Petiꞌ Podándi ralimbá lao i Ierusale
6
Roo onoꞌ, Daudiꞌ morámpu wopiꞌi surudadoꞌ to rapileꞌi hangko i oloꞌraꞌ toSáráeliꞌ, tálu puloꞌna sábuna kahandaꞌraꞌ. 2 Upu-upuheꞌ lao i Baale i Iudá,a bona moánti Petiꞌ Podándina Pueꞌ Ala. Ane tauna mokábelái Petiꞌ Podándi iti, paka rauliꞌ “PUEꞌ to Makuasaꞌ to mehoda i hiliꞌraꞌ kerubib i pehodaꞌá kadatuáNa.” 3 Petiꞌ Podándina Pueꞌ Ala iti raꞌala hangko i támbina Abinada i buluꞌ, rawoli i wongko kereta to woꞌu. Usa hai Ahio ánáꞌnaheꞌ Abinada, mouláꞌheꞌ kereta iti bona rakámpái. 4 Usa molumao i hintáiꞌna, hai Ahio molumao ioruna. 5 Daudiꞌ hai upu-upu toSáráeliꞌ iti molumaoheꞌ ioruna petiꞌ iti, motáróꞌ-táróꞌheꞌ hai monani-naniheꞌ i lindoꞌna PUEꞌ ánti kagóeꞌraꞌ. Mokáwiꞌheꞌ kasapi hai gambusuꞌ, mokadoꞌ-kadoꞌheꞌ rebana kándá hai ndongi.6 I kahaweꞌraꞌ i pobántiá parena Nako, gapiꞌ to modiiꞌ kereta iti tekálimpáruꞌ. Kásáliu Usa motibaaꞌ Petiꞌ Podándina Pueꞌ Ala. 7 Mabukoꞌ pemiꞌi PUEꞌ i Usa ánti kamasalaꞌna iti, haneꞌi napapate Pueꞌ Ala hai mate i hintáiꞌna Petiꞌ Podándi iti. 8 Hangko ionoꞌ, mabukoꞌ Daudiꞌ ánti kanapapatena PUEꞌ Usa iti, onoꞌ haneꞌi haweꞌ i karaukiꞌána sura deꞌe, katoroꞌá iti rahangaꞌ tauna Peres Usa, lempóna: karapapateána Usa. 9 Tempó iti woꞌo, Daudiꞌ malááꞌ ntepuꞌu i PUEꞌ, onoꞌ haneꞌi nauliꞌ, “Noumbá kapebáiꞌkuꞌ moánti Petiꞌ Podándina PUEꞌ deꞌe i kótángkuꞌ?” 10 Mewaliꞌ Daudiꞌ tiꞌara mau molimbá Petiꞌ Podándi iti i katoroꞌána i kótá Ierusale, agáiáná napehupeꞌá riꞌi i támbina Obeꞌ-Edo toGati.
11 Petiꞌ Podándina PUEꞌ iti rawoli i támbina Obeꞌ-Edo toGati tálu wulána kamaruena, hai PUEꞌ mowátiꞌheꞌ hantámbi.
12 Roo onoꞌ, rapahaweꞌ miꞌi i Datu Daudiꞌ, “PUEꞌ mowátiꞌheꞌ Obeꞌ-Edo hantámbi hai upu-upu to ara i hia ánti karapemboliꞌina Petiꞌ Podándina PUEꞌ i támbina.” Mewaliꞌ lao miꞌi Daudiꞌ moala Petiꞌ Podándina PUEꞌ Ala hangko i támbina Obeꞌ-Edo, naꞌánti lao i Ierusale i lalu kagóeꞌ-góeꞌ. 13 I tempóraꞌ topopakowaꞌ Petiꞌ Podándi iti molumao ini lingkaꞌraꞌ, napopengkarooheꞌ Daudiꞌ hai mohuhuꞌ popenómbá i PUEꞌ, ia miꞌi hambaꞌa gapiꞌ laki hai hambaꞌa ánáꞌ gapiꞌ to maruduꞌ. 14 Daudiꞌ motáróꞌ-táróꞌ i lindoꞌna PUEꞌ i karóhó-róhóána, hai mopakeꞌ badu epoꞌc to rabábehi hangko i báná to meálu.
15 Daudiꞌ hai upu-upu toSáráeliꞌ molimbáheꞌ Petiꞌ Podándina PUEꞌ haweꞌ i kótá Ierusale. Mohoraꞌ-horaꞌheꞌ hai motawueꞌheꞌ tamburuꞌ. 16 Tangaꞌna petiꞌ iti raꞌánti mesuaꞌ i Ierusale kótá Daudiꞌ, Mikale ánáꞌna Saulu to towawine metótói hangko i sungkekeꞌ hai moita Datu Daudiꞌ toámána mesendeꞌ-sendeꞌ hai motáróꞌ-táróꞌ i lindoꞌna PUEꞌ. Onoꞌ miꞌi haneꞌi Mikale mopakóiꞌ Daudiꞌ.
17 Petiꞌ Podándina PUEꞌ iti rawoli i katoroꞌána i lalu bambaruꞌ to napatimamaꞌá miꞌi Daudiꞌ. Hangko ionoꞌ, Daudiꞌ mohuhuꞌ popenómbá to raintu hai popenómbá pohintuwuꞌ i PUEꞌ. 18 Karoona Daudiꞌ mohuhuꞌ popenómbá i PUEꞌ Ala, ia mowátiꞌ upu-upu toSáráeliꞌ i lalu hangaꞌna PUEꞌ to Makuasaꞌ. 19 Roo onoꞌ, upu-upu toSáráeliꞌ to ara ionoꞌ, maroꞌa tobaleilo, maroꞌa towawine, napogáláꞌ-gáláꞌáheꞌ hambuaꞌ rótiꞌ to lómu, bauꞌ hangkakuꞌ, hai anggoroꞌ to rapabangi hangkakuꞌ.
20 Bahangapa kamaruena hangko ionoꞌ, Daudiꞌ mesuleꞌ hai mopahaweꞌ petabena i upu-upu tauna to ara i támbina. I kahaweꞌna, mesuwuꞌ miꞌi Mikale toinána, ánáꞌna Saulu, mampombelámbiꞌá Daudiꞌ, nauliꞌ, “Alo deꞌe, daturaꞌ toSáráeliꞌ toꞌu-toꞌu mampopebiláꞌ wátána haduduána! Ia mopamahili wátána haduduána i lindoꞌraꞌ hawiꞌ towawine to mobágóꞌ i támbina, nodo tauna to tiꞌara naisá mahili.”
21 Agáiáná nauliꞌ Daudiꞌ i Mikale, “Motáróꞌaꞌ i lindoꞌna PUEꞌ to mopileꞌimoꞌ mopaháwángi umámu ba tauna ntániꞌna hangko i tinána umámu mewaliꞌ datu. Kódóꞌ miꞌi to naꞌángkáꞌ PUEꞌ motadulakoi toSáráeliꞌ taunána PUEꞌ. Onoꞌ haneꞌi motáróꞌ-táróꞌaꞌ i lindoꞌna PUEꞌ. 22 Kehapiꞌ nupekiri kupakóiꞌ wátángkuꞌ haduduángkuꞌ, tiꞌaranto moapa. Agáiáná hawiꞌ towawineheꞌ to nukábelái ininá ina mobiláꞌaꞌ.”
23 Mantepuꞌu alo iti, Mikale ánáꞌna Saulu lalo, tiꞌara moánáꞌ haweꞌ i kamatena.