Semueli
to Karongkánina
Daudiꞌ mohádi bámbári kamatena Saulu
1
I kamatena miꞌi Saulu hai kamenangina miꞌi Daudiꞌ i toAmaleꞌ, ia mesuleꞌ lao i wánuá Sikila hai toroꞌ ionoꞌ rongalo. 2 I katáluna alona, hadua surudadoꞌ haweꞌ hangko i pobambaruꞌáraꞌ surudadoꞌna Saulu. Waruꞌna mahepaꞌ-hepaꞌ hai wuáꞌna keawu tandaꞌ kawiorana. I kahaweꞌna i Daudiꞌ, ia molingkudu motóngkóꞌ i bitina Daudiꞌ. 3 Mekuneꞌ Daudiꞌ i hia, nauliꞌ, “Hangko iumbákoꞌ mai?”Nahániki surudadoꞌ iti, “Kódóꞌ surudadoꞌnaꞌaꞌ Saulu to melangka hangko i pombealaꞌá, láwiꞌ toSáráeliꞌ ranangiheꞌ toPelisitiꞌ.”
4 Mekuneꞌ wopiꞌi Daudiꞌ, “Apa to mewaliꞌ? Nupahaweꞌáꞌaꞌ!”
Nahániki surudadoꞌ iti, “Surudadoꞌkiꞌ melangkamoheꞌ hangko i pombealaꞌá hai handaꞌheꞌ to mate, tepasuaꞌ woꞌo Saulu hai Ionata ánáꞌna.”
5 Hangko ionoꞌ, mekuneꞌ wopiꞌi Daudiꞌ i surudadoꞌ to maleheꞌ mani iti, nauliꞌ, “Noumbá haneꞌi nuisá kamatena miꞌi Saulu hai Ionata ánáꞌna?”
6 Nahániki surudadoꞌ iti, “Tempó iti, arantoaꞌ i buluꞌ Giboa, hai kuita Saulu mempaisare i tawalaꞌna. Kereta pombeala hai surudadoꞌ ewálina to modárá hungkuꞌmoheꞌ haweꞌ i hia. 7 Mehaileꞌ ntaleuꞌ miꞌi Saulu, naitaꞌaꞌ, haneꞌiaꞌ nakióꞌ. Kuhániki, ‘Deꞌentoaꞌ tuá,’ 8 hai ia mekuneꞌ i kódóꞌ, ‘Heánákoꞌ?’
Kuhániki, ‘Kódóꞌ toAmaleꞌ.’
9 Roo onoꞌ, nahángáꞌáꞌaꞌ, ‘Maimoꞌ nupapate. Rumihi tobelángkuꞌ, hungkuꞌmoꞌ mate.’ 10 Mewaliꞌ lao mpuꞌu miꞌi kuhungkuki haneꞌi kupapate, láwiꞌ kuisá datu iti tiꞌara piꞌi peisá tueꞌ ánti karumihina tobelána. Mewaliꞌ tatalina datu kuala hangko i wuáꞌna, hai kálá hangko i taena, hai deꞌe miꞌi kuántiá mai tuángkuꞌ.”
11 I kanahádina bámbári iti, Daudiꞌ mohepaꞌ waruꞌna tandaꞌ kawiorana, hai upu-upu tauna to hingkakani hai ia, mohepaꞌheꞌ woꞌo waruꞌraꞌ. 12 Teriaꞌheꞌ, hai tiꞌaraheꞌ mandeꞌ haweꞌ támpu alo, láwiꞌ mambuhinaoheꞌ Saulu, Ionata hai surudadoꞌ toSáráeliꞌ to matemoheꞌ i pombeala iti.
13 Roo onoꞌ, mekuneꞌ wopiꞌi Daudiꞌ i surudadoꞌ to moánti bámbári i hia, nauliꞌ, “Io, toapakoꞌ?”
Nahániki, “Kódóꞌ deꞌe, ánáꞌnaꞌaꞌ hadua toAmaleꞌ.”
14 Hangko ionoꞌ, napekuneꞌ Daudiꞌ i hia, “Noumbá haneꞌikoꞌ pebáiꞌ mopapate tauna to napileꞌi miꞌi PUEꞌ mewaliꞌ datu?”a
15 Mewaliꞌ Daudiꞌ mokióꞌ hadua surudadoꞌna, nauliꞌ, “Maikoꞌ. Nupapate tauna deꞌe!” Mewaliꞌ surudadoꞌ iti mobataꞌ toAmaleꞌ álána mate. 16 Hangko tiꞌara mani mate, napahaweꞌ miꞌi Daudiꞌ i hia, “Io miꞌi to mampohurunga kamatemu haduduámu, láwiꞌ io haduduámu to mopangákuꞌ kamopapatemu miꞌi datu to napileꞌi PUEꞌ iti.”
Daudiꞌ moteriahi Saulu hai Ionata
17 Daudiꞌ monanika nani petatangi ánti kamateraꞌ Saulu hai Ionata ánáꞌna, 18 hai napárentáiheꞌ woꞌo bona nani iti rapaturoꞌáheꞌ toIudá. Nani iti teukiꞌ i sura Iasa.b
19 “Ó toSáráeliꞌ, peraeꞌámu mate miꞌi i tutuꞌ buluꞌ!
Madámpámoheꞌ surudadoꞌ to keate!
20 Ineeꞌ nipahaweꞌ bámbári iti i kótá Gati,
ineeꞌ nipahaweꞌ i porompengaꞌá rárá i kótá Asakelo,c
bona ánáꞌntawine toPelisitiꞌ tiꞌaraheꞌ góeꞌ,
hai tiꞌaraheꞌ mohoraꞌ-horaꞌ ánáꞌntawineraꞌ tauna to tiꞌara moisá Pueꞌ Ala.
21 Ó buluꞌ-buluꞌ i Giboa! Nipehádingi wambaꞌkuꞌ:
Ineeꞌ miꞌi ara namu ba udá mouwaihingikoꞌ,
bona bangi pádá.
Láwiꞌ ionoꞌ manawoꞌ miꞌi lábáraꞌ tauna to keate,
tiꞌara piꞌi ara to morirohi lana i lábána Saulu bona maróhó,
22 agáiáná lábá iti kana waheꞌraꞌ ewálina to mate,
hai lompoꞌraꞌd tauna to keate.
Ionata molámbiꞌ miꞌi tunggáiána mepapate hai panaꞌna,
hai Saulu woꞌo mepapate hai pihoꞌna.
23 Saulu hai Ionata,
rapokaꞌahiꞌheꞌ hai maroꞌa laluraꞌ.
Maroꞌa katueꞌraꞌ hai kamateraꞌ
tiꞌaraheꞌ mogááꞌ-gááꞌ.
Melumbuꞌ kamagásiꞌraꞌ hangko i koꞌaaꞌ,
melumbuꞌ kamaróhóraꞌ hangko i singá.
24 Ee towawine toSáráeliꞌ, niteriahi miꞌi Saulu,
to mampoweꞌikou badu to meraeꞌ hai malei ntepuꞌu.
Ia mampoweꞌikou párewá hangko i buláwá hai paramata,
bona nibungaꞌ-bungaꞌi badumi iti.
25 Madámpámoheꞌ surudadoꞌ to keate,
madámpáheꞌ i tangaꞌ pombeala,
hai Ionata rapapate i wongko buluꞌ.
26 Ee Ionata to kupohalalu, wiora ntepuꞌu lalungkuꞌ,
láwiꞌ kupokaꞌahiꞌ ntepuꞌukoꞌ.
Ahiꞌmu i kódóꞌ maroꞌa ntepuꞌu,
melumbuꞌ hangko i ahiꞌraꞌ towawine.
27 Madámpámoheꞌ surudadoꞌ to keate!
Párewá pombealaraꞌ tiꞌara piꞌi ara.”