Daudiꞌ raꞌángkáꞌ mewaliꞌ datu i tampoꞌ Iudá
2
Roo onoꞌ, Daudiꞌ mekuneꞌ i PUEꞌ, nauliꞌ, “Ba hangaa-ngaa laoaꞌ i hambuaꞌ wánuá to i tampoꞌ Iudá?”Nauliꞌ PUEꞌ i Daudiꞌ, “Laomokoꞌ!”
Napekuneꞌ wopiꞌi Daudiꞌ, “Ina laoaꞌ iumbá?”
Nahániki PUEꞌ, “Laokoꞌ i kótá Hebero.”
2 Mewaliꞌ lao mpuꞌu miꞌi Daudiꞌ i Hebero hingkakani hai toinána to rodua. Hangaꞌna hadua Ahinoa to hangko i kótá Isire-eli hai to hadua Abigai bembaꞌna Naba toKarame.a 3 Daudiꞌ moánti woꞌo tauna to meuláꞌ i hia, hingkakani hai tinánaheꞌ hai ánáꞌnaheꞌ. Toroꞌheꞌ i kótá Hebero hai i wánuá-wánuá to hungkuꞌ. 4 Hangko ionoꞌ, toIudá laoheꞌ i kótá Hebero mobubuhaheꞌ lana i wuáꞌna Daudiꞌ, tandaꞌ kamewaliꞌna miꞌi daturaꞌ toIudá.
Roo onoꞌ, i kanahádina Daudiꞌ Saulu ratawu miꞌi toIabesi hangko i tampoꞌ Gileaꞌ, 5 ia mohuoꞌ taunána lao mopahaweꞌ tewáina i hira to manguliꞌ node: “Hampóáꞌworia PUEꞌ mowátiꞌkou ánti kanipatongawaꞌna ahiꞌmi i Saulu datumi, haneꞌi nitawu. 6 Mewaliꞌ tapembiáꞌ i PUEꞌ bona Ia mopatongawaꞌ woꞌo kamaꞌahiꞌNa hai katetidaꞌNa i kómu, hai kódóꞌ woꞌo ina kubábehi woꞌo noꞌonoꞌ ánti bábehiámi iti. 7 Deꞌe-deꞌe, nipakaróhó hai nipatetidaꞌ lalumi, láwiꞌ Saulu datumi mate miꞌi, hai toIudá mopileꞌimoꞌ mewaliꞌ daturaꞌ.”
Isiboseꞌ raꞌángkáꞌ mewaliꞌ daturaꞌ toSáráeliꞌ
8 Tempó onoꞌ woꞌo, Abene ánáꞌna Neri, tadulako surudadoꞌna Saulu, moánti Isiboseꞌ ánáꞌna Saulu lao i Mahanai {i hambali uwai Iarade tándáꞌ i mata alo}, 9 hai moángkáꞌ Isiboseꞌ iti mewaliꞌ datu i tampoꞌraꞌ toGileaꞌ, toAsere, toIsire-eli, toEparai, toBenami hai upu-upu toSáráeliꞌ. 10 I tempóna Isiboseꞌ ralántiꞌ mewaliꞌ daturaꞌ toSáráeliꞌ, tinuwuꞌna iba puloꞌna parena, hai ia mepárentá rompare kamaruena.
To tándáꞌ i Daudiꞌ, toIudá peheꞌ. 11 Daudiꞌ mepárentá i kótá Hebero i tampoꞌ Iudá pitu parena hantangaꞌ kamaruena.
Pombealaraꞌ toSáráeliꞌ hai toIudá
12 Hangkani tempó, Abene ánáꞌna Neri hai surudadoꞌna Isiboseꞌ ánáꞌna Saulu, pohuꞌheꞌ hangko i tampoꞌ Mahanai laoheꞌ i kótá Gibeo. 13 Ioabiꞌ ánáꞌna Seruiab hai surudadoꞌna Daudiꞌ laoheꞌ woꞌo. Mohidupaꞌheꞌ i tibubuꞌ to mahile i Gibeo, hai mehodaheꞌ ionoꞌ mombehambali. 14 Molaluita miꞌi Abene i Ioabiꞌ, nauliꞌ, “Maikoꞌ, tapileꞌi bahangapa ánáꞌntomoane bona mombealaheꞌ i lindoꞌtaꞌ.”
Nahániki Ioabiꞌ, “Maroꞌa.”
15 Mewaliꞌ hampuloꞌ hai rodua surudadoꞌ rapileꞌi hangko i toBenami, tinána Isiboseꞌ ánáꞌna Saulu, noꞌonoꞌ woꞌo hangko i taunána Daudiꞌ, hibali kahandaꞌraꞌ. 16 Hira hadua-hadua momberepáꞌheꞌ mpoweluáꞌraꞌ ewáliraꞌ hai mombetohuꞌheꞌ mpotaꞌi hai pihoꞌraꞌ, álána madungkáheꞌ láwiꞌ matemoheꞌ upu-upu. Onoꞌ miꞌi haneꞌi katoroꞌá iti to hungkuꞌ i Gibeo rahangaꞌ Helikaꞌ Hasuri, lempóna Pádá Pihoꞌ.
17 Roo onoꞌ, mewaliꞌ pombeala to rumihi ntepuꞌu, hai surudadoꞌna Daudiꞌ monangiheꞌ Abene hai taunánaheꞌ, iamoheꞌ surudadoꞌ toSáráeliꞌ. 18 Ánáꞌna Seruia to tálu, iamoheꞌ Ioabiꞌ, Abisai hai Asaeliꞌ, aramoheꞌ ionoꞌ. Asaeliꞌ miꞌi to magásiꞌ pelangkana nodo lagiwa. 19 Ia modápáꞌ Abene, hai tiꞌara mehupeꞌ i kabeoꞌ ba i kuáná. 20 Tangaꞌraꞌ melangka, Abene mehaileꞌ ntaleuꞌ hai mekuneꞌ, “Io paꞌi Asaeliꞌ?”
Nahániki Asaeliꞌ, “Ió, kódóꞌ.”
21 Roo onoꞌ, molaluita wopiꞌi Abene, nauliꞌ, “Mobaleoꞌmokoꞌ i kabeoꞌ ba i kuáná, nuhakaꞌ hadua surudadoꞌ hai nuala párewána mombeala.” Agáiáná Asaeliꞌ tiꞌara mengkaroo modápáꞌ Abene. 22 Abene molaluita wopiꞌi i Asaeliꞌ, nauliꞌ, “Mengkaroomokoꞌ medápáꞌ! Tiꞌara kuꞌundeꞌ mopapatekoꞌ. Ane kupapatekoꞌ, noumbá miꞌi kapeisángkuꞌ molindoꞌ Ioabiꞌ wutuꞌmu?”
23 Agáiáná Asaeliꞌ tiꞌara mau mengkaroo, onoꞌ haneꞌi Abene motohuꞌ ntaleuꞌ hai kana taꞌina Asaeliꞌ lembáꞌ haweꞌ i káduꞌna. Asaeliꞌ kásáliu madungká hai mate pemiꞌi ionoꞌ. Upu-upu tauna to poliu i rárá iti, mengkarooheꞌ mampeita Asaeliꞌ.
24 Agáiáná Ioabiꞌ hai Abisai, halalunaheꞌ Asaeliꞌ, modápáꞌheꞌ oaꞌ Abene. Ina támpu miꞌi alo, haweꞌmoheꞌ i buluꞌ Ama to tándáꞌ i mata alo Gia, i rárá lao i pádá loriꞌ Gibeo. 25 Tempó onoꞌ, hirámpuheꞌ toBenami i taleuꞌna Abene, hai meángkáꞌheꞌ i tutuꞌna hambuaꞌ buluꞌ, timamaheꞌ ina mombeala.
26 Hangko i tutuꞌ buluꞌ iti, mekióꞌ miꞌi Abene i Ioabiꞌ, nauliꞌ, “Ina mombealakeꞌ paꞌi haweꞌ i rue-ruena? Tiꞌara paꞌi nuisá, pombeala deꞌe ina mopamapári pekeꞌ? Kitaꞌ deꞌe mohalalukeꞌ. Hangapa mani kamaruena hangko mopárentákoꞌ surudadoꞌmuheꞌ bona mengkarooheꞌ modápáꞌangkaiꞌ?”
27 Nahániki Ioabiꞌ, “Kudándi i lindoꞌna Pueꞌ Ala to tueꞌ, ane tiꞌarakoꞌ molaluita, surudadoꞌkuꞌheꞌ ina modápáꞌkou oaꞌ haweꞌ mepulo.”
28 Hangko ionoꞌ, Ioabiꞌ motawueꞌ tamburuꞌna bona surudadoꞌnaheꞌ mengkaroo modápáꞌ toSáráeliꞌ, haneꞌi mengkaroo mpuꞌumoheꞌ, tiꞌarapoheꞌ mombeala.
29 Abene hai surudadoꞌna molumaoheꞌ hambengiá mouláꞌheꞌ lembo Iarade. Mowetaheꞌ i uwai Iarade hai mopaliliuheꞌ polumaoraꞌ. Kalialo hangko haweꞌraheꞌ i tampoꞌ Mahanai.
30 Pengkaroona Ioabiꞌ modápáꞌ Abene, ia morámpu upu-upu surudadoꞌna. Tongawaꞌ hampuloꞌ hai hahioꞌ surudadoꞌna Daudiꞌ to rapapate, i rawa Asaeliꞌ. 31 Agáiáná to rapapate surudadoꞌna Daudiꞌ, tálu átuna hai ini puloꞌna toBenami to meuláꞌ i Abene. 32 Mewaliꞌ Ioabiꞌ hai surudadoꞌnaheꞌ mokowaꞌ wátámandoꞌna Asaeliꞌ lao ratawu i lalu popatawuána umána i Beteleme. Roo onoꞌ, molumaoheꞌ hambengiá, hai haweꞌmoheꞌ i Hebero i pembetona alo.