Daudiꞌ mewaliꞌ datu i humalele tampoꞌraꞌ toSáráeliꞌ hai toIudá
5
Roo onoꞌ, upu-upu tadulakoraꞌ toSáráeliꞌ hantina-hantina, laoheꞌ mampombelámbiꞌá Daudiꞌ i Hebero. I kahaweꞌraꞌ, rauliꞌ, “Kaiꞌ deꞌe, hawaheꞌ-waheꞌangkaiꞌ hai io, láwiꞌ upu-upukeꞌ pemuleꞌána Iako.a 2 Iaꞌo, i tempóna Saulu mopárentáiangkaiꞌ, io miꞌi to motadulakoiangkaiꞌ ane laoangkaiꞌ mombeala. Hai PUEꞌ mongkóráꞌ miꞌi i hio, Nauliꞌ, ‘Io miꞌi to ina rapodatu hai mokádipurá taunáNgkuꞌ.’ ” 3 I tempóraꞌ upu-upu totosaeraꞌ toSáráeliꞌ lao i Hebero mampombelámbiꞌá datu, Datu Daudiꞌ mopaꞌara podándi hai hira i Hebero i lindoꞌna PUEꞌ. Roo onoꞌ, moángkáꞌheꞌ Daudiꞌ mewaliꞌ daturaꞌ toSáráeliꞌ.4 I tempóna Daudiꞌ mewaliꞌ datu, tinuwuꞌna tálu puloꞌna parena, hai kamaruena mepárentá, iba puloꞌna parena. 5 Ia mepárentá i toIudá i Hebero pitu parena hantangaꞌ. Ia mopárentá upu-upu toSáráeliꞌ hai toIudá tálu puloꞌna hai tálu parena kamaruena. Pehodaꞌána kadatuána i kótá Ierusale.
Daudiꞌ mamperampaꞌi kótá Ierusale hangko i toIebusi
6 Hangkani tempó, Datu Daudiꞌ hai surudadoꞌnaheꞌ molumao lao i kótá Ierusale mampombealaꞌá toIebusi to toroꞌ ionoꞌ. ToIebusi iti mopakóiꞌheꞌ i Daudiꞌ, rauliꞌ, “Tiꞌara nubuku mosuaki kótá Ierusale deꞌe. Mogalo riꞌi tauna to bilo hai to paluꞌ, peisáheꞌ mowurakoꞌ!” Rauliꞌ riꞌi, Daudiꞌ tiꞌara peisá mesuaꞌ i lalu kótáraꞌ. 7 Agáiáná Daudiꞌ mosuaki mpuꞌu kótá Sio to rabente, to rauliꞌ woꞌo kótá Daudiꞌ.
8 Tempó iti, nauliꞌ Daudiꞌ, “Heáná to ina monangi toIebusi, hangaa-ngaa mesuaꞌ moliu poráráꞌána tauna molámbiꞌ uwai, bona haweꞌ i ewálingkuꞌ iti, topaluꞌ hai tobilo.” Onoꞌ miꞌi haneꞌi paka rauliꞌ tauna, “Tauna to bilo hai to paluꞌ tiꞌara peisá mesuaꞌ i támbi kadatuá.”
9 Roo onoꞌ, Daudiꞌ mokatoroꞌi bente iti, hai ia mohangaꞌ kótá iti kótá Daudiꞌ. Bente to mantoleli kótá iti napamaróhó, mantepuꞌu i Milo haweꞌ-haweꞌ i lalu bente. 10 Mewaliꞌ kamarue-rueá, kamaróhó-róhóá kuasaꞌna Daudiꞌ, láwiꞌ naporángá PUEꞌ Ala to Makuasaꞌ.
Támbi kadatuána Daudiꞌ
11 Hirama daturaꞌ toTiru mopakatu huoꞌána lao i Daudiꞌ. Napakatu woꞌo kau to kálángá ntepuꞌu hai tauna to mapánde mampobágóꞌ kau hai watu bona moaróheꞌ támbi kadatuá to ina nakatoroꞌi Daudiꞌ. 12 Mewaliꞌ naisá miꞌi Daudiꞌ, PUEꞌ mopakaróhó miꞌi karapodatuna toSáráeliꞌ, hai mampomahile popárentána ánti katoSáráeliꞌna taunánaheꞌ PUEꞌ. 13 I kalimbána miꞌi Daudiꞌ hangko i Hebero lao i Ierusale, ia mampotoina wopiꞌi bahangapa towawine, hai moala bahangapa towawine ntániꞌna nakarodua. Onoꞌ miꞌi haneꞌi tetámbáiheꞌ ánáꞌna tobaleilo hai towawine. 14-16 Ánáꞌna tobaleilo to mesupaꞌ i Ierusale iamoheꞌ: Siamua, Sobaꞌ, Nata, Salomo, Ibara, Elisua, Nepeꞌ, Iapia, Eisama, Eliada hai Elipeleꞌ.
Daudiꞌ monangi toPelisitiꞌ
17 I karahádina toPelisitiꞌ Daudiꞌ raꞌángkáꞌ miꞌi mewaliꞌ daturaꞌ toSáráeliꞌ, handaꞌ surudadoꞌraꞌ mempanaiꞌ lao i Ierusale ina mohakaꞌ Daudiꞌ. Agáiáná i kanahádina Daudiꞌ tunggáiáraꞌ iti, ia mempanoꞌu lao i katoroꞌá ntániꞌna to maróhó.b 18 I kahaweꞌraꞌ surudadoꞌ toPelisitiꞌ iti i lembo Repaimi, mahawuꞌheꞌ timama ina mombeala, 19 hai mekuneꞌ miꞌi Daudiꞌ i PUEꞌ, nauliꞌ, “Ba paraluuaꞌ lao mampombealaꞌáheꞌ toPelisitiꞌ? Ba ina Nuhuhuꞌheꞌ i lalu taengkuꞌ?”
Nahániki PUEꞌ, “Laomokoꞌ, láwiꞌ bateꞌna ina Kuhuhuꞌheꞌ toPelisitiꞌ iti i lalu taemu.”
20 Mewaliꞌ lao mpuꞌu miꞌi Daudiꞌ i Baꞌal-Perasimi, hai ia monangiheꞌ toPelisitiꞌ ionoꞌ. Nauliꞌ Daudiꞌ, “PUEꞌ mohawuka miꞌi ewálingkuꞌ nodo uwai to melábóꞌ mogero popotahana.” Onoꞌ miꞌi haneꞌi katoroꞌá iti rahangaꞌ Baꞌal-Perasimi, lempóna Pueꞌ to megero. 21 ToPelisitiꞌ melangkaheꞌ hai mopálehiheꞌ lenggeꞌ ánituraꞌ ionoꞌ, mewaliꞌ raꞌánti Daudiꞌ hai surudadoꞌnaheꞌ.
22 Hangkani mani, surudadoꞌ toPelisitiꞌ haweꞌheꞌ i lembo Repaimi hai mahawuꞌheꞌ timama ina mombeala. 23 Mewaliꞌ mekuneꞌ wopiꞌi Daudiꞌ i PUEꞌ apa to hangaa-ngaa nabábehi. Nahániki PUEꞌ, “Ineeꞌkou lao mampombealaꞌáheꞌ hangko i lindoꞌ, agáiáná nitolelingiheꞌ haweꞌ i taleuꞌraꞌ, haneꞌi nipombealaꞌáheꞌ hangko i hambalina kakau. 24 Ane mohádimokou muni to nodo pelingkaꞌraꞌ surudadoꞌ i wongko kakau iti, kásáliu laokou mampombealaꞌáheꞌ, láwiꞌ Kódóꞌ PUEꞌ mampoioruákou mampombealaꞌáheꞌ toPelisitiꞌ.” 25 Mewaliꞌ Daudiꞌ mampeuláꞌi mpuꞌu miꞌi apa to nahángáꞌá PUEꞌ, onoꞌ haneꞌi monangiheꞌ toPelisitiꞌ, hai mehuhuliheꞌ mantepuꞌu hangko i Geba hungkuꞌ haweꞌ i Gese.