3
Pombealaraꞌ tinána Saulu hai tinána Daudiꞌ molumao oaꞌ. Daudiꞌ kamarue-rueá mombeala, kamaróhó-róhóáraꞌ riꞌi, agáiáná tinána Saulu kamarue-rueá mombeala, kamaledeꞌ-ledeꞌáraꞌ riꞌi.Ánáꞌnaheꞌ Daudiꞌ to tobaleilo
2 I kótá Hebero, mesupaꞌmoheꞌ ánáꞌna Daudiꞌ to tobaleilo.
Ánáꞌna to towutuꞌ ia miꞌi Amono, inána ia miꞌi Ahinoa hangko i Isire-eli.
3 Ánáꞌna to kaduá ia miꞌi Kileabi,a inána ia miꞌi Abigai bembaꞌna Naba hangko i Karame.b
Ánáꞌna to katálu ia miꞌi Abisalo, inána ia miꞌi Maꞌaka ánáꞌna Talamai daturaꞌ toGesuri.
4 To kaꞌiba ia miꞌi Adonia, inána ia miꞌi Hagiti.
To kalima ia miꞌi Sapeka, inána ia miꞌi Abitala,
5 hai to kaꞌini ia miꞌi Itereami, inána ia miꞌi Egala.
Upu-upu ánáꞌna Daudiꞌ iti mesupaꞌheꞌ i kótá Hebero.
Abene mohintuwuꞌ miꞌi hai Daudiꞌ
6 Tempóraꞌ tinána Daudiꞌ hai tinána Saulu mombeala, Abene mopári-pári bona motámbái karapoináláina tinánaheꞌ Saulu.
7 Hangkani tempó, Isiboseꞌ ánáꞌna Saulu mosalaꞌi Abene, napekuneꞌ, “Moapa riꞌi haneꞌi moiluhikoꞌ hai towawine to nakarodua Saulu?” Towawine iti rahangaꞌ Risipa ánáꞌna Aia.
8 Hangko ionoꞌ, rumihi kamabukoꞌna Abene ánti kanasalaꞌina Isiboseꞌ, nauliꞌ, “Ba kódóꞌ deꞌe nodo peaꞌ ahu to tiꞌara tetidaꞌ i pueꞌna? Ba nuꞌuliꞌ ripaꞌi tándáꞌ i toIudáꞌaꞌ? Haweꞌ deꞌe-deꞌe, tetidaꞌaꞌ oaꞌ i tinána Saulu umámu, i halalunaheꞌ hai i taunánaheꞌ. Tiꞌarakoꞌ kupatodáhi manawoꞌ i lalu taena Daudiꞌ. Agáiáná kehapiꞌ noꞌonoꞌ, nusalaꞌi maniaꞌ kana i towawine iti. 9-10 Rángina miꞌi nahukuaꞌ Pueꞌ Ala ane tiꞌara kupári-pári mamperampaꞌi kadatuá deꞌe hangko i hio bona Daudiꞌ mewaliꞌ datu, maroꞌa i kadatuá Sáráeliꞌ, maroꞌa i kadatuá Iudá, mantepuꞌu hangko i tampoꞌraꞌ toDaa haweꞌ-haweꞌ i kótá Baraseba, hiolaꞌ hai apa to nadándi miꞌi PUEꞌ i Daudiꞌ.” 11 Isiboseꞌ tiꞌara piꞌi pebáiꞌ molaluita i Abene láwiꞌ malááꞌ miꞌi i hia.
12 Hangko ionoꞌ, Abene mohuoꞌheꞌ taunána lao i Daudiꞌ mopahaweꞌ tewáina, napekuneꞌ, “Tiꞌara paꞌi i humalele tampoꞌ deꞌe, io peá to makuasaꞌ mepárentá? Mewaliꞌ nupaꞌara podándi hai kódóꞌ, hai ina kuánti upu-upu toSáráeliꞌ meuláꞌ i hio.”
13 Mehániꞌ Daudiꞌ, “Ane noꞌonoꞌi, maroꞌa. Nipahaweꞌ tewáingkuꞌ deꞌe i Abene: Ina kupaꞌara podándi hai ia, agáiáná ara hampákáꞌ to kupembiáꞌ. Mikale ánáꞌna Sauluc towawine hangaa-ngaa naꞌánti mai i kódóꞌ.” 14 Roo onoꞌ, Daudiꞌ mohuoꞌ woꞌo taunána lao i Isiboseꞌ ánáꞌna Saulu mopahaweꞌ tewái to manguliꞌ, “Nupopesuleꞌ Mikale to mewaliꞌ toinángkuꞌ to kusuláꞌ miꞌi hai hangatu koliꞌ petileꞌáraꞌ toPelisitiꞌ i Saulu umána.”
15 Hangko ionoꞌ, Isiboseꞌ mehuoꞌ bona towawine iti raꞌala hangko i toámána to rahangaꞌ Paliti ánáꞌna Laisi. 16 Paliti mouláꞌ oaꞌ Mikale toinána, hai nateriahi oaꞌ i bókóꞌna haweꞌ i Bahuri. Ionoꞌ molaluita miꞌi Abene i hia, nauliꞌ, “Gáná miꞌi! Mesuleꞌmokoꞌ!” Mewaliꞌ mesuleꞌ mpuꞌu miꞌi Paliti.
17 Roo onoꞌ, Abene mogómbó hai totosaeraꞌ toSáráeliꞌ, nauliꞌ, “Marue miꞌi kaniundeꞌna bona Daudiꞌ mewaliꞌ datumi. 18 Deꞌe miꞌi tempó i kómu, láwiꞌ PUEꞌ mongkóráꞌ miꞌi i Daudiꞌ, Nauliꞌ node: ‘Daudiꞌ huoꞌáNgkuꞌ to ina Kupopobunduꞌ mampelae toSáráeliꞌ taunáNgkuꞌ hangko i kuasaꞌraꞌ toPelisitiꞌ hai hangko i upu-upu ewáliraꞌ.’ ”
19 Abene mogómbó woꞌo hai toBenami.d Roo onoꞌ, ia lao i kótá Hebero mampopaisá i Daudiꞌ apa to rabutusi miꞌi toBenami hai toSáráeliꞌ iti.
20 Tempóna Abene hai rompuloꞌheꞌ taunána lao i Hebero mampombelámbiꞌá Daudiꞌ, Daudiꞌ mopatimamaꞌáheꞌ mampopengaa pandeꞌ. 21 Roo onoꞌ, mepálákáná miꞌi Abene i Daudiꞌ, nauliꞌ, “Ane peisái, ina laoaꞌ morámpu upu-upu toSáráeliꞌ bona mopaꞌaraheꞌ podándi hai pueꞌkuꞌ datu, bona datu ina mewaliꞌ datu i humalele tampoꞌ Sáráeliꞌ nodo to nuꞌundeꞌ.” Hangko ionoꞌ, Abene napaliu Daudiꞌ pohuꞌ i kamaroꞌa-roꞌa.
Ioabiꞌ mopapate Abene
22 Tempó onoꞌ, Ioabiꞌ hai surudadoꞌna Daudiꞌ mesuleꞌheꞌ hangko i pombealaꞌáraꞌ hai moántiheꞌ handaꞌ párewá to raperampaꞌi. Agáiáná Abene tiꞌara piꞌi hingkakani hai Daudiꞌ i Hebero, láwiꞌ napopeángkáꞌ miꞌi Daudiꞌ i kamaroꞌa-roꞌa. 23 I pesuleꞌna Ioabiꞌ hingkakani hai upu-upu surudadoꞌnaheꞌ, ara to mopahaweꞌ, “Abene ánáꞌna Neri lao i datu i Hebero, hai napaliu miꞌi Daudiꞌ pohuꞌ i kamaroꞌa-roꞌa.”
24 Onoꞌ miꞌi haneꞌi Ioabiꞌ lao mampohidupaꞌá datu, nauliꞌ, “Apa riꞌi to mewaliꞌ? Abene mai miꞌi i hio, moapa riꞌi haneꞌi nupaliu peá pohuꞌ? 25 Tiꞌara paꞌi nuisá heáná iti Abene ánáꞌna Neri? Mai peá moákálángikoꞌ, bona naisá iumbákoꞌ hai upu-upu tunggáiámu.”
26 Roo onoꞌ, pohuꞌ miꞌi Ioabiꞌ mopálehi Daudiꞌ, hai mohuoꞌ tauna lao moala Abene. Rahumba i tibubuꞌ Sira. Agáiáná tiꞌara naisá Daudiꞌ apa to mewaliꞌ iti. 27 I kahaweꞌna wopiꞌi Abene i kótá Hebero, naꞌánti sieruꞌ Ioabiꞌ hungkuꞌ i babaꞌá kótá, mampe to ina molaluita ngkábuni, mole motohuꞌ riꞌi taꞌina Abene hai pihoꞌna napapate, moháwángi kamopapatena Asaeliꞌ ádina Ioabiꞌ.
28 I kanahádina Daudiꞌ apa to pewaliꞌ iti, nauliꞌ, “Naisá miꞌ PUEꞌ, kódóꞌ hai taunángkuꞌ, tiꞌaraꞌangkaiꞌ masalaꞌ i kamatena Abene ánáꞌna Neri. 29 Ioabiꞌ hai upu-upu tinána to hangaa-ngaa mampohurunga kamatena Abene iti. Kupembiáꞌ i Pueꞌ bona pemuleꞌánaheꞌ Ioabiꞌ ina ara oaꞌ to kana hakiꞌ koliꞌ to meriringkuꞌi ba ketánggáꞌ,e to paluꞌ, to mate i pombeala, ba to makuraꞌ pandeꞌna.”
30 Napembiáꞌ noꞌonoꞌ láwiꞌ Ioabiꞌ hai Abisai ádina mopapateheꞌ Abene, moháwángiheꞌ kanapapatena Abene Asaeliꞌ ádiraꞌ i lalu pombeala i Gibeo.
Abene ratawu
31 Roo onoꞌ, Daudiꞌ mopárentáiheꞌ Ioabiꞌ hai upu-upu surudadoꞌna, nauliꞌ, “Nihepaꞌ miꞌi badumi hai mopakeꞌkou waruꞌ hangko i karuꞌ tandaꞌ kawiorami, hai moteriahikou kamatena Abene!” I karaꞌántina wátámandoꞌna Abene lao ratawu, Datu Daudiꞌ molumao i bókóꞌraꞌ tauna to mokowaꞌ tomate, tandaꞌ kanabiláꞌna. 32 I karatawuna Abene i Hebero, datu moteriahi napasimbuku i popatawuána Abene, hai upu-upu tauna moteriahiheꞌ woꞌo. 33 Ánti pebiláꞌna i Abene, datu mamponani nani petatangi deꞌe:
“Moapa riꞌi haneꞌi Abene mate nodo tauna to kadake?
34 Taemu tiꞌara ratimpuku, hai bitimu tiꞌara rarante.
Io rapapatekoꞌ tauna to kadake hai maseke.”
Hangko ionoꞌ, upu-upu tauna mantámbái karumihina poteriahiraꞌ Abene.
35 Roo onoꞌ, handaꞌ tauna lao i Daudiꞌ membiáꞌ bona ia mandeꞌ tempóna mabaa mani, agáiáná modándi riꞌi Daudiꞌ, nauliꞌ, “Kupembiáꞌ bona Pueꞌ Ala mohukuaꞌ ane mandeꞌaꞌ hangko tiꞌara mani támpu alo.”
36 I karahádina tauna apa to nauliꞌ datu iti, góeꞌheꞌ upu-upu. Hai melumbuꞌ hangko ionoꞌ, hinángkáꞌ to nabábehi datu rarekeꞌ maroꞌa. 37 Onoꞌ miꞌi haneꞌi, i alo iti, raisá miꞌi tauna i humalele tampoꞌ Sáráeliꞌ, karapapatena Abene ánáꞌna Neri tiꞌara napokana Datu Daudiꞌ.
38 Roo onoꞌ, molaluita miꞌi Daudiꞌ i upu-upu topobágóꞌna, nauliꞌ, “Tiꞌara paꞌi niꞌisá, i alo deꞌe, mate miꞌi hadua tadulako mahile i tampoꞌ Sáráeliꞌ. 39 Kehapiꞌ kódóꞌ deꞌe datu to napileꞌi Pueꞌ, agáiáná maledeꞌaꞌ. Ioabiꞌ hai halalunaheꞌ ánáꞌna Seruia maróhó gaga, tiꞌara kubuku mokuasaꞌiheꞌ. Kupembiáꞌ bona PUEꞌ moháwángi tauna to kadake iti hintotoꞌ hai kakadakena.”