ala, Io haduduáMu to modándi, hai ánti pewátiꞌMu, pemuleꞌángkuꞌ ina rawátiꞌ oaꞌ haweꞌ i rue-ruena.”