Isiboseꞌ rapapate
4
I tempóna Isiboseꞌ ánáꞌna Saulu mohádi bámbári kamatena miꞌi Abene i kótá Hebero, matántá miꞌi kapebáiꞌna, hai rapotingkáráꞌ upu-upu toSáráeliꞌ haneꞌiheꞌ malááꞌ. 2 Araheꞌ rodua tadulako surudadoꞌna Isiboseꞌ. Hadua rahangaꞌ Baana, hai to haduána rahangaꞌ Rekaba. Hira iti ánáꞌnaheꞌ Rimona toBenami hangko i Beeroꞌ, láwiꞌ Beeroꞌ tepasuaꞌ i tampoꞌraꞌ toBenami. 3 ToBeeroꞌ iti melangkamoheꞌ lao i Gitaimi, hai toroꞌheꞌ ionoꞌ nodo tohaweꞌ peheꞌ haweꞌ i karaukiꞌána sura deꞌe.4 Ara hadua ueꞌna Saulu to rahangaꞌ Mepibose, ia miꞌi ánáꞌna Ionata. I tempóna rapahaweꞌ bámbári kamatena Saulu hai Ionata i lembo Isire-eli, tinuwuꞌna Mepibose iti lima parena, hai topopaꞌalana moala ánángkóiꞌ iti napelangkaha, agáiáná ánti kahumpeꞌ-humpeꞌna, ánángkóiꞌ iti manawoꞌ haneꞌi mewaliꞌ mongkuha.
5 Ánáꞌna Rimona toBeeroꞌ iti, iamoheꞌ Rekaba hai Baana, laoheꞌ i támbina Isiboseꞌ, hai haweꞌmoheꞌ kalialó tempóna Isiboseꞌ maturu-turu. 6 Tempó iti, towawine to mokámpái babaꞌ támbi to tangaꞌna motápiꞌi bailoꞌ, tepaletaꞌ. Onoꞌ miꞌi haneꞌi Rekaba hai Baana peisáheꞌ mesuaꞌ i lalu támbi ngkaniiꞌ-niiꞌ. 7 Mesuaꞌheꞌ i lalu lintuꞌ, hai molámbiꞌheꞌ Isiboseꞌ tangaꞌna letaꞌ i paturuána. Mewaliꞌ mopapateheꞌ Isiboseꞌ, wuáꞌna rabóhóki, haneꞌi raꞌánti. Hambengiáheꞌ molumao mouláꞌ rárá i lembo Iarade lao i kótá Hebero. 8 Wuáꞌna Isiboseꞌ iti raꞌántiá Daudiꞌ i Hebero, hai molaluitaheꞌ, rauliꞌ, “Deꞌe miꞌi wuáꞌna Isiboseꞌ, ánáꞌna Saulu ewálimu, to moliwo ina mopapatekoꞌ. Alo deꞌe, PUEꞌ moháwángi miꞌi bábehiána Saulu hai pemuleꞌánaheꞌ.”a
9 Agáiáná nahánikiheꞌ Daudiꞌ, nauliꞌ, “PUEꞌ to mampelaeaꞌ hangko i hinángkáꞌna to morampeaꞌ, moisá katoꞌuna laluitangkuꞌ deꞌe: 10 I Sikila tempóna hadua tauna mopahaweꞌ bámbári kamatena Saulu, nauliꞌ ripaꞌi bámbári iti bámbári to maroꞌa, mole riꞌi kuhakaꞌ hai kupehuoꞌá bona rapapate. Onoꞌ miꞌi háwángina poántina bámbári iti! 11 Pelumbuꞌna mani kómu, tauna to kadakekou to mopapate tauna to tiꞌara masalaꞌ, i lalu támbina haduduána hai i wongko paturuána! Bateꞌna hangaa-ngaa nipohurunga kamatena iti. Ina kupapatekou bona tiꞌarapokou ara i duniáꞌ deꞌe!”
12 Roo onoꞌ, Daudiꞌ mampohawaꞌáheꞌ surudadoꞌna bona mopapateheꞌ Rekaba hai Baana. Taeraꞌ hai bitiraꞌ rabóhóki, hai wátáraꞌ ratóe i wiwi tibubuꞌ Hebero. Agáiáná wuáꞌna Isiboseꞌ rakádipurá hai ratawu i popatawuána Abene i Hebero.